ԼՈՒՐ ԿԱԴՐ

Լուսանկարն արվել է Աբովյան փողոցում

Այս մեծ ջրափոսերը, որոնք առաջացել են առատ ձյան հետեւանքով, անանցանելի են դարձրել հետիոտների համար նախատեսված անցումը: Այս հատվածով ոչ ոք ի վիճակի չէ քայլել:

 
ՀԱՐՑ. Եղբայրս իր ընտանիքով բնակվում է ՀՀ-ից դուրս (ՌԴ-ում): Վերջերս նրանք ձեռք են բերել Ռուսաստանի քաղաքացիություն, սակայն ՀՀ համապատասխան կառույցներին չեն հայտնել այլ պետության քաղաքացիություն ձեռք բերելու փաստը: Հիմա նրանք մտադիր են գալ Հայաստան: Խնդրում եմ ասեք՝ հնարավո՞ր է՝ նրանք ենթարկվեն որեւէ պատասխանատվության այն բանի համար, որ չեն տեղեկացրել իրենց քաղաքացիության մասին:

Անահիտ Պողոսյան (46 տարեկան, դաստիարակ)

ՊԱՏԱՍԽԱՆ. Հայտնում ենք, որ այլ պետության քաղաքացիություն ընդունելու կամ ստանալու դեպքում օրենքով սահմանված ժամկետում Հայաստանի Հանրապետության կառավարության լիազոր մարմնին չհայտնելը ՀՀ այն քաղաքացու կողմից, որը հավակնում է այնպիսի պաշտոն զբաղեցնել, որը զբաղեցնելն օրենքով արգելված է այլ պետության քաղաքացի հանդիսացող ՀՀ քաղաքացիներին, ինչպես նաեւ այն պաշտոնատար անձի կողմից, որն օրենքի համաձայն չէր կարող լինել նաեւ այլ պետության քաղաքացի, պատժվում է ազատազրկմամբ երեքից հինգ տարի ժամկետով՝ զրկվելով որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից՝ առավելագույնը երեք տարի ժամկետով կամ առանց դրա:

ՀՀ միգրացիոն պետական ծառայություն

«ԺՈՂՈՎՈՒՐԴ». Նշենք, որ ՀՀ երկքաղաքացին ունի ՀՀ քաղաքացու համար նախատեսված բոլոր իրավունքները եւ կրում է ՀՀ քաղաքացու համար նախատեսված բոլոր պարտականություններն ու պատասխանատվությունը՝ բացառությամբ ՀՀ միջազգային պայմանագրերով կամ օրենքով նախատեսված դեպքերի:

 
ՀԱՐՑ. Ես ունեմ ավանդ իմ անունով: 2015 թվականից որպես ավանդատու հաշվառվել եմ մեր տարածքային սոցիալական բաժնում: Իմ հերթական համարը 12.510-ն է: Խնդրում եմ ասեք՝ ես ե՞րբ եմ ստանալու իմ գումարը:

Առաքելյան Գալյա (Բաղրամյան 1 փակուղի)

ՊԱՏԱՍԽԱՆ. Գալյա Առաքելյանը կարգով սահմանված նորմերին համապատասխան՝ որպես դրամական ավանդների դիմաց փոխհատուցում ստանալու իրավունք ունեցող անձ, 2015 թվականի հուլիսին հաշվառվել է ավանդների փոխհատուցման ծրագրում (սոցիալական աջակցության կենտրոնի տարածքային բաժնում) եւ տարեցների ընդհանուր ցուցակում ձեռք բերել 12.510 հերթական համարը: Իր հերթական համարին համապատասխան՝ 2016 թվականի նոյեմբերի վճարման ցուցակներով Գ. Առաքելյանը ստացել է փոխհատուցման գումար՝ 4061 խորհրդային ռուբլու դիմաց 160625 ՀՀ դրամ:
Տեղեկացնում եմ, որ հաշվառված ավանդատուների փոխհատուցման վճարումներն իրականացվում են ամսական պարբերականությամբ՝ ՀՀ պետական բյուջեով ավանդների փոխհատուցման վճարման համար նախատեսված ֆինանսական միջոցների եռամսյակային համամասնություններին համապատասխան:
2016 թվականի դեկտեմբերի վճարման ցուցակներում ընդգրկվել են մինչեւ 13.184 հերթական համարն ունեցող տարեցները:

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Տեղեկացնենք, որ եթե ավանդատուի ամուսինը մահացած է, եւ մահացած ամուսնու անունով ներդրված ավանդը ներդրվել է նրանց համատեղ ամուսնական կյանքի ընթացքում, ապա մահացած ամուսնու ավանդի 50 տոկոսի դիմաց ողջ ամուսնու համար փոխհատուցում ստանալու իրավունքը ճանաչվում է որպես ավանդի նկատմամբ մահացածի հետ ընդհանուր համատեղ սեփականության իրավունք: Ավանդատուների հաշվառման, ինչպես նաեւ փոխհատուցման վճարման կազմակերպման աշխատանքներն իրականացնում են համալիր սոցիալական ծառայությունների տարածքային կենտրոնները կամ սոցիալական ծառայություններ տրամադրող տարածքային մարմինները (այսուհետ՝ տարածքային մարմին):