Բա շնորհակալությունը, որ լինի թանկարժեք վիսկի, ո՞նց ենք մուտք անելու. Արարատ Մկրտչյանը՝ բժիշկներին ապօրինի տրվող գումարները լեգալացնելու մասին

ՀՀ առողջապահության նախարարությունը մոտ ժամանակներս հանդես կգա մի նախաձեռնությամբ, որը կլեգալացնի բժշկին որպես շնորհակալություն գումար տալը։ Այս մասին ասել էր առողջապահության նախարար Լեւոն Ալթունյանը:

«Մարդը, եթե ուզում է շնորհակալություն հայտնել բժշկին, հայտնի այդ շնորհակալությունը դրամարկղի միջոցով, և այդ գումարը 10 կամ 15 տոկոս հարկումից հետո լիովին հասնի բժշկին»,- ասել էր նա:

ArmLur.am-ն այս և այլ հարցերի շուրջ զրուցեց ՀՀ առողջապահության նախկին նախարար Արարատ Մկրտչյանի հետ: Վերջինս նշեց, որ սա ուղղակի մեկնաբանության ենթակա չէ. «Վճարովի ծառայություններ են ամրագրված երկրում, պետության կողմից երաշխավորված անվճար բուժօգնություն, որի համար պետությունն է վճարում: Ունենք վճարովի ծառայություններ, որի համար վճարում է քաղաքացին, եթե  ընդգրկված չի  ծրագրային դրույթներ, որոնք ամրագրված են տվյալ տարվա բյուջեում, ուրեմն ՝ դա գնում է վճարովի ծառայությունների համակարգ»:

Ըստ նախկին նախարարի՝ շնորհակալությունը մեկնաբանում են, որպես «ստվեր», իսկ դա լեգալացնելու համար ներ են դրել վճարովի ծառայությունների համակարգ:

«Դա անհասկանալի է, հիմա կլինի երեք-չորս աղբյուր: Ունենք երկրում պետական պատվեր, վճարովի ծառայություններ, բուժծառայությունների փոխհատուցումներ, հիմա էլ չորրորդ աղբյո՞ւրն ենք մոգոնում: Բա շնորհակալությունը, որ լինի օրինակ ՝ թանկարժեք վիսկի, դա ո՞նց ենք մուտք անելու դրամարկղ, դա էլ է չէ՞ շնորհակալություն: Ամբողջ բաժանմունքի բժիշկներին, որպես հիվանդ՝  կարող եմ շնորհակալություն հայտնել վարչապետի «Ֆլորենց» ռեստորանում, պատիվ տալ, դա էլ է չէ՞ շնորհակալություն: Ո՞նց դրա 10-15%  ուղարկենք»:

Արարատ Մկրտչյանի կարծիքով ՝ ՀՀ առողջապահության նախարարը փորձում է նախընտրական ինչ-որ ականջահաճո բաներ անել. «ՀՀԿ է դառել նորաթուխ: Ընդունելի է բոլոր ձևակերպումները: Փորձենք ըմբռնումով մոտենալ»:

Լիդա Եղիազարյան