«Ժողովրդական կուսակցության» նախագահ Տիգրան Կարապետյանը դեռևս շարունակում է մնալ այն կարծիքին, որ Գագիկ Ծառուկյանի և Սեյրան Օհանյանի շուրջ ձևավորվող դաշինքները պետք է միանան: Սակայն, եթե նույնիսկ դա տեղի չունենա, ArmLur.am-ի հետ զրույցում նա վստահեցրեց, որ կշարունակի մնալ Սեյրան Օհանյանի դաշինքի կողքին, որին միանալու մասին հայտարարել էր:
– Պարո’ն Կարապետյան, ինչո՞ւ ի վերջո որոշեցիք միանալ Սեյրան Օհանյանի շուրջ ձևավորված դաշինքին:
– Ես վաղուց եմ միացել Սեյրան Օհանյանին, համակրում եմ այդ մարդուն, համարում եմ` ազնիվ, հերոս մարդ է:
– Բայց նրան շատ են քննադատում` ասելով, թե երկար տարիներ պաշտոն է զբաղեցրել, սակայն միայն հիմա է բարձրաձայնում խնդիրների մասին:
-Մեզ մոտ բոլորն են պաշտոն զբաղեցրել, բացի ինձանից: Մեկին ասեք, որ չի զբաղեցրել: Րաֆֆի Հովհաննիսյանը նախարար է եղել, նախագահ կա, վարչապետ կա, ինչ անենք:
– Բայց պաշտոն զբաղեցնելով լռել է, հիմա է խոսում:
– Բա ով խոսի, իշխանությունից են գալիս ընդդիմություն, որովհետև տեսնում են, թե համակարգում ինչ է կատարվում:
– Դուք միանշանակ կո՞ղմ եք, որ հենց Օհանյանը գլխավորի դաշինքը:
– Այո, լիդեր լինի, առաջնորդ:
– Բայց «Համախմբում»-ում, օրինակ Կարեն Անդրեասյանը դեմ է:
– էտ իրա գործն է, մեծամասնութունը կողմ է:
– Պարոն Կարապետյան, դուք հաշվարկե՞լ եք, թե որքան ձայն կարող եք ապահովել այս ընտրություններում:
– Մենք ձայն ունենք, ես տենց բաներ, թվաբանություն ժողովրդի վրա չեմ խաղում: Այո’, շատ են ձայները:
– Նախորդ ընտրությունների՞ց եք այդպիսի եզրակացության եկել:
– Ինչի, միշտ էլ ձայն եմ ունեցել:
– Իսկ Ձեր կուսակցությունով կարողանալո՞ւ եք վերահսկել ընտրությունների ընթացքը: Ունե՞ք այդքան ռեսուրս:
– Մեր կուսակցությունը չի կարող հսկել ամեն տեղ, բայց դաշինքը կարող է: Դաշինքն ունի, ինչու չունի:
Զրուցեց Նաիրա Հովհաննիսյանը
.gif)
