Հարուցվել է քրեական գործ՝ ազատամարտիկի մահվան դեպքի առթիվ

ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից ArmLur.am-ը տեղեկանում է, որ ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում հարուցվել է քրեական գործ՝ Ռազմիկ Ֆառաշյանի մահվան դեպքի առթիվ։

2017 թվականի հունվարի 25-ին Դավթաշեն 2-րդ թաղամասի 39-րդ շենքի բնակչից ահազանգ է ստացվել առ այն, որ հարևան բնակարանի ապակիները կոտրված են, իսկ հարևանն ընկած է գետնին:

Անմիջապես դեպքի վայր է մեկնել քննչական-օպերատիվ խումբ՝ Աջափնյակ և Դավթաշեն վարչական շրջանների քննչական բաժնի պետի գլխավորությամբ։ Բնակարանի փակ տնտեսական պատշգամբում հայտնաբերվել է նույն տան բնակիչ Ռազմիկ Ռուբենի Ֆառաշյանի դին` բազմաթիվ բեկորային մարմնական վնասվածքներով:

Հարուցվել է քրեական գործ՝ ՀՀ քրեական օրենսգրքի 235-րդ հոդվածի 1-ին մասով և ՀՀ քրեական օրենսգրքի 110-րդ հոդվածի 1-ին մասով:

Ձեռնարկվում են անհրաժեշտ քննչական գործողություններ՝ դեպքի բոլոր հանգամանքները պարզելու համար։

Լուսանկարը` shamshyan.com-ի: