Մանկավարժական համալսարանում ուսանողների պակաս կա՞. պարզաբանում է ռեկտորը

Մամուլում շարունակ  լուրեր են շրջանառվում այն մասին, որ Երեւանի Խ. Աբովյանի անվան հայկական պետական մանկավարժական համալսարանի ղեկավարությունը ուսանողների թվի նվազման պատճառով  պրոֆեսորադասախոսական կազմի շրջանում լայնածավալ կրճատումներ է սկսել: Հատկապես կրքերը սուր են կուլտուրայի ֆակուլտետում, որտեղ աշխատանքից ազատվել են 3 դասախոսներ, իսկ մի քանիսի ծանրաբեռնվածությունն իջեցվել է:

ArmLur.am-ն, անդրադառնալով այս թեմային, զրուցեց  Խաչատուր Աբովյանի անվան հայկական պետական մանկավարժական համալսարանի ռեկտոր Ռուբեն Միրզախանյանի հետ:

-Պարո՛ն Միրզախանյան, մանկավարժական համալսարանում կադրային ի՞նչ փոփոխություններ են եղել և հատկապես ո՞ր ֆակուլտետներում:

-Լրագրության ամբիոնում երեք դասախոսների դրույքաչափն է իջել, ոչ թե նրանք կրճատվել են: Այդ կապակցությամբ համալսարանի լրատվական վարչությունը համապատասխան հայտարարությամբ է հանդես եկել` ասելով,  որ այս  հանգամանքը պայմանավորված է նրանով, որ այս տարի լրագրության բաժնում նախատեսվածից պակաս քանակությամբ է եղել ընդունելություն: Հետևաբար, դրա հետևանքով դասաժամերի սակավություն կա, բայց մենք հուսով ենք, որ երկրորդ սեմեստրին հնարավորություն կունենաք այդ բացը լրացնելու:

-Իսկ ինչո՞վ է պայմանավորված ուսանողների սակավությունը.  վարձավճարը, դասախոսական անձնակազմը… 

-Մնակավարժական համալսարանը բուհերից միակն է, որ վերջին 6-7 տարիների ընթացքում ուսման վարձ չի բարձրացրել: Իսկ ամբիոնի որակական մասին կարող եմ ասել, որ այն միշտ, ավանդական առումով, աչքի է ընկնում բավականին բարձր որակավորում  ունեցող դասախոսական կազմով: Այս ամբիոնում դասավանդում են լրագրության երևելի դեմքեր, մի շարք թերթերի գլխավոր խմագիրներ: Չնայած մեզ հաջողվել է պահպանել բակալավրիատում ուսանողների թիվը, իսկ մագիստրատուրայում մոտավորապես 15%-ի աճ կա, սակայն այդ ամենը հավասարապես չի բաշխված, կան բաժիներ, որտեղ առկա է նվազում և կան բաժիններ, որտեղ կա ավելացում: Ցավոք լրագրության բաժնում, համեմատության մեջ դնելով անցած տարվա թվի հետ, արձանագրել ենք նվազում: Կարծում եմ, որ առաջիկա տարիների ընթացքում այս վիճակը կլինի բարվոք:

զրուցեց Լիդա Եղիազարյանը