ԼՈՒՐ ԿԱԴՐ

Լուսանկարն արվել է մայրաքաղաքում

Այս մեքենայի վարորդը հնարամիտ քայլի է դիմել. նա իր մեքենայի պետհամարանիշը թղթով փակել է եւ անկաշկանդ վարում է՝ հաշվի չառնելով անգամ կարմիր լույսի առկայությունը:

 
ՀԱՐՑ. Ես ուզում եմ իմանալ, թե ո՞վ կարող է լինել ՀՀ երկքաղաքացի: Ի՞նչ իրավունքներ ունի ՀՀ երկքաղաքացին:

Ելենա Փանոսյան (46 տարեկան, տնային տնտեսուհի)

ՊԱՏԱՍԽԱՆ. Հայտնում ենք, որ ՀՀ երկքաղաքացին համարվում է այն անձը, որը, ՀՀ քաղաքացիությունից բացի, ունի նաեւ այլ պետության (երկրների) քաղաքացիություն: ՀՀ երկքաղաքացին ՀՀ-ի համար ճանաչվում է միայն որպես ՀՀ քաղաքացի: Սույն նորմը տարածվում է նաեւ 1995թ. հունվարի 1-ից հետո առանց սահմանված կարգի ՀՀ քաղաքացիությունից դուրս գալու, այլ պետության քաղաքացիություն ընդունած կամ ստացած, ինչպես նաեւ ՀՀ քաղաքացիությունից միակողմանի հրաժարված ՀՀ քաղաքացիների վրա: ՀՀ երկքաղաքացին ունի ՀՀ քաղաքացու համար նախատեսված բոլոր իրավունքները եւ կրում է ՀՀ քաղաքացու համար նախատեսված բոլոր պարտականություններն ու պատասխանատվությունը՝ բացառությամբ Հայաստանի Հանրապետության միջազգային պայմանագրերով կամ օրենքով նախատեսված դեպքերի:

«Ձեր իրավախորհրդատու» փաստաբանական ընկերություն

«ԺՈՂՈՎՈՒՐԴ». Ավելացնենք, որ ՀՀ քաղաքացին այլ պետության քաղաքացիություն ընդունելու կամ ստանալու դեպքում պարտավոր է այդ մասին ՀՀ կառավարության սահմանած կարգով, մեկամսյա ժամկետում հայտնել ՀՀ ոստիկանության ԱՎ վարչություն կամ ՀՀ ոստիկանության տարածքային ստորաբաժանումներին, իսկ օտարերկրյա պետություններում՝ գործող ՀՀ դիվանագիտական ծառայության մարմիններին:

 
ՀԱՐՑ. Ես ուզում եմ իմանալ՝ որոնք են ՀՀ-ում օտարերկրյա որակավորումների ճանաչումն իրականացնող մարմինները: Եվ խնդրում եմ ասեք, թե ի՞նչ փաստաթղթեր են անհրաժեշտ որակավորումների ճանաչման համար:

Նշան Պետրոսյան (47 տարեկան)

ՊԱՏԱՍԽԱՆ. Տեղեկացնում ենք, որ օտարերկրյա որակավորումների ճանաչումն իրականացվում է տարբեր մարմինների կողմից՝ ակադեմիական կամ մասնագիտական գործունեություն ծավալելու համար, ակադեմիական փոխճանաչման եւ շարժունության ազգային տեղեկատվական կենտրոնի (ԱՓՇԱՏԿ), բարձրագույն ուսումնական հաստատությունների եւ մասնագիտական մարմինների կողմից, որոնք պատասխանատու են տվյալ ոլորտի համար:
Հայտնում ենք, որ կրթական փաստաթղթի գնահատման համար անհրաժեշտ է ներկայացնել՝
1. Անձնագրի կամ նույնականացման քարտի պատճեն:
2. Կրթությունը հաստատող փաստաթուղթ (բնօրինակ եւ/կամ նոտարի կողմից վավերացված թարգմանություն):
3. Կրթությունը հաստատող փաստաթղթի ներդիր, հավելված կամ այլ նմանատիպ փաստաթուղթ, որոնցում նշված են կրթական ծրագրի մանրամասները՝ ուսումնական վերջնարդյունքներ, կրեդիտներ, գնահատականներ, ավարտական պահանջներ եւ այլն (բնօրինակ եւ/կամ նոտարի կողմից վավերացված թարգմանություն):
4. Այլ տիպի ապացույցներ, այդ թվում՝ նախորդ կրթությունը հավաստող փաստաթղթեր, մասնագիտական գործունեություն ծավալելու թույլտվություն, աշխատանքային փորձը հաստատող փաստաթղթեր:
5. Վճարման անդորրագիր:

Հայաստանի Հանրապետության կրթության եւ գիտության նախարարություն

«ԺՈՂՈՎՈՒՐԴ». Ավելացնենք, որ օտարերկրացիների ուսուցումը, հեռացումը (ազատումը) եւ վերականգնումը, շարժունությունն իրականացվում են Հայաստանի Հանրապետությունում գործող կարգերին համապատասխան: Ուսանողների հեռացման (ազատման) եւ շարժունության մասին տեղեկություններն ուսումնական հաստատությունները ներկայացնում են նախարարություն՝ համապատասխան որոշում ընդունելուց հետո, երկշաբաթյա ժամկետում: