«Էրեխեքս ջուխտ-ջուխտ փակված են, ո՞նց պետք է լինի: Արարատիս դատի ժամանակ մենակ հեռվից տեսա»: Այս մասին ArmLur.am-ի հետ զրույցում հայտնեց «Սասնա ծռեր» խմբավորման անդամ, Արցախյան պատերազմի մասնակից Արայիկ Խանդոյանի մայրը՝ տիկին Ռիման:
ArmLur.am-ը տիկին Ռիմայից հետաքրքրվեց, թե ինչո՞վ է ապրում, ո՞վ է հոգ տանում իր մասին, ինչպես ինքն է ասում. « Տան տղամարդիկ չկան»: Վերջինս մեզ հետ զրույցում նշեց, որ այն ժամանակ դեռ մեկ-մեկ օգնում էին, բայց հիմա դադարել են. «Արդեն մարդիկ էլ են հոգնել: Վառելիք էլ չկա, հիմի արդեն շատ քիչ ցան ա մնացել: Ուտելիքն էլ մեր բոստանի կարտոշկով յոլա ենք էրթում էլի»:
Խանդոյանների մոր խոսքով՝ Արայիկի ընտանիքն ապրում է Երևանում, առանց աշխատանքի:
Հիշեցնենք` Արայիկ Խանդոյանին մեղադրանք է առաջադրվել ՀՀ քրեական օրենսգքրի 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք զինամթերք ձեռք բերելը, իրացնելը, պահելը, փոխադրելը) և լրացվել էր՝ ՀՀ ՔՕ 238-րդ հոդվածի 4-րդ մաս՝ զենք, զինամթերք հափշտակելը:
Իսկ Արարատ Խանդոյանը մեղադրվում է 2016 թվականի հուլիսի 20-ին զանգվածային անկարգությունների ընթացքում բռնություն գործադրելու ոստիկանության աշխատակիցների նկատմամբ` ձեռքերով եւ ոտքերով հարվածներ հասցրնելու իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել եւ փորձել է խլել ոստիկանության ծառայողի վահանը:
Լիդա Եղիազարյան
.gif)
