ԼՈՒՐ ԿԱԴՐ

Լուսանկարն արվել է Ազգային Ժողովում

Իհարկե, դժվար է կռահել, թե ինչն է զվարճացրել ՀՀ ԱԺ փոխնախագահ Հերմինե Նաղդալյանին եւ ԱԺ ՀՅԴ խմբակցության ղեկավար Արմեն Ռուստամյանին, բայց լուսանկարը տպավորիչ է ստացվել:

 
ՀԱՐՑ. Խնդրում եմ ասեք` անձը կարո՞ղ է որոշակի տեղեկություններ ստանալ իր վճարած եկամտային հարկի եւ նպատակային սոցիալական վճարի մասին:

Լարիսա Կիրակոսյան (47 տարեկան)

ՊԱՏԱՍԽԱՆ. Այո՛: ՀՀ ԿԱ պետական եկամուտների կոմիտեն (հարկային մարմինը) վարելու է աշխատանքային օրենսգրքով սահմանված կարգով ձեւակերպված աշխատողների եւ նրանց գործատուների, ինչպես նաեւ ինքնազբաղվածների, անհատ ձեռնարկատերերի ու նոտարների կատարած նպատակային սոցիալական վճարի եւ եկամտային հարկի անձնավորված հաշվառում: Յուրաքանչյուր աշխատողի, անհատ ձեռնարկատիրոջ, նոտարի եւ ինքնազբաղվածի համար պետական եկամուտների կոմիտեում բացված է անհատական հաշիվ, որը հիմնված է անձի հանրային ծառայության համարանիշի վրա:
Անձի անհատական հաշվում գրանցվում է, թե որքան է կազմել տվյալ անձի բազային եկամուտը (աշխատավարձը եւ քաղաքացիաիրավական պայմանագրերից ստացվող այլ եկամուտները) հաշվետու ժամանակահատվածում (վարձու աշխատողի համար՝ յուրաքանչյուր ամիս, անհատ ձեռնարկատիրոջ, նոտարի եւ ինքնազբաղվածի համար յուրաքանչյուր տարի), ինչքա՞ն են կազմել եկամտային հարկի եւ նպատակային սոցիալական վճարի գումարները եւ որքա՞ն կուտակային վճար է կատարվել:
Անձնավորված հաշվառման համակարգում ամփոփված տվյալները հասանելի են անհատական հաշվի իրավատիրոջ համար: Նա իր վերաբերյալ տեղեկատվությանը կարող է ծանոթանալ համացանցի օգնությամբ՝ մուտք գործելով անձնավորված հաշվառման համակարգի իր էջը նույնականացման քարտի եւ քարտ կարդացող սարքի միջոցով, կամ կարող է իր անհատական հաշվի գրավոր քաղվածքը պահանջել ՀՀ ԿԱ պետական եկամուտների կոմիտեի տարածքային ստորաբաժանումից: Անհատական հաշվի քաղվածքը տարին մեկ անգամ անձին կտրամադրվի անվճար, իսկ նույն տարվա ընթացքում երկրորդ եւ ավելի անգամ գրավոր տեղեկատվության տրամադրումն անձի համար կլինի վճարովի:
շարունակելի

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Ավելացնենք, որ նպատակային սոցիալական վճարը օրենքով սահմանված կարգով եւ չափով Հայաստանի Հանրապետության պետական բյուջե վճարվող նպատակային վճար է:

 
ՀԱՐՑ. Խնդրում եմ ասեք՝ եթե դիմորդը հարգելի պատճառով չի ներկայացել ընդունելության քննություններին, ապա նրան հնարավորություն տրվո՞ւմ է մեկ այլ օր հանձնել քննություն:

Նելլի Ներսիսյան (29 տարեկան, տնտեսագետ)

ՊԱՏԱՍԽԱՆ. Ն. Ներսիսյանի հարցին ի պատասխան՝ տեղեկացնում ենք, որ քննատախտակով նախատեսված օրն անհարգելի պատճառով քննության չներկայացած դիմորդներին չի թույլատրվում մասնակցել տվյալ առարկայի քննությանը: Հարգելի պատճառով (փաստաթղթով հաստատված) քննության չներկայացած դիմորդներին հնարավորություն է տրվում 5-օրյա ժամկետում այն հանձնել, եթե քննատախտակով տվյալ առարկայի քննությունը չի ավարտվել:

ՀՀ կրթության եւ գիտության նախարարություն

«ԺՈՂՈՎՈՒՐԴ». Տեղեկացնենք, որ 2016 թվականին Հայաստանի Հանրապետության պետական բարձրագույն ուսումնական հաստատություններում 13.787 տեղ է հատկացվել, որոնցից 1783-ը՝ անվճար: Ի դեպ, այս տարի ավելացել է Սյունիքի, Տավուշի մարզերից, ԼՂՀ-ից դիմողների թիվը: Նշենք նաեւ, որ այս տարի 30 քննական կենտրոններ են առանձնացրել՝ 10-ը՝ Երեւանում, 20-ը՝ մարզերում: