Արցախի ազատագրված ոչ մի տարածք չի կարող զիջումի առարկա լինել. Ազգային երեք կուսակցությունների համատեղ հայտարարությունը

Ազգային երեք կուսակցութիւններու՝ Սոցիալ Դեմոկրատ Հնչակեան կուսակցութեան, Հայ Յեղափոխական Դաշնակցութեան եւ Ռամկավար Ազատական կուսակցութեան Արեւմտեան Ամերիկայի ղեկավար մարմիններս, յանուն մեր շարքերուն եւ համակիր շրջանակներուն կ՛ողջունենք Հայաստանի անկախ հանրապետութեան 25-րդ տարեդարձը եւ այս առթիւ կը յայտարարենք

ա.- Մեր աներեր նուիրումը՝ Հայաստանի անկախ պետականութեան հզօրացման գործին։

բ.-  Մեր մտահոգութիւնը, թէ՝ Հայաստանի 25-ամեայ երիտասարդ հանրապետութիւնը տակաւին կը դիմագրաւէ արտագաղթի հարցը: Մեր խորին համոզումն է, որ  արտագաղթի կասեցման նպատակով պէտք է անյապաղ քայլեր ձեռնարկուին երկրի ընկերային եւ տնտեսական իրավիճակի, դատաիրաւական համակարգի հիմնովին փոփոխութիւններու եւ բարեկարգելու ուղղութեամբ։

գ. Մեր համոզումը, որ՝ Արցախեան հարցի լուծումը հնարաւոր է միայն բանակցային խաղաղ գործընթացներով. դէմ ենք սակայն՝ հող խաղաղութեան համար հնչեցուող փոխզիջման տարբերակին, եւ կը հաստատենք, որ Արցախի ազատագրուած ոչ մէկ տարածք կրնայ զիջումի առարկայ ըլլալ:

դ.- Մեր վճռականութիւնը՝ հայրենի ժողովուրդին թեւ ու թիկունք կանգնելու եւ իրենց արդար ու բարգաւաճ երկիր կառուցելու ձգտումներուն սատարելու։

ե.- Գործակցութիւնը՝ որպէսզի Հայաստանի Հանրապետութենէն ներս ժողովրդավարութիւնը եւ մարդու իրաւունքները կիրարկուին ամենալայն չափերով։

զ.- Վերջապէս, Արեւմտեան Միացեալ Նահանգներու հայ համայնքի կարողականութեան առաւելագոյն կազմակերպումով ու համագործակցութեան մթնոլորտի ամրապնդման ճամբով՝ նոր որակով Հայաստանի ու Արցախի անվտանգութեան ապահովման ու զարգացման ի նպաստ աշխատանքները յառաջ տանելու յանձնառութիւնը։

Կեցցէ Հայաստանի Անկախ Պետականութիւնը,

Կեցցէ Հայաստանն ու Արցախը,

Կեցցէ հայ ժողովուրդը։

ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ

ԱՐԵՒՄՏԵԱՆ ԱՄԵՐԻԿԱՅԻ ՎԱՐԻՉ  ՄԱՐՄԻՆ

ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ

ԱՐԵՒՄՏԵԱՆ ԱՄԵՐԻԿԱՅԻ ԿԵԴՐՈՆԱԿԱՆ ԿՈՄԻՏԷ

ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ

ԱՐԵՒՄՏԵԱՆ ԱՄԵՐԻԿԱՅԻ ՇՐՋԱՆԱՅԻՆ ՎԱՐՉՈՒԹԻՒՆ

Լոս Անճելըս, Սեպտեմբեր 16, 2016