ԼՈՒՐ ԿԱԴՐ

Լուսանկարն արվել է Երեւանում

Այս հայտարարության հեղինակը դիմել է հետաքրքիր քայլի. նա փոխանակում է Հայաստանը չլքելու վերջին հույսը աշխատանք գտնելու հույսի հետ: Համաձայնեք, որ աշխատանք գտնելու նորաձեւ տարբերակ է:

 
ՀԱՐՑ. Եթե ՀՀ քաղաքացին բնակվում է այլ պետությունում եւ կորցնում է իր հայաստանյան անձնագիրը, ապա ի՞նչ կարող է անել: Խնդրում եմ ասեք՝ ո՞ւմ պետք է դիմի նա:

Ստելլա Մխոյան (59 տարեկան, տնային տնտեսուհի)

ՊԱՏԱՍԽԱՆ. Ս. Մխոյանի հարցին ի պատասխան՝ տեղեկացնում ենք, որ այլ պետությունում գտնվող Հայաստանի Հանրապետության քաղաքացին անվավեր ճանաչված կամ կորցրած անձնագիրը վերականգնելու համար դիմում է տվյալ երկրում գտնվող ՀՀ դիվանագիտական կամ հյուպատոսական ներկայացուցչություն:
Եթե տվյալ երկրում չկա ՀՀ դիվանագիտական կամ հյուպատոսական ներկայացուցչություն, ապա նա կարող է դիմել հարեւան երկրում գտնվող ներկայացուցչությանը:

Հայաստանի Հանրապետության սփյուռքի նախարարություն

«ԺՈՂՈՎՈՒՐԴ». Ավելացնենք, որ պաշտոնական վիճակագրության համաձայն՝ 2013 եւ 2014 թվականներին Հայաստանից արտագաղթել է (Հայաստանից մեկնել, չի վերադարձել) ընդհանուր 89 հազար 75 ՀՀ քաղաքացի: Այսինքն՝ ստացվում է, որ 2015 թվականին Հայաստանի բնակչության թիվը կազմել է 2 միլիոն 600 հազար մարդ:

 
ՀԱՐՑ. Խնդրում եմ ասեք՝ ովքե՞ր չեն կարող հրաժարվել կուտակային բաղադրիչին մասնակցությունից:

Իրինա Առաքելյան (46 տարեկան)

ՊԱՏԱՍԽԱՆ. Ի Առաքելյանի հարցին ի պատասխան՝ հայտնում ենք, որ սոցիալական վճարներ կատարելուց չեն կարող հրաժարվել՝
1. 1974թ. հունվարի 1-ին եւ դրանից հետո ծնված պետական համակարգի բոլոր վարձու աշխատողները: Ընդ որում, եթե նշված անձինք ընդգրկված են սոցիալական փաթեթի ծրագրում, ապա իրավունք ունեն իրենց սոցիալական փաթեթի գումարը (բացառությամբ առողջապահության փաթեթի համար նախատեսված 52 000 դրամից)՝ որպես սոցիալական վճար, փոխանցել իրենց կենսաթոշակային հաշվին:
2. 2014թ. հուլիսի 1-ից հետո աշխատաշուկա մուտք գործած, 1974թ. հունվարի 1-ին եւ դրանից հետո ծնված բոլոր անձինք, ովքեր 2014թ. հուլիսի 1-ի դրությամբ չեն աշխատել:
Եթե անձը ծնվել է 1996 թվականի հունվարի 1-ին կամ դրանից հետո եւ 2014թ. հուլիսի 1-ից հետո մուտք է գործում աշխատաշուկա (2014թ. հուլիսի 1-ի դրությամբ չի աշխատել), ապա նրա կողմից վճարվող սոցիալական վճարի գումարը, մինչեւ 2017թ. հուլիսի 1-ը, նվազեցվելու է մասնակցի եկամտային հարկի գումարից:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Տեղեկացնենք, որ զինծառայողները եւ զինծառայողներին հավասարեցված անձինք (ՀՀ զինված ուժերի ծառայողները, ոստիկանները, ՀՀ ազգային անվտանգության ծառայության ծառայողները, հարկադիր կատարողները, քրեակատարողական ծառայողները, փրկարարական ծառայության ծառայողները)՝ անկախ տարիքից, կուտակային բաղադրիչի պարտադիր մասնակիցներ չեն: Կուտակային բաղադրիչի շրջանակներում ձեւավորվող կենսաթոշակի չափը կախված է կուտակած միջոցների չափից, ինչն էլ իր հերթին, ի թիվս այլ գործոնների, պայմանավորված է անձի կողմից կուտակելու ժամանակահատվածով: