Դեռեւս 2014 թվականի մայիսի 20-ին ՀՀ նախկին վարչապետ Հովիկ Աբրահամյանը Ազգային ժողովում հայտարարել էր, որ ցանկանում է մի կառույցում համախմբել նախկին վարչապետներին: «Քանի որ այս դահլիճում նստած են երկու նախկին վարչապետներ, ուզում եմ տեղեկացնել, որ ցանկանում եմ ստեղծել «Վարչապետների ակումբ», որտեղ կներգրավվեն ՀՀ բոլոր վարչապետները, տնտեսական, քաղաքական գործընթացները կքննարկեն: Նրանց փորձը, գիտելիքները հաշվի կառնվի, դա, իմ կարծիքով, լավ գաղափար է: Համոզված եմ, որ նախկին վարչապետների մեջ կան գործիչներ, որոնք իրենց գիտելիքներով, փորձով կօգնեն իրականացնել մեր ծրագիրը»:
«Ժողովուրդ»-ը վարչապետների ակումբի եւ Կ. Կարապետյանի վերջին հայտարարությունների մասին զրուցեց ՀՀ նախկին վարչապետ, ներկայումս ԱԺ ՀՀԿ խմբակցության պատգամավոր Խոսրով Հարությունյանի հետ:
-Պարո՛ն Հարությունյան, վարչապետների ակումբ տեղծվեց, Դուք էլ բավականին ոգեւորված էիք այդ ակումի գաղափարով: Ինչո՞ւ այն, ըստ էության, չկայացավ: Քանի՞ հանդիպում եղավ:
-Հանդիպում եղավ, մեկ երկու, ոչ շատ հաճախ: Ինքը՝ գաղափարը, վատ գաղափար չէր, Աբրահամյանի գաղափար, այդպես եմ գնահատում, բայց գիտեք, այդ գաղափարի հիմքում ընկած էր մի այսպիսի կարեւոր թեզ. այդ ակումբը պետք էր նախեւառաջ գործող վարչապետին, որովհետեւ այդ ակումբի կարծիքը, խորհուրդը ավելի շատ օգտակար կարող էր լինել գործող վարչապետին, քան թե մեզ, որ պաշտոնաթող վարչապետներ ենք: Հետեւաբար այդ տեսանկյունից միշտ նախաձեռնությունը պետք է գտնվեր գործող վարչապետի ձեռքում:
-Կոնկրետ ի՞նչ հարցեր քննարկեցիք այդ մեկ-երկու հանդիպումների ընթացքում:
-Ամենատարբեր, մենք քննարկել ենք, թե հարկային վարչարարության առանձնահատկությունները, օրինակ, ես բարձրացրել եմ քաղաքացիական ծառայության որակի հետ կապված խնդիրներ, բարձրացվում էին այն ժամանակ Սահմանադրության բարեփոխումների հետ կապված հարցադրումներ, ամենատարբեր են եղել: Պետք է ասեմ շատ անկաշկանդ, անբռնազբոսիկ քննարկումներ են եղել:
-Իսկ ակումբի անդամներով որտե՞ղ էիք հանդիպում:
-Կառավարության շենքում. կարծեմ՝ վարչապետի աշխատասենյակին կից ինչ-որ… լավ չեմ հիշում:
-Հիմա նոր վարչապետ ունենք, արդյոք նա արդեն որեւէ բան ասել է՝ առաջիկայում պաշտոնաթող վարչապետների հետ հանդիպելու եւ Ձեր կարծիքները, խորհուրդները լսելու մասին:
-Չգիտեմ, կարծում եմ՝ այդ հարցերը իրեն պետք է ուղղեք:
-Դուք, օրինակ, առաջարկով կդիմեք իրեն, որ նախկին վարչապետների ակումբը շարունակի գործել:
-Չէ՛, չէ՛, դա չի կարող որեւէ նախկին վարչապետից եկող առաջարկ լինել, դրա կարիքը պետք է ունենա գործող վարչապետը:
-Ըստ Ձեզ՝ Կարեն Կարապետյանը ունի նախկին վարչապետների խորհուրդների կարիքը:
-Չեմ կարող ասել, չեմ կարող ասել, շատ կներեք, այդ մասին Դուք իրեն պետք է հարցնեք:
-Իսկ եթե լինի հանդիպման առաջարկ, կընդունե՞ք:
-Անկասկած որեւէ տարբերություն չեմ տեսնում:
-Որպես նախկին վարչապետ, ըստ Ձեզ, ի՞նչ պետք է անի Կարեն Կարապետյանը, որպեսզի 5 միլիարդ դոլարի հասնող մեր պետական պարտքը նվազեցնի:
-Նման հարցադրումը անիրատեսական ու անիրականանալի հարցադրումների շարքից է: Կարեն Կարապետյանը այս պահին, այս փուլում ոչ թե կրճատելու է արտաքին պարտքը, այլ ձեւավորելու է նոր կարողությունների հիմքերը, որպեսզի մենք նոր պարտքեր չներգրավենք, իր խնդիրը դա է: Նա չի կարող հենց հիմա կրճատել արտաքին պարտքը, մենք արդեն պարտք ենք եւ ամեն տարի պետք է սպասարկենք այդ պարտքը: Հետեւաբար նրա խնդիրը պետք է լինի` առաջինը փորձել տնտեսական այնպիսի կարողություններ ձեւավորել, որոնք կբարձրացնեն մեր բյուջետային հնարավորությունները արտաքին պարտքը հեշտությամբ սպասարկելու, երկրորդը՝ նոր պարտքեր չվերցնելու համար: Ի դեպ, պետք է ասեմ, որ ինքս հանգիստ եմ նայում արտաքին պարտքի ձեւավորմանը: Խնդիրը պարտք ունենալը կամ չունենալը չի, աշխարհի ամենազարգացած երկրները` Ճապոնիա, Միացյալ Նահանգներ, Ֆրանսիա, Գերմանիա, հսկայական պարտքի ծավալներ ունեն, նույնիսկ երկրներ կան, որ իրենց արտաքին պարտքը կազմում է իրենց համախառն ներքին արդյունքի 100 տոկոսից ավելին` 128 տոկոսը, բայց իրենք ջղաձգումների մեջ չեն ընկնում, որովհետեւ նրանք ունեն կայացած տնտեսություն եւ համոզված են, որ այդ արտաքին պարտքը կարող են հանգիստ սպասարկել:
-Կառավարության նիստում նորանշանակ վարչապետը հրահանգեց վերացնել պրիմիտիվ գողությունը: Ըստ Ձեզ՝ ո՞ւմ նկատի ուներ Կարեն Կարապետյանը՝ գող ասելով: Առհասարակ, Ձեր վարչապետ լինելու տարիների գողեր եղե՞լ են:
-Դա ես ավելի շատ ընկալեցի որպես դարձվածք: Այսինքն՝ երբ որ ասում էր՝ պրիմիտիվ գողություն, նա կոնկրետ նկատի չուներ անձի եւ նկատի չուներ կոնկրետ մեխանիզմ, հավանաբար նա նկատի ուներ բյուջետային ռեսուրսների նպատակային օգտագործումը: Երբ Դուք բյուջետայի ռեսուրսն արդյունավետ չեք օգտագործում, դա հավասար է նրան, որ գողանում են, ինչ տարբերություն, լինելով նախկին վարչապետ՝ ես նրան այդպես եմ հասկացել:
-Այսինքն՝ ՀՀ կառավարությունում գողեր չկա՞ն:
-Չէ, անշուշտ, հավատացնում եմ Ձեզ, այն ընկալումը, որ այնտեղ նստած են մարդիկ, որ ման են գալիս՝ մի հատ սրա-նրա գրպանը մտնեն, իրականում դա այդպես չէ:
ՀՀ նախկին վարչապետ, ԱԺ պատգամավոր Հրանտ Բագրատյան
-Իսկ նորանշանակ վարչապետ Կարեն Կարապետյանը ցանկություն հայտնե՞լ է նախկին վարչապետների, այդ թվում եւ Ձեզ հետ հանդիպելու եւ Ձեր մոտեցումները լսելու մասին:
-Տեղեկություն չունեմ:
Զրուցեց ՔՆԱՐ ՄԱՆՈՒԿՅԱՆԸ
ՈՎՔԵՐ ԵՆ ԿԱՌԱՎԱՐՈՒԹՅԱՆ ՆՈՐԱՆՇԱՆԱԿՆԵՐԸ
Երեկ Կարեն Կարապետյանի կառավարությունը համալրվեց եւս մի քանի նոր անուններով՝ Հրաչյա Ռոստոմյան, Արմեն Ամիրյան, Սուրեն Կարայան եւ Լեւոն Ալթունյան: «Ժողովուրդ»-ը փորձեց պարզել, թե նորանշանակ նախարարներից ով ինչ ճանապարհ է անցել եւ որքանով է «պրոֆեսիոնալ» իր ոլորտում:
Ի տարբերություն մյուս նորանշանակների՝ Հրաչյա Ռոստոմյանն այս պաշտոնը զբաղեցրել է նաեւ 2012-2013 թվականներին: 2013 թվականի նախագահական ընտրություններից հետո, սակայն, անհայտ պատճառներով նա չվերանշանակվեց: Ռոստոմյանին փոխարինեց աշխարհահռչակ մարզիկ, ներկայումս Վրաստանում ՀՀ դեսպան Յուրի Վարդանյանը: Նշենք, որ Հրաչյա Ռոստոմյանը տարբեր տարիներին աշխատել է տարբեր ոլորտներում` ապրանքագետից դառնալով նախարար:
Լեւոն Ալթունյանի նշանակումը առողջապահության նախարարի պաշտոնում անակնկալ չէր, բայց մտածելու տեղիք է տալիս: Ինչպես կարող է ապահովագրության ոլորտում երկար տարիներ աշխատած մասնագետը ղեկավարել առողջապահության համակարգը: Նույն տրամաբանությամբ բժշկականն ավարտած Կարեն Ավագյանին եւս կարող էին նշանակել այս պաշտոնին, առավել եւս, որ նա ՀՀԿ երիտթեւի ներկայացուցիչ է:
Արմեն Ամիրյանի նշանակումը մշակույթի նախարարի պաշտոնում անսպասելի չէր: Ավելին` նման խոսակցություններ էին շրջանառվում դեռ անցյալ տարի: Հայտնի է, որ Արմեն Ամիրյանը մշակույթի ոլորտում է երկար տարիներ եւ, ըստ երեւույթին, ծանոթ է ոլորտում առկա խնդիրներին:Համենայն դեպս, մասնագիտությամբ կենսաբան չէ:
Մինչ ֆինանսների եւ Էկոնոմիկայի նախարարություններն իրարից առանձնացնելը, Սուրեն Կարայանը երկար տարիներ աշխատել է ՀՀ ֆինանսների եւ էկոնոմիկայի նախարարությունում` զբաղեցնելով առաջատար մասնագետից մինչեւ նախարարի առաջին տեղակալի պաշտոնները: Թե նա ինչպես իրեն կդրսեւորի արդեն նախարարի պաշտոնում, ցույց կտա ժամանակը: Կառավարության առաջիկա նիստի օրակարգում արդեն իսկ ներառված են նախագծեր, որոնք ներկայացնելու է նորանշանակ նախարարը:
ՎԱՀԱԳՆ ՀԱԿՈԲՅԱՆ
ԱՎՏՈՄԵՔԵՆԱՆԵՐ՝ ՈՒՍՈՒՑԻՉՆԵՐԻՆ
«Ժողովուրդ»-ը տեղեկացավ, որ այս տարվա «Լավագույն դաստիարակ» եւ «Լավագույն ուսուցիչ» մրցույթների հաղթողներին մեկական ավտոմեքենայով պարգեւատրելու նպատակով կառավարության աշխատակազմին կհատկացվի 10 մլն 400 հազար դրամ: Ի դեպ, յուրաքանչյուր ավտոմեքենայի համար կհատկացվի 5 մլն 200 հազար դրամ: Նշենք, որ արդեն 15-րդ տարին է, ինչ լավագույններին խրախուսելու նպատակով անցկացվում են «Տարվա լավագույն դաստիարակ» եւ «Տարվա լավագույն ուսուցիչ» հանրապետական մրցույթները, որոնց հաղթողները կառավարության կողմից պարգեւատրվում են ավտոմեքենայով: Այս որոշման մասին նախագիծը կառավարության աշխատակազմի ղեկավար-նախարար Դավիթ Հարությունյանը կներկայացնի կառավարության սեպտեմբերի 29-ի նիստին:
ՀԵՂԵՂԱՏԱՐՆԵՐԻ ՄԱՔՐՄԱՆ ԳԻՆԸ
«Ժողովուրդ»-ը պաշտոնական փաստաթղթերից տեղեկացավ, որ Շիրակի մարզպետարանը օգոստոսի 1-ին պայմանագիր է կնքել «Մերձմոսկովյան» ԲԲԸ-ի հետ՝ Արթիկ քաղաքի հեղեղատարների մաքրման աշխատանքների կատարման համար: Դրանց համար Շիրակի մարզպետարանը ընկերությանը վճարել է 15 մլն 707 հազար 996 դրամ: Նույն օրը մարզպետարանը պայմանագիր է կնքել նաեւ «Սվետլանա Դոգուզովա Վլադիմիրի» Ա/Ձ-ի հետ եւ 78 հազար դրամով ձեռք բերել Արթիկի հեղեղատարների մաքրման աշխատանքների հեղինակային հսկողության ծառայություններ: Իսկ, ահա, նույն հեղեղատարների մաքրման աշխատանքների՝ բայց արդեն տեխնիկական հսկողության ծառայությունների համար մարզպետարանին հատկացվել է 157 հազար 500 դրամ: Նշենք, որ այդ աշխատանքների նախագծա-նախահաշվային փաստաթղթերի մշակման համար վճարվել է 825 հազար դրամ: Հիշեցնենք, որ Արթիկում հունիսի 24-ին տեղի ունեցած ուժգին հեղեղի, ջրհեղեղի պատճառով մի քանի տասնյակ բնակիչներ հսկայական վնասներ էին կրել:
ՓՈՂԸ ՎԵՐՋԱՆՈՒՄ Է
Այս պահի դրությամբ Հայաստանի պետական բյուջեում մնացել է ընդամենը 483 միլիարդ 342 միլիոն դրամ: Սա նշանակում է, որ այս տարվա համար նախատեսված պետական բյուջեի միջոցների 77 տոկոսը, կամ նույնն է, թե 959 միլիարդ 420 միլիոն դրամն արդեն իսկ ծախսվել է: Ի դեպ, սպասվում է, որ այս տարվա պետական բյուջեի եկամուտները ծրագրվածից 50-ից մինչեւ 70 միլիարդ դրամով պակաս են լինելու: Ուստի չի բացառվում, որ ՀՀ նոր կառավարությունը որոշ ծախսերի կատարումից կխուսափի՝ դրանք հետաձգելով մինչեւ եկող տարի:
.gif)
