Հովհաննես Հարությունյանը հենակներով կարողանում է շարժվել. փաստաբան

«Սասնա ծռեր» խմբի անդամ Հովհաննես Հարությունյանին օրերս տեղափոխել էին «Էրեբունի» բժշկական կենտրոն բուժզննման, որից հետո նրան կրկին տեղափոխել են ՀՀ ԱՆ «Դատապարտյալների հիվանդանոց» ՔԿՀ։

Հարությունյանի փաստաբան Հայարփի Սարգսյանն ArmLur.am-ի հետ զրույցում հայտնեց, որ իր պաշտպանյալին բժշկական կենտրոնից անսպասելի են տեղափոխել ՔԿՀ և որ նա նախօրոք չի տեղեկացել այդ մասին. «Ինձ համար անակնալ  էր, թե «Էրեբունի» բժշկական կենտրոն տեղափոխելը, թե հետո կրկին հետ տանելը: Հիվանդանոցում գտնվելու օրերին ցավազրկվել է, բայց ցավեր շարունակում է ունենալ»:

Փաստաբանը նաև նշեց, որ Հովհաննեսին հաջողվում է հենակների միջոցով շարժվել. «Նա հենակներով, մեկ ոտքի վրա հենվելով կարողանում է շարժվել, սակայն վիրավոր ոտքի վրա ուժ գործադրել կամ հենվել չի կարողանում»:

Հիշեցնենք, որ Հովհաննես Հարությունյանը մեղադրվում է  ՀՀ Քրեական օրենսգրքի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։