Մարդիկ վախենում էին խոստովանել, որ պատրաստվում են քվեարկել Թրամփի օգտին. քաղաքագետ

Հանրապետական կուսակցությունից ԱՄՆ նախագահի թեկնածու Դոնալդ Թրամփը հաղթանակ տարավ նախագահական մրցավազքում: Սա բավականին անսպասելի հաղթանակ էր շատերի համար:

ArmLur.am-ն այս առնչությամբ զրուցեց քաղաքագետ Հայկ Մարտիրոսյանի հետ, ով անցած մեր հարցազրույցում նշել էր, որ  Հիլարի Քլինթոնի  հաղթելու հավանականությունն  ավելի մեծ է, քան Թրամփինը:

«Ակնհայտորեն այսպես ստացվեց, քանի որ  ընտրողների մեծամասնությունը անկեղծ չէր հարցումների ժամանակ, որովհետև Թրամփի օգտին քվեարկելու հետ կապված լուրջ ստիգմա կար, և մարդիկ վախենում էին խոստովանել, որ պատրաստվում են քվեարկել Թրամփի օգտին»,-ասաց նա:

Քաղաքագետի կարծիքով՝  երբ ընտրախցում մնացին միայնակ իրենց քվեի հետ կատարեցին իրենց ընտրությունը: Եվ փաստորեն, տիրում էր այդպես քաղաքականապես կոռեկտ մի խաբկանք, որ Թրամփը այնքան էլ պոպուլյար  չէ  և ամերիկացիների մեծամասնությունը չի ընտրի նրան:

Հայկ Մարտիրոսյանի խորին համոզմամբ՝ սա մեծագույն անակնկալ էր  հենց իր` Թրամփի համար. « Իսկ ինչ վերաբերում էր Հայաստանի հետ խնդրին, ապա չգիտեմ, տեսնենք, թե ինչպիսին կլինի Թրամփի նախագահությունը Հայաստանի համար, բայց հստակ կարելի է վերապահորեն պնդել, որ Հիլարի Քլինթոնն ընտրվեց կործանարար նախագահ»:

Նրա հավելմամբ՝ սա այն պարագան է, որտեղ «Անփորձ մածունը փորձված թանից վատ է , որովհետև փորձված թանն ակնհայտորեն խիստ թթված էր»: Թրամփն ունի մեկ առավելություն, քանի որ նա բավական անկախ է հանդես եկել, իր քարոզարշավի զգալի մասը ֆինանսավորել է անձամբ: Եվ որոշակիորեն կոնֆլիկտ  ունի Հանրապետական կուսակցության ներսում, որը նշանակում է, որ լինելով Հանրապետականների թեկնածու, այնուամենայնիվ Հանրապետականների բոլոր ճնշումներին չէ, որ նա ենթարկվելու է: Իսկ դա արդեն լավ հանգամանք է:

«Ցավոք սրտի այս ընտրությունների արդյունքում ամենամեծ մեղավորները հենց իրենք՝ դեմոկրատներն են, որոնք իրենց լավագույն թեկնածուին դուրս թողեցին ընտրապայքարից անազնիվ կերպով  և ամեն կերպ բոլոր ռեսուրսները նետեցին խիստ վարկաբեկված և աննախադեպ սկանադալների մեջ ներքաշված մի անձի, որը հույս ունեին՝  հսկայական վարչական մեքենայով կկարողանան անցկացնել: Սակայն, դեմոկրատները, որոնք շատ ավելի կառուցողական  են, քան հանրապետականները, գործեցին մեծագույն սխալ դրանով և հուսով եմ, որ հաջորդ անգամ դասեր կքաղեն»,- եզրափակեց նա:

Լիդա Եղիազարյան