Գյումրիում ՌԴ հյուպատոսարանի տարածքում գործում է ՌԴ Պետդումայի ընտրությունների տեղամաս

Ռուսաստանի Դաշնության քաղաքացիները, ովքեր մշտապես բնակվում են Հայաստանի տարածքում, ինչպես նաև ռուսաստանցի զբոսաշրջիկները սեպտեմբերի 18­ին մասնակցում են ՌԴ Պետդումայի ընտրություններին նաև Գյումրիում տեղակայված ՌԴ հյուպատոսարանի տարածքում գործող թիվ 8031 ընտրատեղամասում՝ ներկայացնելով գործող օտարերկրյա անձնագիրը։ Այստեղ են քվեարկում ինչպես Շիրակում, այնպես էլ Լոռիում բնակվողները: Քվեարկությունը կանցկացվի 08:00­ից մինչև 20:00: Եւս 3 տեղամաս Շիրակի մազի տարածքում գործում են 102­րդ ռազմաբազայի տարածքում: Հյուպատոսարանում ընտրությունը սկսվել է ժամանակին և նորմալ ընթանում է:

Այս մասին «Արմենպրես»­ին վստահեցրեց թիվ 8031 ընտրատեղամասի նախագահ, Գյումրիում ՌԴ հյուպատոս Եվգենի Կոնիշևը: «Ընտրողների հոսք օրվա ընթացքում սպասվում է : Ընթացքն արդեն ակտիվ է, բայց ավելին ենք սպասում: Դա կապված է նրա հետ, որ այսօր հանգստյան օր է, սակայն, ինչպես ցույց է տալիս փորձը, Հայաստանում Ռուսաստանի քաղաքացիները բավական ակտիվ են և մեծ հոսք կլինի մի քանի ժամից, երբ իրենց քաղաքացիական պարտքը կատարելու համար Գյումրի կգան նաև հարևան Լոռու մարզից: Սպասում ենք նաև ՌԴ քաղաքացիների՝ Վրաստանում բնակվող: Այնպես որ, հյուպատոսարանում տեղակայված տեղամասում սպասում ենք մեծ ակտիվություն»,­ նշեց հյուպատոսը՝ կարևորելով ընտրական գործընթացը ՌԴ յուրաքանչյուր քաղաքացու համար: «Պետդումայի պատգամավորների ընտրություն անչափ կարևոր է, մենք պետք է կարողանանք ընտրել արժանի, գրագետ ու արհեստավարժ պատգամավորների, ովքեր կկարողանան օրենքներ ընդունել՝ ի շահ ՌԴ քաղաքացիների»,­նշեց պատասխանատուն:

«Ընտրատեղամասը բացվել է ընտրողի համար առավոտյան ժամը 8-­ին, սակայն մինչ այդ մեր կողմից կատարվել են նախապատրաստական վերջին աշխատանքները՝ ստուգել քվեախցերը, կնիքների առկայությունը և այլն: Կաշխատենք մինչև ժամը 20:00­-ը, որից հետո արդեն կսկսենք հաշվարկը»,­ հավելեց Եվգենի Կոնիշևը: ՌԴ յոթերորդ գումարման Պետդումայի պատգամավորների ընտրությունները տեղի կունենան սեպտեմբերի 18­-ին խառը համակարգով. 225 պատգամավոր կընտրվի կուսակցական ցուցակներով (համամասնական համակարգ) և 225­ ը` մեծամասնական համակարգով։