«ՍԴՀԿ-Ի ՀԵՏ ՈՉ ՄԻ ԽՆԴԻՐ ՉՈՒՆԵՆՔ»

Հայաստանի «Ռամկավար ազատական կուսակցությունը» բանակցություններ է վարում տարբեր քաղաքական ուժերի, այդ թվում նաեւ քաղաքականություն վերադարձած Գագիկ Ծառուկյանի հետ՝ «Ծառուկյան» դաշինքին միանալու համար: Նույն դաշինքին է արդեն միացել «Սոցիալ-դեմոկրատ հնչակյան» կուսակցությունը: Հետաքրքիր է, թե ինչպես են պատկերացնում այս երկու ուժերն իրենց համագործակցությունը՝ հաշվի առնելով առկա տարաձայնությունները: «Ժողովուրդ» օրաթերթի զրուցակիցը ՀՌԱԿ ատենապետ Հակոբ Ավետիքյանն է:

-Պարո՛ն Ավետիքյան, հայտարարել եք, որ բանակցություններ եք վարում «Ծառուկյան» դաշինքի հետ: Ինչո՞ւ հենց «Ծառուկյան» դաշինք:
-Ոչ միայն «Ծառուկյան» դաշինք: Շփումների մեջ ենք տարբեր կազմակերպությունների հետ: Նայում ենք՝ ինչ են անում, ինչպիսին են յուրաքանչյուրի հնարավորությունները, այդ թվում նաեւ «Ծառուկյան» դաշինքի կարելիությունները, հնարավորությունները: Հիմա այս ամբողջը իմի ենք բերելու, ուրբաթ օրը՝ մեր վարչության ամբողջական նիստի ժամանակ, պետք է իմի բերենք՝ այս մեկը այսպես է անում, այն մեկը այնպես է անում, մենք ինչ պետք է անենք, դա պետք է որոշվի: Մեր կուսակցությունը մարդ-կուսակցություն չէ, երկու հոգանոց կուսակցություն չէ, եւ մենք, քանի որ կոչվում ենք ե՛ւ դեմոկրատ, ե՛ւ լիբերալ, ուրեմն նաեւ առաջինը պետք է հարգենք այդ ամբողջը: Դա իմ ցանկությամբ չէ միայն, իհարկե, ես որպես ատենապետ պետք է վարչության անդամներին ներկայացնեմ ամեն ինչ: Վերջնական որոշումը պետք է վարչությունը կայացնի մեծամասնության ձայնով:
-Այնուամենայնիվ, այս պահին ո՞ր քաղաքական ուժի հետ եք հակված դաշինք կազմել:
-Ասեմ, որ այնքան էլ հեշտ չէ դա, քանի որ տեսնում ենք, որ յուրաքանչյուր ուժ ունի իր առավելությունները, իր թերություններն էլ: Ամբողջ սրտով մի դաշինքի մաս կազմելու խնդիր չեմ տեսնում այս պահին: Ասենք՝ «Ծառուկյան» դաշինքի մասին ես ասել եմ, որ այնտեղ տարբեր գաղափարախոսական ուժեր կան:
-Որեւէ դաշինքի հետ համագործակցության դեպքում չի՞ լինում գաղափարական միասնություն…
-Չի լինում: Ինչքան որ մենք հանդիպումներ ունեցանք, տարբեր մտածողության, տարբեր գաղափարախոսության կրողներից բաղկացած խմբավորումներ են:
-Այդ դեպքում ինչպե՞ս եք պատկերացնում համագործակցությունը տարբեր գաղափներ ունեցող ուժերի հետ:
-Ես չեմ խոսում մեր կուսակցության մասին, ընդհանրապես եմ խոսում, ուրեմն ինձ մի մեջբերեք ՀՌԱԿ-ի խոսք ասող, այստեղ ես խոսում եմ որպես անհատ, լրագրող, չգիտեմ՝ քաղաքական գործերին որոշակիորեն ծանոթ մարդ: Եթե գաղափարախոսական նույնություն չկա կամ նմանություն, մոտիկություն, կնշանակի դուռը բաց են թողնում այդ խմբավորումները գործնամտության առաջ: Եւ սա լավ կյանքից չէ: Ավելի ճիշտ կլիներ, որ գաղափարախոսական նույնականություն լիներ, չկա: Եւ սա ասեմ ոչ միայն այս նորակազմ դաշինքների մասին: Բոլորը ասում են՝ զարգացնենք Հայաստանը, տնտեսությունը այսպես լինի, վերացնենք աղքատությունը, ո՞վ չի ասում, բոլորը առանց բացառության նույնն են ասում, դա գաղափարախոսություն չէ: Թե ոնց պետք է անել այդ ամբողջը՝ այ, դա է:
-Ո՞ր քաղաքական ուժին եք Ձեզ գաղափարակից համարում:
-Մեզ գաղափարակից ավելի շատ մարդիկ են, քան կուսակցություններ:
-Հնարավոր է՝ միանաք «Ծառուկյան» դաշինքին, բայց չէ որ այդ դաշինքին է միացել «Սոցիալ-դեմոկրատ հնչակյան կուսակցությունը», որի հետ ՀՌԱԿ-ը տարաձայնություններ է ունեցել:
-Մենք տարաձայնություններ չունենք, բացարձակապես սխալ է: ՍԴՀԿ-ի հետ մենք ունենք երկար տարիների /սփյուռքի մասին է խոսքը/ համագործակցություն, բայց գաղափարապես նույնական չենք, բացարձակապես: Հենց «Ռամկավար ազատական կուսակցության» 21 թվականի կազմության մեջ վերակազմյալ հնչակյաններ կային: Ինչու բաժանվեցին մայր կուսակցությունից, ասացին՝ սոցիալիզմի ժամանակը չէ: Ազատագրենք Հայաստանը, որից հետո կմտածենք՝ ինչ գաղափարախոսություն ունենանք, դրանք էլ գործնական մարդիկ էին, նրանց հետ ոչ մի խնդիր չունենք, ուղղակի տարբեր են գաղափարախոսությունները:
-Կարծում եմ՝ նորություն ասած չեմ լինի, եթե նշեմ, որ երկար ժամանակ ՀՌԱԿ-ը հովանավորել է Արա Աբրահամյանը, այնուհետեւ նախկին վարչապետ Տիգրան Սարգսյանը: Արդյո՞ք կուսակցությունն այլեւս հովանավոր չունենալու հետեւանքով առաջացած ֆինանսական խնդիրների պատճառով է որոշել ընտրություններին դաշինքով մասնակցել:
-Ձեր հարցին այսպես պատասխանեմ. կուսակցությունն այսօր առանձին ներկայանալու հնարավորություններ չունի: Այսինքն՝ դա նշանակում է հարյուր հազար ձայն բերել: Այդ հնարավորությունը չունի: Իսկ ժամանակին, երբ Արա Աբրահամյանը օգնել է, մենք այդ ժամանակ բավական ուժեղ էինք եւ կարողացանք /եթե մեր հավաքած ձայները կուլ չտային/ նվաճել ինչ-որ բան: Իսկ ինչ վերաբերում է Տիգրան Սարգսյանին, մեզ բացարձակապես նյութական եւ այլ կարգի օգնություն չի տվել: Նա անընդհատ քաջալերել է կուսակցության գործունեությունը այն ուղղությամբ, որ կուսակցությունը մեկ միավոր կազմի՝ նկատի ունենալով հատկապես սփյուռքը: Այսինքն՝ սփյուռքում պետք է լինի ուժեղ եւ իր գործնական դերը կատարի ամբողջ հանրության համախմբման գործում, սա է եղել իր կեցվածքը, որն ինձ համար շատ-շատ ընդունելի գաղափար է:

 
ՊԱՏԳԱՄԱՎՈՐՆ ԸՆԴԴԵՄ «ԳՅՈՒՄՐԵՑՈՒ ՈԳՈՒ». ՄԵՆԱՄԱՐՏԻ ԱՌԱՋԻՆ ՌԱՈՒՆԴԸ

Ինչպես հայտնի է՝ «Հայկական վերածնունդ» կուսակցության անդամ, ԱԺ ՕԵԿ խմբակցության պատգամավոր Հովհաննես Մարգարյանը դատական հայց է ներկայացրել «Գյումրեցու ոգի» կուսակցության դեմ, որի ղեկավարը Սահակ Սահրադյանն է: Պատճառը 2016 թվականի սեպտեմբերի 30-ին Գյումրու տեղական երեք հեռուստաընկերություններով հեռարձակված «Ճանաչիր» վերնագրով տեսանյութն է:

Գյումրիի ավագանու ընտրությունների քարոզարշավի վերջին օրը Հոհաննես Մարգարյանի դեմ հեռարձակված այդ հակաքարոզչական տեսանյութում նշվում է, թե Մարգարյանը կապ ունի հայտնի «կաթի փոշու» պատմության հետ։ Տեսանյութում ասվում է, որ այդ փոշին Գյումրի է բերվել որպես հումանիտար օգնություն 88-ի երկրաշարժից հետո. «Գյումրեցի Մարգարյանը գողանում էր սոցիալական ծանր պայմաններում ապրող համաքաղաքացիների հասանելիքն ու գերշահույթ ստանում: Հրուշակեղենի գործարանի տնօրենը պարտավոր էր օգնություն ստացած կաթի փոշին կիրառել մանկապարտեզներին, դպրոցներին տրվելիք թխվածքաբլիթների ու այլ քաղցրավենիքների պատրաստման համար, բայց նա առանց վարանելու վաճառում էր օգնություն ստացածը»,- նշվում է տեսանյութում:
Հունվարի 24-ին Շիրակի մարզի ընդհանուր իրավասության դատարանում դատավոր Հայկանուշ Միքայելյանի նախագահությամբ տեղի է ունեցել Հովհաննես Մարգարյանն ընդդեմ «Գյումրեցու ոգի» կուսակցության դատական առաջին նիստը:
«Դատական նիստը նորմալ ընթացավ: Դիմել են դատարան միջնորդությամբ, որ հետաձգվի առաջին նիստը, որպեսզի փաստաբանները կարողանան ծանոթանալ հայցադիմումին: Իմ փաստաբանները միջնորդել են դատարանին, որ մինչեւ փետրվարի 8-ը տա ժամանակ, որպեսզի ծանոթանան մեր հայցադիմումին: Միջնորդությունը եղել է հետեւյալը, որ հաջորդ անգամ դատական նիստը չհետաձգվի այդ միջնորդությամբ, որ տանեն, ծանոթանան անկախ նրանից, թե մյուս փաստաբանները ծանոթացել են, թե ոչ, որովհետեւ այդտեղ տեխնիկական խնդիր է, եւ յուրաքանչյուր փաստաբան կարող է մի քանի շաբաթ պահանջի հետաձգել, որ ինքն էլ ծանոթանա»,-«Ժողովուրդ»-ի հետ զրույցում նշեց պատգամավորը:
Մենք զրուցեցինք նաեւ պատասխանող կողմի հետ: «Ես հեռուստաընկերություններին ընդամենը տրամադրել եմ, ես ինքս հաղորդումները չեմ սարքել, կարծում եմ, որ նախընտրական շրջանն այն հատվածն է, որ ժամանակին տեղի ունեցած իրադարձություն է, եւ հանրությունը իրավունք ունի իմանալու»,-նշեց Սահակ Սահրադյանը: Նրա կարծիքով՝ ցանկացած մարդ էլ իրավունք ունի տեսանյութում ներկայացվածը հերքելու. «Այնպես որ, արդարադատությունը նրա համար է, քաղաքացիական արդարադատությունը տվյալ դեպքում, որ դատարանը պարզի՝ արդյոք վիրավորանքի, զրպարտանքի էլեմենտ կա, թե ընդամենը քաղաքական պայքարի սովորական դրսեւորումներից է: Որովհետեւ եթե հասնենք նրան, որ ով ինչ ասում է, դրա դիմաց հայց լինի, կարծում եմ՝ քաղաքական գործունեությունը Հայաստանում պետք է դատարանի շենքում տեղի ունենա»,- նկատեց Սահրադյանը:

Նյութերը՝ ՎԱՀԱԳՆ ՀԱԿՈԲՅԱՆԻ

 
ԿՀԵՌԱՑՆԵ՞Ն, ԹԵ՞ ԿՀԵՌԱՆԱ
Վարդան Օսկանյանի «Համախմբում» կուսակցությունում ԱԺ ընտրությունների նախաշեմին ներկուսակցական լուրջ խմորումներ են սկսվել: «Համախմբման» վարչության անդամներից նախկին ՄԻՊ Կարեն Անդրեասյանը նախօրեին տարածած հայտարարությամբ իր անհամաձայնությունն է հայտնել կուսակցության կողմից ընտրված դաշինքի կազմին եւ անընդունելի համարել, որ դաշինքը գլխավորի Սեյրան Օհանյանը: Երեկ նրան պատասխանել է կուսակցության մամլո խոսնակ Արեգնազ Մանուկյանը՝ հայտարարելով. «Պարզապես զարմանալին այն է, որ այն հիմնավորումները, որոնք նա բերում է Սեյրան Օհանյանի հետ համագործակցության հնարավոր հեռանկարի վերաբերյալ, չեն համապատասխանում իրականությանը, քանի որ կուսակցության ներսում թիմակիցների հետ քննարկման ընթացքում Անդրեասյանի բարձրացրած միակ հարցը կրել է մասնավոր, անձնական բնույթ եւ որեւէ գաղափարական, քաղաքական, աշխարհաքաղաքական հենք չունի»: Արդյո՞ք այդքանից հետո Անդրեասյանին կհեռացնեն կուսակցությունից. «Ժողովուրդ»-ի հարցին ի պատասխան՝ «Համախմբում» կուսակցության խոսնակը նշեց. «Այս պահին այդ հայտարությունն ենք անում, եւ լրացուցիչ ոչ մի բան այդ թեմայով չեմ ուզում ասել, որովհետեւ համարում եմ թեման փակված»: «Ժողովուրդ»-ի տեղեկություններով՝ չի բացառվում, որ առաջիկայում Անդրեասյանը, այնուամենայնիվ, դուրս գա կուսակցությունից, քանի որ նրա պահանջը` իրեն Օսկանյանից հետո ընտրացուցակում դնելու մասով, չի բավարարվելու:

ԲԱՆԱԿՑՈՒՄ ԵՆ
«Ժառանգություն» կուսակցությունն այդպես էլ չի որոշել՝ ինչ ձեւաչափով է մասնակցելու առաջիկա խորհրդարանական ընտրություններին: «Ո՛չ, ո՛չ, ո՛չ»,- այսպես արձագանքեց այդ կուսակցության փոխնախագահ Արմեն Մարտիրոսյանը՝ պատասխանելով «Ժողովուրդ»-ի հարցին՝ արդեն հստակեցրե՞լ եք, թե ում հետ եք մասնակցելու առաջիկա ընտրություններին: Մարտիրոսյանը միաժամանակ դժվարացավ ասել՝ երբ կկայացնեն իրենց որոշումը: Իսկ թե ո՞ր ուժերի հետ են իրենք բանակցություններ վարում, կուսակցության փոխնախագահը նշեց. «Բոլորի հետ, բացի Հովիկ Աբրահամյանից»: Մարտիրոսյանը նաեւ կարծիք հայտնեց, որ Հ. Աբրահամյանը ՀՀԿ-ից դուրս գալուց հետո որեւէ մեկին չի միանա: «Որեւէ դաշինք չի ուզի այդպիսի խորը հարված վերցնել իր վրա»,- ասաց նա:

ՍԵՓԱԿԱՆ ԶԵՆՔՈՎ
Երեկ Հայաստանի N զորամասի պահպանության տակ գտնվող մարտական դիրքում հայտնաբերել էին պարտադիր ժամկետային զինծառայող Շավարշ Գալստյանի դին: Կատարվածից հետո ՔԿ-ում հարուցվել է քրեական գործ ՀՀ քրեական օրենսգրքի 110-րդ հոդվածի 1-ին մասով (ինքնասպանության հասցնել), կատարվում է նախաքննություն: «Ժողովուրդ»-ին հայտնի դարձավ, որ նախնական տվյալներով՝ ժամկետային զինծառայող Շավարշ Գալստյանը մահացու վիրավորումը ստացել էր իրեն ամրակցված զենքից: Ինքնասպանությո՞ւն է եղել կատարվածը, թե՞ զենքի հետ անզգույշ վարվելու հետեւանք, առայժմ հայտնի չէ: