Armlur.am-ին նոր մանրամասներ են հայտնի դարձել Վանաձորում երեկ՝ դեկտեմբերի 15-ին, 27-ամյա երիտասարդի սպանության փորձից: Լոռու մարզի մեր թղթակցի փոխանցմամբ, ժամը 24:00-ի սահմաններում մեքենայով Վանաձորի բժշկական կենտրոն է տեղափոխվել 27-ամյա երիտասարդ, ով պարանոցի շրջանում ունեցել է հրազենային ծանր վիրավորում: Հիվանդանոցից անմիջապես զանգահարել են ոստիկանություն: Պարզվել է, որ դեպքը տեղի է ունեցել Վանաձորի «Դիմաց» թաղամասում: Իրավապահները դեպքի վայրում հայտնաբերել են պարկուճներ: Պարզվել է, որ հրազենային վիրավորում ստացած տղան Վանաձոր քաղաքի բնակիչ, 27-ամյա Դավիթ Քոչարյանն է:
ՀՀ քննչական կոմիտեից Armlur.am-ին հայտնեցին, որ դեպքի առթիվ հարուցվել է քրեական գործ ՀՀ քր.օր.-ի 34/104 և 235 հոդվածի հատկանիշներով: Վանաձորի բժշկական կենտրոնից մեզ հայտնեցին, որ երիտասարդ տղայի վիճակը գնահատվում է ծայրահեղ ծանր: Մեր տեղեկություններով՝ գնդակը մտել է տղայի ողնաշարը: Բժիշկներին չի հաջողվում դուրս բերել փամփուշտը, տղան կյանքի ու մահու պայքար է տանում ներկայումս:
Է.Արզումանյան
Վանաձոր
.gif)
