Հոկտեմբերի 4-ին մեկնարկել է «Հայ մայրեր» բարեգործական հասարակական կազմակերպության և Երևանի քաղաքապետարանի աջակցությամբ իրականացվող «Երևանի քաղաքապետարանը`Երևանի մանուկներին» խորագրով ծրագրի 2-րդ փուլը: 2-րդ փուլի մեկնարկին ներկա է գտնվել նաև Երևանի քաղաքապետարանի աշխատակազմի քարտուղարի տեղակալ Սամվել Մերթարջյանը, ում խոսքով սկսած 2014 թվականի հունիսից իրականացվող ծրագիրը գործնականում ապացուցել է իր արդյունավետությունը և այսուհետ էլ կունենա շարունակություն: Նախորդ տարիներին երևանաբնակ 19 միայնակ մայրերի` մանկական ուղեղային կաթվածով տառապող երեխաները հնարավորություն են ստացել եռամսյա անվճար վերականգնողական բուժում անցնել: Այս տարի, սակայն, ծրագրի երկու եռամսյակի ընթացքում երկուական ամիս տևողությամբ փոքրիկները կստանան ֆիզիոթերապիայի, ջրային թերապիայի և արտ-թերապիայի վերականգնողական բուժում:
Այսօրվանից մեկնարկած երկրորդ եռամսյակային փուլում երեխաները կանցնեն արտ-թերապիա և ֆիզիոթերապիա միաժամանակ: «Հայ մայրեր» բարեգործական հասարակական կազմակերպության հիմնադիր նախագահ Նարինե Մանուկյանը նշել է, որ ծրագրի արդյունավետությունն ակնհայտ է, քանի որ ուղեղային կաթվածով երեխաներից մեկը սկսել է նստել, իսկ մյուսն անգամ քայլել: Ծրագրի շահառու փոքրիկների մայրերն ու «Հայ մայրեր» բարեգործական հասարակական կազմակերպության հիմնադիր նախագահը շնորհակալություն են հայտնել Երևանի քաղաքապետարանին` ծրագիրը ֆինանսավորելու և սոցիալական կարևորագույն այս գաղափարին մշտապես աջակցելու համար: «Էրեբունի-Երևան 2798» տոնակատարության առթիվ Սամվել Մերթարջյանը երեխաների մայրերին նվիրել է տոնական փաթեթներ:
Երևանի քաղաքապետարանի տեղեկատվության
և հասարակայնության հետ կապերի վարչություն
.gif)
