Շնորհավոր Ամանոր եւ Սուրբ Ծնունդ

Թագուհի Թովմասյան
2016 թվականը, ցավոք, կորուստների տարի էր. ունեցանք զոհեր ու վիրավորներ երկրի ներսում եւ սահմանին (ապրիլյան պատերազմի, ոստիկանության գնդի գրավման օրերին): Թե ինչ հետեւություններ արեց գործող իշխանությունը, դժվար է միանշանակ ասել, բայց կուզեմ, որ 2017 թվականին սպասվող ներքաղաքական լարված փորձություններից անցնցում դուրս գանք, եւ խաղաղություն լինի ինչպես երկրի ներսում, այնպես էլ սահմանին: Պետք է իշխանական էլիտան տուրք չտա խարդավանքներին ու պետական մտածելակերպ ձեւավորի: Միասնականությունն այլընտրանք չունի: Շռայլելու ժամանակներն անցել են:

Արեւիկ Սահակյան
2017թ.-ի ամենակարեւոր մաղթանքը՝ խաղաղություն. թող որ գալիք տարում մեր զինվորների մայրերը միայն ուրախության արտասուքներ հեղեն: Հաջորդիվ՝ մեզ բոլորիս մաղթում եմ լավատեսություն. թող որ գալիք տարում ավելի շատ կարողանանք գնահատել լավն ու չհուսահատվել վատից:

 
Աննա Բաբաջանյան
Ինչպես ամեն տարվա, 2017-ի հետ էլ կապում եմ նորանոր հույսեր: Բայց որպեսզի այդ հույսերը լինեն արդարացված, ես՝ որպես մշակութային լրագրող եւ պարզապես քաղաքացի, ցանկանում եմ ունենալ երաշխիքներ: Ուզում եմ, որ իմ երկրում մշակույթին չվերաբերվեն որպես բիզնես ոլորտի, որ մտավորականը լինի ժողովրդի խոսափողը, իսկ ինտելեկտն ու բարեխղճությունը` հաջողության անցաթուղթ:

Նարեկ Սարգսյան
Թող այս Նոր տարին խաղաղություն, լավ գաղափարների իրականացում եւ լավատեսություն բերի, որը մեզ ամենաշատն է պակասում:

Քրիստինե Պողոսյան
Շնորհավորում եմ «Ժողովուրդ» օրաթերթի եւ ողջ հայության Ամանորը: Հաղթանակների եւ նվաճումների տարի եմ մաղթում բոլորին:

Նաիրա Հովհաննիսյան
2016 թվականը լի էր փորձություններով: Թող որ 2017 թվականը լինի միայն ձեռքբերումների տարի, եւ ետեւում մնան բոլոր տխրությունները, որոնք եղան 2016-ին: Ամենակարեւորը, թող սահմանին միշտ խաղաղություն լինի: Ինձ համար անցնող տարվա գլխավոր մարդը հայ զինվորն է:

 
Սյունէ Համբարձումյան
Շնորհավոր Ամանոր եւ Սուրբ Ծնունդ, 2017 թվականից միայն լավ սպասումներով… Ու թող մեր յուրաքանչյուր նախաձեռնություն արժանանա նախեւառաջ Աստծո հավանությանը:

Արփինե Թովմասյան
Թող այս տարի մարդիկ միայն բարությամբ լցվեն… Ցավալի է զգալ չար մարդկանց ներկայությունը…: Անսպառ ժպիտներ բոլորիս…

 
Քնար Մանուկյան
Ուզում եմ Հայրենիքիս բոլոր մանուկները ապրեն անհոգ մանկություն, տատիկներն ու պապիկները՝ արժանավայել ծերություն, իսկ Հայրենքիս սահմանը պահող զինվորը միշտ հիշի, որ ինքը հաղթել ու հաղթելու է:

Տաթեւ Հարությունյան
Հայաստանի Հանրապետության սիրելի՛ քաղաքացի, թող որ անցնող տարում արտագաղթելու Ձեր նպատակներն ու ծրագրերն ի չիք դառնան, եւ գալիք տարին մեր երկրում արարելու եւ ապրելու ցանկությամբ լի տարի լինի: Նորաստեղծ կառավարության հետ առաջացած հույսի նշույլն ավելի մեծանա, եւ բոլոր սպասելիքներն իրականություն դառնան: Շնորհավոր նոր` 2017 թվական:

Էդվարդ Արզումանյան
Թող գալիք տարին հաջողության ու նպատակների իրականացման տարի լինի: Ու թող պետությունը առավել քան ուշադրություն դարձնի մարզերում բնակվողներիս խնդիրներին ու հոգսերին:

Վահագն Հակոբյան
Սիրելի՛ հայրենակիցներ, ահա եւս մեկ տարի մոտեցավ ավարտին` իր ձեռքբերումներով եւ բացթողումներով, իր բացասական եւ դրական կողմերով: Շնորհավորելով ձեզ գալիք Ամանորի եւ Սուրբ Ծնունդի կապակցությամբ` ցանկանում եմ առողջություն եւ 2017 թվականի մարտահրավերներին դիմագրավելու համար անսասան ոգի:

Գոհար Գեւորգյան
Եթե ընտանիքում խաղաղ են ու երջանիկ, դու էլ ես երջանիկ, եթե տունդ լուսավոր է ու ապահով, դու էլ ես ապահով: Մեր մեծ ընտանիքը Հայաստանն է: Խաղաղություն, լույս, ջերմություն, ի՛մ Հայաստան, սիրելի՛ հայեր, համբերատա՛ր մայրեր եւ մեզ պահապան, արիասի՛րտ զինվորներ: Շնորհավոր:

Հովսեփ Հովսեփյան
Այս գալիք Նոր տարում բոլորին թող ուղեկցի հաղթանակը, թող բոլոր խնդիրները մնան անցյալում, թող այս Ամանորը լինի ուրախ եւ հրաշքներով լի…: Շնորհավոր Նոր տարի:

Լիդա Եղիազարյան
2016 թվականը դժվար տարի էր մեզ՝ հայերիս համար: Այս տարի Հայաստանում բազմաթիվ իրադարձություններ եղան՝ ապրիլյան պատերազմ, ոստիկանության պարեկային գնդի գրավում, կառավարության փոփոխություն: Այս փոփոխությունների հետ մեկտեղ ցանկանում եմ 2017թ-ին ազգիս գլխից արհավիրքներն անհետ վերանան: Խաղաղություն մեզ բոլորիս:

Ոսկան Սարգսյան
Սահմանամերձ, գեղատեսիլ Տավուշից Ամանորի լուսավոր առիթով բարեմաղթում եմ մեր հայրենիքի սահմաններին խաղաղություն, ժողովրդին՝ առողջություն, բարի աշխատանք, ընտանեկան երջանկություն: Պաշտոնյաներին համեստություն եմ մաղթում, որ իջնեն բարձր աթոռներից եւ կանգնեն հասարակ մարդկանց կողքին, նրանց հոգսերին կարեկից լինեն:

Լիաննա Խաչատրյան
Թող տարվա սկիզբն ազդարարող ժամացույցի զարկերի հետ մեր բոլորի ընտանիքներում լույս ու բարություն տիրի: Թող ամեն ընտանիքում մանկան ճիչեր լսվեն, իսկ ժպիտները չպակասեն մեր բոլորի դեմքերից: Շնորհավոր Ամանոր եւ Սուրբ Ծնունդ:

Նատալյա Պողոսյան
Շնորհավորում եմ հայ ժողովրդի Ամանորը: Թող 2017-ը լինի խաղաղության, ձեռքբերումների եւ զարգացումների տարի: Թող հայ մանուկի եւ հայ զինվորի աչքերը միշտ փայլեն:

Անուշիկ Խաչատրյան
Գալիք տարին մանուկներին անհոգություն, տարեցներին առողջություն, մեր սահմաններին էլ կայունություն թող բերի: Խաղաղություն ամենեցուն: Շնորհավոր Ամանոր եւ Սուրբ Ծնունդ: