Տարվա մշակութային և հակամշակութային իրադարձությունները` ըստ մշակույթի գործիչների

2016 թվականը` իր մատուցած անակնկալներով, փորձություններով, մտահոգիչ, ցավալի իրադարձություններով ու ոգեւորիչ պահերով, ընդամենը մի քանի օրից կմնա անցյալում: Տեղին կլինի, եթե փորձենք հետադարձ հայացք նետել եւ ամփոփել 2016-ը` համապատասխան դասեր քաղելով գալիք տարվա համար:  «Ժողովուրդ»-ը զրուցել է մշակույթի գործիչներից մի քանիսի` երգիչ, երգահան Էդուարդ Զորիկյանի, գրող, գրականագետ Հովիկ Չարխչյանի, Հայաստանի ազգային ֆիլհարմոնիկ նվագախմբի դիրիժոր Էդուարդ Թոփչյանի եւ Հայաստանի հեռուստատեսության եւ ռադիոյի էստրադային-սիմֆոնիկ նվագախմբի գեղարվեստական ղեկավար եւ գլխավոր դիրիժոր Երվանդ Երզնկյանի հետ:

-Տարվա մշակութային իրադարձությունը:

Էդուարդ Զորիկյան-Չեմ մտաբերում:

Հովիկ Չարչյան-Ես ոչ թե կոնկրետ իրադարձություն կնշեմ, այլ կարձանագրեմ, որ աճել է մարդկանց, հատկապես` երիտասարդների հետաքրքրությունը գրքի նկատմամբ: Մի քանի առիթով նկատեցինք, որ դրական միտում կա: Դա ամբողջ տարվա ընթացքում եղել է միակ ոգեւորիչ հանգամանքը:

Էդուարդ Թոփչյան-Չեմ կարող ասել. եթե ասեմ, գուցե վերագրեմ մեր գործունեությանը եւ սուբյեկտիվ պատասխան ստացվի:

Երվանդ Երզնկյան-Ինձ համար դա մեր Կոմպոզիտորների միության եւ Ռուսաստանի հայերի միության կազմակերպած հայրենասիրական երգի մրցույթի շրջանակում որպես կոմպոզիտոր մրցույթի հաղթող ճանաչվելն էր, ինչպես նաեւ այն հանգամանքը, որ մրցույթի ընթացքում հանդես եկավ մեր նվագախումբը:

-Տարվա հակամշակութային իրադարձությունը:

Էդուարդ Զորիկյան-Հայաստանում ռուսերենը պետական երկրորդ լեզու ճանաչելու վերաբերյալ խոսակցությունների շրջանառությունը:

Հովիկ Չարխչյան-Մշակութային արժեքների ինտենսիվ ոչնչացումը: Այդ պրոցեսը կարծես ոչ մի կերպ դադար առնել չի պատրաստվում:

Էդուարդ Թոփչյան-Չեմ մտածել այդ ուղղությամբ:

Երվանդ Երզնկյան-Արտառոց բան չեմ նկատել:

Աննա Բաբաջանյան