ԼՈՒՐ ԿԱԴՐ

Լուսանկարը՝ համացանցից

Երեկ ՀՀ ԿԱ ՊԵԿ-ը ստուգումներ է սկսել ՀՀԿ-ական Արտակ Սարգսյանին պատկանող «Սաս» սուպերմարկետների ցանցում: Հետաքրքիր է՝ հենց այս ժամանակաշրջանում նման ստուգումներն ինչ նպատակ են հեդապնդում, հատկապես որ «Սաս»-ի Արտակը պատգամավոր դառնալու մեծ «ախորժակ» ունի:

 
ՀԱՐՑ. Ես ուզում եմ իմանալ՝ ո՞վ կարող է համարվել արվեստագետ: Եվ խնդրում եմ ասեք, թե ի՞նչ կրթություն պետք է ունենա վերջինս:

Սերգեյ Այունց (81 տարեկան, թոշակառու)

ՊԱՏԱՍԽԱՆ. Հայտնում ենք, որ Հայաստանի Հանրապետության օրենսդրությամբ արվեստագետ կոչվելու համար չափորոշիչներ կամ այլ պահանջներ սահմանված չեն, ուստի արվեստագետ, անկախ կրթությունից, կարող է համարվել արվեստի բնագավառում ստեղծագործական գործունեությամբ զբաղվող յուրաքանչյուր անձ, ում ստեղծագործությունները հանրության կողմից սիրված եւ ճանաչված են:

Հայաստանի Հանրապետության մշակույթի նախարարի տեղակալ Արթուր Պողոսյան

«ԺՈՂՈՎՈՒՐԴ». Արվեստագիտություն նշանակում է արվեստը ուսումնասիրող հասարակական գիտությունների համալիր: Արվեստագիտություն է գրականագիտությունը, երաժշտագիտությունը, թատերագիտությունը, կինոգիտությունը, ինչպես եւ տարածական արվեստները (ճարտարապետություն, գեղանկարչություն, քանդակագործություն, գրաֆիկա, դեկորատիվ կիրառական արվեստ եւ այլն) ուսումնասիրող գիտությունները:

 
ՀԱՐՑ. Ես առաջին կարգի հաշմանդամ եմ: Կինս նույնպես հաշմանդամ է՝ 3-րդ կարգի: Ուզում եմ իմանալ՝ այս դեպքում մենք կարո՞ղ ենք օգտվել կոմունալ վճարումների որոշակի արտոնություններից, օրինակ՝ գազի, ջրի էլէկտրաէներգիայի վճարների:

Վանուշ Հարությունյան (65 տարեկան, 1-ին կարգի հաշմանդամ)

ՊԱՏԱՍԽԱՆ. ՀՀ կառավարության 2016թ. նոյեմբերի 3-ի «Սոցիալապես անապահով ընտանիքների կողմից սպառվող բնական գազի եւ էլեկտրական էներգիայի սակագների նվազմանն ուղղված միջոցառումների մասին» N 1122-Ն որոշման (այսուհետ՝ Որոշում) իմաստով սոցիալապես անապահով ընտանիքներ են համարվում ընտանիքների անապահովության գնահատման համակարգում հաշվառված անապահովության «20.00» միավորից բարձր անապահովության միավոր ունեցող ընտանիքները:
ՀՀ հանրային ծառայությունները կարգավորող հանձնաժողովին առաջարկվել է բնական գազի եւ էլեկտրական էներգիայի սակագները սահմանելիս Որոշման իմաստով սահմանված սոցիալապես անապահով ընտանիքներին դիտարկել որպես առանձին սպառողական խումբ՝ վերջիններիս կողմից սպառվող բնական գազի եւ էլեկտրական էներգիայի համար սահմանելով հնարավոր նվազ սակագներ: Եթե քաղաքացու ընտանիքը հաշվառված է ընտանիքների անապահովության գնահատման համակարգում եւ ունի «20.00» միավորից բարձր անապահովության միավոր, ապա կօգտվի բնական գազի եւ էլեկտրական էներգիայի համար սահմանվող հնարավոր նվազ սակագներից:
Առավել մանրամասն տեղեկություններ ստանալու համար քաղաքացին կարող է դիմել փաստացի բնակության վայրի սոցիալական աջակցության տարածքային բաժին:

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Տեղեկացնենք, որ 2017թ. փետրվարի 1-ից բնակչության համար էլեկտրաէներգիայի սակագինը կնվազի 1 դրամ 22 լումայով: 0,38 կՎ եւ ցածր լարմամբ սնվող սպառողների, այդ թվում՝ բնակչության համար ցերեկային սակագինը 1 կվտ-ի համար կդառնա 44 դրամ 98 լումա, գիշերայինը՝ 34 դրամ 98 լումա: Իսկ սոցիալապես անապահով ընտանիք համարվող սպառողների համար ցերեկային սակագինը կսահմանվի 40 դրամ/կՎտժ, գիշերայինը՝ 30 դրամ: