Ամենամյա, գունեղ այս միջոցառումը՝ Համահայկական նկարչական մրցույթը, աշխարհով մեկ սփռված հայ երիտասարդներին հնարավորություն է տալիս միավորվելու և բնապահպանությանն առնչվող իրենց պատկերացումներն ու մտահոգություններն արտահայտելու նկարների միջոցով: Արդյունքում՝ բնապահպանական խնդիրները գույն ու բովանդակություն են ստանում և դառնում առավել ազդեցիկ ու սթափեցնող: Արդեն 9 տարի մրցույթի մասնակիցները պայքարի իրենց ձայնը լսելի են դարձնում ներկերի լեզվով:
Վայրի բնության և մշակութային արժեքների պահպանման հիմնադրամը (FPWC) և ՎիվաՍել-ՄՏՍ-ն ամփոփել են Համահայկական նկարչական 9-րդ մրցույթի արդյունքները։ Այս անգամ մրցույթին ներկայացված է եղել ավելի քան 600 նկար։ Հայաստանի և Սփյուռքի 5-16 տարեկան երեխաներ ու պատանիներ դրանց միջոցով պատկերել են բնության և շրջակա միջավայրի մասին իրենց մտորումները: Հայտարարված 3 անվանակարգում մրցանակ է ստացել 12 պատանի:
«Բնապահպանական պայքարի այն տարբերակը, որն ընտրել են մրցույթի մասնակիցները՝ յուրահատուկ է և արդյունավետ: Այստեղ դժգոհությունն արտահայտվում է լուռ, բայց՝ դիպուկ: Աղաղակում է ոչ թե մարդու խոսքը, այլ՝ բնությունն ինքը: Յուրաքանչյուր մասնակից դառնում է իր իսկ նկարով բարձրացրած հարցի պատասխանը կրողը՝ պարտավորվելով հետագայում ուշադիր լինել շրջակա միջավայրի պահպանության հարցում: Կրթվում է մի ամբողջ սերունդ, որն առավել քան կարևոր է»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Վայրի բնության և մշակութային արժեքների պահպանման հիմնադրամ-ՎիվաՍել-ՄՏՍ համագործակցության և «Արևորդի» էկո-ակումբների հիմնադրման 10-ամյակի կապակցությամբ ՎիվաՍել-ՄՏՍ-ի գլխավոր տնօրենին շնորհվել է «Կայուն մոլորակ» մրցանակը:
Համահայկական նկարչական 9-րդ մրցույթում հայտարարված թեմաներն են եղել՝
· Եթե բնությունը խոսեր
· Բույսերին՝ կյանք, մեզ՝ թթվածին
· Երկրագունդն առանց մեզ
«Այս տարի լրանում է «Արևորդի» էկո-ակումբների հիմնադրման և FPWC–ՎիվաՍել-ՄՏՍ համագործակցության 10-ամյակը: Միասին անցած ճանապարհը լի էր ձեռքբերումներով, արդյունքները՝ շոշափելի։ Բայցի այն, որ «Արևորդի» էկո-ակուբների հազարավոր սաներ Հայաստանի բոլոր մարզերից բնապահպանական կրթություն ստացան, ակումբներն առանցքային դեր ունեցան նաև նրանց մասնագիտական կողմնորոշման հարցում։ Շատերը նույնիսկ իրենց համար բացահայտեցին արտերկրում ուսանելու հնարավորություններ և այս պահին էլ ձեռնամուխ են լինում իրենց երազանքների իրականացմանը։ Էկո-ակուբներում արևորդիները ձևավորեցին և զարգացրեցին էկոլոգիական մտածողություն, որն անկախ մասնագիտությունից՝ ամբողջ կյանքում կուղեկցի նրանց։ Սա է հայրենիքի, շրջապատի ու մոլորակի համար պատասխանատու քաղաքացու մեր տեսլականը»,- ասել է Վայրի բնության և մշակութային արժեքների պահպանման հիմնադրամի հիմնադիր Ռուբեն Խաչատրյանը:
Ժյուրիի անդամներ՝
Սամվել Վանոյան- դիզայներ
Սամվել Սաղաթելյան- նկարիչ
Նունե Սարուխանյան-«Կանաչ արահետ» ՀԿ նախագահ
Մրցանակակիրներ՝
«Եթե բնությունը խոսեր» անվանակարգում
5- 8 տարիքային խումբ- Սոնա Սմբատյան – 7տ, Երևան
9- 12 տարիքային խումբ- Սոֆի Ղարիբյան – 12 տ, Ուրցաձոր (Արարատի մարզ)
13- 16 տարիքային խումբ- Արտակ Սարգսյան -13 տ, Երևան,
Խրախուսական մրցանակ- Մարի Զոհրաբյան – 7տ, Այնթապ (Արարատի մարզ)
«Բույսերին՝ կյանք, մեզ՝ թթվածին» անվանակարգում
5 – 8 տարիքային խումբ- Հերմինե Օհանջանյան – 8տ, Մասիս (Արարատի մարզ)
9 – 12 տարիքային խումբ- Ջուլիետա Ադամյան-11տ, Երևան,
13 – 16 տարիքային խումբ- Մելինե Գալոյան – 14 տ, Մեծամոր (Արմավիրի մարզ)
Խրախուսական մրցանակ- Աննա Աստվածատրյան- 9տ, Երևան
«Երկրագունդն առանց մեզ» անվանակարգում
5 – 8 տարիքային խումբ- Միլենա Պողոսյան – 7տ, Պտղունք (Արմավիրի մարզ)
9 – 12 տարիքային խումբ- Սուրեն Օրդյան – 11տ, Մասիս (Արարատի մարզ)
13 – 16 տարիքային խումբ- Լիլի Հովհաննիսյան – 14տ, Դիլիջան ( Տավուշի մարզ)
Խրախուսական մրցանակ- Մխիթար Հովհաննիսյան – 6տ, Երևան
.gif)
