Երեւանի Հ. Պարոնյանի անվան երաժշտական կոմեդիայի պետական թատրոնի արտիստուհի, «Արտավազդ» մրցանակաբաշխության շրջանակում այս տարի լավագույն դերասանուհի ճանաչված Ագնեսա Շահնազարյանը նոյեմբերին «Շատերից մեկը» մոնոներկայացմամբ հանդես կգա Գերմանիայում: Նա «Ժողովուրդ»-ին պատմեց իր ստեղծագործական կյանքի ներկայիս փուլի մասին, պատասխանեց երկրպագուներին հուզող այն հարցին, թե արդյոք առաջիկայում մի շարք հեռուստասերիալներից եւ ֆիլմերից հայտնի դերասանուհուն կտեսնենք էկրաններին:
-Ագնեսա՛, թատերական կյանքում ի՞նչ նորություններ ունեք: Գիտենք, որ վերջին շրջանում Ձեր ժամանակի զգալի մասը տրամադրում եք մոնոներկայացումներին:
-Ես շարունակում եմ շրջագայել իմ մոնոներկայացումներով, արտերկրում մասնակցում եմ տարբեր փառատոների: Այդ առումով ստեղծագործական կյանքիս ընթացքից գոհ եմ: Ինձ համար պատվաբեր եւ հաճելի է դրսում ներկայացնել Հայաստանը: Նոյեմբերի 11-19-ը Գերմանիայում մասնակցելու եմ մրցութային փառատոնի, այնտեղ ներկայանալու եմ մայրիկիս` արձակագիր Նելլի Շահնազարյանի «Շատերից մեկը» մոնոներկայացմամբ (Հենց այս գործի համար «Արտավազդ» մրցանակաբաշխության շրջանակում 2016-ին Ագնեսան դարձավ տարվա լավագույն դերասանուհի): Այն տրագիկոմեդիա է «տանը մնացած» աղջկա մասին: Գերմանիայում կմասնակցեմ փառատոնին արդեն երկրորդ անգամ. առաջին անգամ այնտեղ ներկայացել եմ Կարինե Խոդիկյանի «Պենելոպե» պիեսով: Առհասարակ, կարծում եմ` մոնոներկայացումը շատ ծանր, պատասխանատու, բայց, միեւնույն ժամանակ, հետաքրքիր եւ հաճելի ժանր է: Ինձ ուրախացնում է այն հանգամանքը, որ երբ ներկայացումը խաղացած ես լինում դրսում, հայ հանդիսատեսն ավելի շահագրգռված է լինում այն դիտել:
-Կար ժամանակ, երբ հանդես էիք գալիս սերիալներում: Ընդ որում, հեռուստադիտողների կողմից Ձեր կերպարները բավական սիրվել էին: Հիմա նման նախագծերում ընդգրկվելու ցանկություն չունե՞ք:
-Այնպես չէ, որ չեմ ուզում նկարահանվել. իհարկե, ուզում եմ: Բայց դրա համար պետք է համապատասխան դեր առաջարկվի, իմ ուզած մոտեցումը ցուցաբերվի սերիալին: Թող որպես մեծամտություն չհնչի, բայց լուրջ, լավ առաջարկ որպես այդպիսին, դեռ չեմ ստացել, իսկ այդ պարագայում, կարծում եմ, իրավունք չունեմ ներկայանալու հանդիսատեսին: Երբ նշաձողդ հասցնում ես որոշակի բարձրության, այն այլեւս չպետք է իջեցնես: Գումար աշխատելն ու անընդմեջ էկրանին երեւալն անցողիկ են. մնում է արժեքը, որը ստեղծել ես: Հատկապես տարվա լավագույն դերասանուհի ճանաչվելուց հետո ինձ էժան գնահատելու իրավունք է՛լ չունեմ: Խոսքը ֆինանսի մասին չէ, այլ գործի որակի:
-Ստեղծագործական կյանքի այս փուլը ինչպե՞ս կբնութագրեք:
-Ես աշխատող տեսակ եմ, եթե չաշխատեմ, կհիվանդանամ: Հիմա փորձում եմ կայանալ ուրիշ ասպարեզում, ձգտում եմ ինձ ռեալիզացնել ուրիշ գծով: Խոսքը հեռուստատեսային նախագծի մասին է, որի շրջանակում արդեն ես որպես դերասանուհի չեմ ներկայանա: Տեսնեմ` որքանով կստացվի:
-Հնարավո՞ր է` Ձեզ որպես հաղորդավարուհի տեսնենք:
-Ո՛չ, ես ինձ այդ դերում չեմ պատկերացնում: Լինել դերասան դեռ չի նշանակում, որ կարող ես նաեւ հաղորդավարուհի լինել: Ինձ էկրանին դեռ չեք տեսնի:
-Այսինքն` Ձեզ չենք տեսնի, այլ Ձեր կատարած աշխատանքը:
-Այո՛:
-Իսկ գեղարվեստական ֆիլմերից առաջարկներ ունե՞ք:
-Հանդես եմ եկել մի երկու փոքրիկ էպիզոդիկ դերերում, բայց գլխավոր դերում` ոչ: Անկեղծ ասած` այժմ երբ ինձ տեսնում եմ էկրանին, զգում եմ, որ գիրացել եմ, «ֆորմայից» ընկել եմ: Ուստի ոչ ոքի չեմ մեղադրում, որ ինձ քասթինգի չեն հրավիրում: Արտաքինս բարձիթողի վիճակում է… Իմ մասնակցությամբ ֆիլմից մի էպիզոդ նայեցի, ասացի. «Աստված ջան, լավ էլի»: Պետք է փորձեմ շտկել այդ թերությունը:
-Մեր խոսակցությունը սկսեցինք թատրոնով, ավարտենք կրկին թատրոնով: Հայ թատրոնի թիվ մեկ խնդիրն այսօր ո՞րն է:
-Խնդիրը հայ թատրոնինը չէ, այլ պետությանը: Մարդիկ սոցիալական վատ վիճակի մեջ են, հացի խնդիր ունեն լուծելու, թվում է` նրանց աչքին ոչինչ չպետք է երեւա… Եվ, չնայած այդ ամենին, այս խեղճուկրակ ժողովուրդը դեռ այցելում է թատրոն: Ուրեմն անհրաժեշտ է նախեւառաջ լուծել մարդկանց սոցիալական խնդիրները, հետո անցնել մյուս հարցերին…
«ՀԱՅԱՍՏԱՆԻ ՀԵՏ ՊԼԱՆՆԵՐ ՉԵՄ ԿԱՊՈՒՄ»
Երգչուհի Ռիփփին իր երկրպագուներին ուրախացնելու առիթ կունենա. նա աշխատում է փոփ, R&B-փոփ, փոփ-ռոք ոճերի միքսից ծնված նոր երգի վրա: Ռիփփին «Ժողովուրդ»-ին տեղեկացրեց, որ ստեղծագործության երաժշտության հեղինակները Լեւոն եւ Լիլիթ Նավասարդյաններն են, իսկ խոսքերինը` ինքը: Երգը կունենա ե՛ւ հայերեն, ե՛ւ անգլերեն տարբերակներ: Ռիփփիի խոսքով` այն ունի յուրահատուկ թեմատիկա: Երգչուհին, սակայն նախընտրեց դեռեւս փակագծերը չբացել՝ հավելելով միայն, որ երգն անպայման կներկայացվի տեսահոլովակի տեսքով:
Ինչպես հայտնի է՝ Ռիփփին հանդես է գալիս նաեւ որպես դերասանուհի: «Դոմինո» սիթքոմի նոր` երրորդ եթերաշրջանում նրա մարմնավորած կերպարը` Կառան, նոր զարգացում կապրի. «Ասեմ, որ Կառայի անձնական կյանքում փոփոխություններ են տեղի ունեցել: Թե կոնկրետ ինչի մասին է խոսքը, կիմանաք սիթքոմը դիտելուց հետո»,-նշեց նա:
Հիշեցնենք, որ շուրջ մեկ, մեկ ու կես տարի առաջ, երբ Ռիփփին Ռուսաստանի Դաշնությունում էր, «Ժողովուրդ»-ի հետ զրույցում հայտնել էր, որ մտադիր է առաջիկայի իր պլանները կապել այդ երկրի հետ: Նա ապրում եւ աշխատում էր այնտեղ: Բայց, ահա, Հայաստան կատարած վերջին այցը փոխեց բոլոր պլանները:
«Այնպես ստացվեց, որ Հայաստանից մի շարք առաջարկներ ստացա եւ պայմանագրեր կնքեցի: Այդպիսով՝ վերդարձս դեպի Ռուսաստան հետաձգվեց: Այնինչ՝ ես ծրագրել էի Հայաստան գալուց 10 օր անց վերադառնալ ՌԴ: Ընկերներս անընդմեջ զանգահարում են, հարցնում, թե երբ եմ հետ գնալու: Բայց, այնուամենայնիվ, Հայաստանի հետ շատ պլաններ չեմ կապում: Դրսում տրվող հնարավորություններն ավելի մեծ են: Ցավոք, մեր շուկան փոքր է, արտիստների հնարավորությունները` սահմանափակ»,-մեկնաբանեց Ռիփփին:
Հարցին, թե երգչուհին երգո՞ւմ էր Մոսկվայի ակումբներում եւ արդյոք ապագայի իր պլանները կապում է այդ քաղաքի հետ, Ռիփփին պատասխանեց. «Այնտեղ ակումբներում մշտական չէի աշխատում, այլ հանդես էի գալիս որպես հրավիրյալ երգչուհի: Հիմա էլ Մոսկվայի հետ կապված շատ ծրագրեր կան, սակայն մանրամասներ չեմ կարող հայտնել. ապագան դեռ անորոշ է»:
Նյութերը՝ ԱՆՆԱ ԲԱԲԱՋԱՆՅԱՆԻ
ՓԱԿՈՒՄԸ` ԲԱԶՄԱԲԵՐԴՈՒՄ
ՀՀ մշակույթի նախարարության աջակցությամբ` «Սասնա տուն» հասարակության զարգացման աջակցության կենտրոն» ՀԿ-ն 2011 թվականից իրականացնում է «Էպոսյան օրեր» ամենամյա փառատոնը: 2013-ից այն անցկացվում է հանրապետական ձեւաչափով` ընդգրկելով ՀՀ բոլոր մարզերը:
Հոկտեմբերի 9-ին ՀՀ Արագածոտնի մարզի Ներքին Բազմաբերդ համայնքում տեղի կունենա «Սասնա ծռեր» կամ «Սասունցի Դավիթ» էպոսին նվիրված փառատոնի հանդիսավոր փակումը: Միջոցառմանը կպարգեւատրվեն շարադրությունների մրցույթի հաղթողները, կատարումներով հանդես կգան էպոսասացության մրցույթի հաղթողները եւ լավագույն ասացողները, ելույթ կունենան ազգագրական երգ ու պարի խմբեր, անհատ կատարողներ:
ԹԻԿՆԱՊԱ՞ՀՆ Է ԿՈՂՈՊՏԵԼ
Ամերիկահայ հեռուստաաստղ Քիմ Քարդաշյանի կողոպուտի վերաբերյալ օրեցօր նոր վարկածներ են ի հայտ գալիս: Վերջերս Ֆրանսիայի ոստիկանությունը ներկայացրել է երկու կասկածյալների լուսանկարներ: Իսկ որոշ փորձագետներ էլ կատարվածի հարցում ուղղակիորեն մեղադրում են Քարդաշյանի թիկնապահներին: Ավելին` Daily Mail-ի առաջ քաշած վարկածի համաձայն՝ Քարդաշյանի թիկնապահ Պասկալ Դյուվյեն կարող է աստղի կողոպուտի գործում սեփական շահն ունենալ: Բանն այն է, որ Պասկալը, ով անվտանգության ապահովման ProtectSecurity գերմանական ընկերության ղեկավարն ու հիմնադիրն է, ըստ պարբերականի, թաղված է ֆինանսական խնդիրների մեջ. նա սնանկ է` մեկ միլիոն եվրո պարտքով: Երկու ամիս առաջ թիկնապահն այդ մասին հայտարարել էր Գերմանիայի հարկային ծառայությանը: Պարբերականի աղբյուրների փոխանցմամբ` Պասկալը շատ ավելի մեծ պարտքեր ունի, քան հայտարարում է: Իրավաբանները փորձում են պարզել, թե ինչպես է նա մաքրելու վարկատուների հետ իր հաշիվներն այն դեպքում, երբ վերջնաժամկետը հոկտեմբեր 10-ն է:
Հիշեցնենք, որ կողոպուտը տեղի էր ունեցել հոկտեմբերի 3-ի գիշերը, փարիզյան հյուրանոցներից մեկում: Քիմ Քարդաշյանից հափշտակել էին 5-6 միլիոն եվրո արժողությամբ զարդեր, այդ թվում` 4 մլն եվրո գնահատվող մատանի եւ այլ թանկարժեք իրեր:
ԱՅՑԵԼՈՒՄ ԵՆ ՀՈԳԵԲԱՆԻ
Միջազգային լրատվամիջոցները շարունակում են ուշադրության ներքո պահել հոլիվուդյան ամենահայտնի զույգերից մեկի` Բրեդ Փիթի եւ Անջելինա Ջոլիի ամուսնալուծության գործընթացը: People ամսագիրը հայտնում է, որ Ջոլին եւ նրա վեց երեխաները սկսել են այցելել հոգեբանի: Ըստ պարբերականի` դերասանուհին հանուն երեխաների իրեն ուժեղ է պահում:
Հիշեցնենք, որ օրեր առաջ Ջոլին Բրեդ Փիթից բաժանվելու հայց էր ներկայացրել: BBC-ի փոխանցմամբ` նա այդպիսի որոշում է կայացրել «առողջ ընտանիք ունենալու համար»:
.gif)
