ԾԻԾԱՂՈՒՄ Է ՆԱ, ՈՎ ՎԵՐՋԻՆՆ Է ԾԻԾԱՂՈՒՄ

Փետրվարի 4-ին Հ3-ի ուղիղ եթերում «Հայկական վերածնունդ» կուսակցության նախագահ Արթուր Բաղդասարյանը պատասխանում էր հեռուստադիտողների հարցերին, որի ժամանակ հետաքրքիր միջադեպ տեղի ունեցավ: Ստուդիա զանգահարած մի պապիկ նշեց, թե երեք հարց ունի, բայց Սերժ Սարգսյանի անունը քննադատաբար հնչեցնելուց հետո Արթուր Բաղդասարյանի խիստ հայացքի ներքո նրա ձայնը լռեց: Ինչո՞ւ անջատեցին Սերժ Սարգսյանին ֆաշիստ անվանած քաղաքացու ձայնը, եւ ի՞նչ էր սպառնում հեռուստաընկերությանը, եթե քաղաքացին շարունակեր տալ իր հարցերը. «Ժողովուրդ»-ի զրուցակիցը ԱԺ ՕԵԿ խմբակցության ղեկավար Հեղինե Բիշարյանն է:

-Տիկի՛ն Բիշարյան, նախօրեին Արթուր Բաղդասարյանն ուղիղ եթերում տհաճ իրավիճակում հայտնվեց. ստուդիա զանգահարած քաղաքացին Սերժ Սարգսյանին ֆաշիստ անվանեց, ինչից հետո նրա ձայնը կորավ, եւ Բաղդասարյանին երեք հարց ուղղելու ցանկություն ունեցող տարեց հեռուստադիտողն այդպես էլ զրկվեց անգամ մեկ հարց տալու հնարավորությունից: Ի՞նչն էր պատճառը:
-Գիտեք ինչ, հարց տալը դեռ չի նշանակում, որ հարցազրույցի ժամանակ ինչ-որ բան է տեղի ունեցել, սա մեկ, երկրորդը՝ բոլորիս է հայտնի, որ մեր երկրում կան սոցիալական լուրջ խնդիրներ, եւ, այո, քաղաքացիները կարող են զայրույթն արտահայտել իրենց ցանկացած ձեւակերպումով, այնպես որ, դա ո՛չ առաջին անգամն է, ո՛չ վերջին, ո՛չ էլ մեզ համար անհայտ ինչ-որ երեւույթ է: Բնականաբար, ցանկացած քաղաքացի, ելնելով սոցիալական անարդարությունից, ինչի մեջ ապրում է այսօր ազգը, իր զայրույթն ինչ-որ ձեւով պետք է հայտնի: Դա նորմալ երեւույթ է:
-Այդ դեպքում ինչո՞ւ քաղաքացուն թույլ չտրվեց իր զայրույթը ուղիղ եթերով արտահայտել, ինչը, ըստ Ձեզ, նորմալ է: Եթե նա շարունակեր նմանատիպ արտահայտություններ անել Սերժ Սարգսյանի հասցեին, ի՞նչ կլիներ, Հ3 հեռուստաընկերությունը կփակվե՞ր, որ անջատեցին եւ թույլ չտվեցին քաղաքացին ավարտեր իր հարցերը:
-Ես Ձեզ հետ համաձայն չեմ, որ այնտեղ անջատվել է որեւէ բան, սա մեկ, երկրորդը՝ անկախ նրանից՝ քաղաքացին մեկ անգամ է ասել այդ բառը, թե երեք անգամ է ասել կամ վեց անգամ, արդեն հնչել է նման արտահայտություն: Այնպես որ, սա սովորական երեւույթ է, եւ դա դարձնել մատի փաթաթան այն դեպքում, որ Դուք, որպես լրատվամիջոցներ, ամեն օր տարբեր հոդվածներով տարբեր քաղաքացիների տեսակետներն ու մոտեցումներն ընդգրկում եք, եւ ամեն օր սայթերում, այսպես ասած, լիքն են նման որակումներ բարձրաստիճան պաշտոնյաների նկատմամբ: Եւ, ընդհանրապես, այսօր խոսքի այնպիսի ազատություն կա, որ պետք չէ կաշկանդվել նման արտահայտությամբ:
-Իրավացի եք, մենք թույլ ենք տալիս, որ քաղաքացիներն ազատ արտահայտեն իրենց մտքերը, իսկ, այ, Հ3-ի ուղիղ եթերի ժամանակ քաղաքացուն նման հնարավորություն չտրվեց. նրա ձայնն ուղղակի անջատեցին:
-Դուք ուղղակի Ձեր հարցադրման մեջ դրել եք ենթատեքստ, որ ցույց տաք, թե իբր անջատում է տեղի ունեցել, բայց ես Ձեզ ասեմ ավելին՝ շատ գեղեցիկ հարցերի, ձեւակերպումների արդյունքում հաճախ անջատվեցին, դա տեխնիկական հարց է, որը որեւէ կապ չունի հարցադրման բովանդակության հետ:
-Դուք որոշել եք առաջադրվել ռեյտինգային ընտրակարգով եւ կրկին պայքարելու եք Սամվել Ալեքսանյանի դեմ: Բայց նա մի առիթով ասել էր, որ Դուք քույր ու եղբայր եք, ինչպե՞ս եք պայքարելու Ձեր եղբոր դեմ:
-Ես պետք է ասեմ, որ նախ՝ առաջին հերթին Սամվել Ալեքսանյանի հետ մենք երեսուն տարուց ավել հարեւաններ ենք, սա մեկ, երկրորդը՝ Սամվել Ալեքսանյանն ասել է, որ ինքն է առաջադրվում, ես ուզում եմ իրեն ուղղել, ես ինքս Շենգավիթում արդեն երրորդ անգամ եմ առաջադրվում, ինքս մեծամասնական թեկնածու եմ եղել, երկու անգամ հաղթել եմ գործող պատգամավորներին, որոնք իմ մանդատը խլել են, ես ինքս անցել եմ իմ բարձր հաջողություններով, բայց իմ փոխարեն մեկ ուրիշն է դարձել պատգամավոր: Ես երրորդ անգամ եմ առաջադրվում այդ տարածքում: Սամվել Ալեքսանյանը մտածել է, որ ընտրական տարածքը դա միայն Մալաթիան է, եւ կարծել, որ այդտեղ եմ առաջադրվում, բայց Մալաթիան եւ Շենգավիթն այսօր մեկ ընտրական տարածք են: Իսկ ես մշտապես առաջադրվել եմ Շենգավիթում, բոլորդ գիտեք, սա հայտնի բան է:
-Ավանդաբար ջեմ ու մուրաբաներ եք բաժանել ընտրությունների ժամանակ, այս անգամ Ամանորին ոգելից խմիչք եք բաժանել քաղաքացիներին: «Մենյու»-ի մեջ փոփոխություննե՞ր կան:
-Լսեք, դա կեղծ հերյուրանք է, եւ ես ցավում եմ: Դուք այս պահին օլիգարխների, թալանչիների, որոնք այսօր առաջադրվում են ռեյտինգային կարգով, մի հատ վերցրեք, ցուցակագրեք ամբողջ երկրում, ովքեր են մասնակցում, եւ Դուք կտեսնեք, թե ինչպիսի խայտառակ փողեր են շրջանառվում: Խորհուրդ կտամ՝ զբաղվեք դրանով, իսկ, թե ՀՎԿ-ն իր կուսակցական ընտանիքների նկատմամբ մարտի 8-ի առիթով կամ իրենց ծննդյան առիթով ինչպիսի վերաբերմունք է ցույց տալիս, դա, կարծում եմ, որ մեր անձնական, մեր ներկուսակցական խնդիրն է, թե մենք ինչպես ենք վերաբերվում մեր կուսակիցներին: Որեւէ այլ բան չեմ կարող ասել:
-Անընդհատ թալանչիներ եք ասում, բայց կոնկրետ անուններ չեք նշում: Ովքե՞ր են թալանչիները:
-Խորհուրդ կտամ, որ հնացած, նախընտրական շրջանում բորբոսած նմանատիպ հարցադրումները փոխեք ժամանակակից հարցադրումներով: Այ, օրինակ՝ որպես երիտասարդ մարդ՝ Դուք պետք է խոսեք, թե մեր երկրի ապագան ինչպիսին պետք է լինի, որ Դուք վեց ամիս հետո չհեռանաք, այ, դրա մասին պետք է մտածեք:
-Դուք մշտապես վրդովմունքով եք պատասխանում քննադատություններին. դա կուսակցակա՞ն հրահանգ է:
-Ներեցեք, Դուք ծիծաղելի հարց տվեցիք ուղղակի:
-Հարցի ո՞ր մասն էր ծիծաղելի: Այն, որ կարող եք կուսակցական հրահանգով բարկանա՞լ:
-Ծիծաղելի հարց է, էլի, պատասխանելու կարիք չկա:

 
ԴԵՄԻՐՃՅԱՆԸ ՀԱՆԴԻՊԵԼ Է ՄԻԱՅՆ ԾԱՌՈՒԿՅԱՆԻ ՀԵՏ

Նախօրեին լրատվամիջոցներից մեկի հետ զրույցում ՀԱԿ խմբակցության ղեկավար Լեւոն Զուրաբյանը հայտարարեց, որ «Հայ ազգային կոնգրես» կուսակցությունը խորհրդարանական ընտրություններին մասնակցելու է Ստեփան Դեմիրճյանի ղեկավարած ՀԺԿ կուսակցության հետ դաշինքով: Սակայն մինչ այդ մամուլում լուրեր էին շրջանառվում, որ Դեմիրճյանը բանակցություններ է վարում նաեւ Գագիկ Ծառուկյանի, Սեյրան Օհանյանի, Արթուր Բաղդասարյանի եւ այլ քաղաքական ուժերի ղեկավարների հետ: Ի վերջո, ինչու Դեմիրճյանը որոշեց կրկին ՀԱԿ-ի հետ մասնակցել ընտրություններին եւ ի՞նչ էր փնտրում՝ այլ ուժերի հետ բանակցելով: Այս հարցերի պատասխանը «Ժողովուրդ»-ը փորձել է պարզել հենց Ստեփան Դեմիրճյանից:

-Պարո՛ն Դեմիրճյան, եթե պիտի նորից ՀԱԿ ցուցակով գնայիք ընտրություններին, ինչո՞ւ էիք երկար ժամանակ բանակցում Սեյրան Օհանյանին, Գագիկ Ծառուկյանին, «Հայկական վերածնունդ» կուսակցությանն, ինչպես նաեւ «Ելք» դաշինքին միանալու համար: Առավել գրավիչ պայմաննե՞ր էիք փնտրում:
-Խոսքը չի գնում ՀԱԿ-ի ցուցակում ընդգրկվելու մասին, այլ խոսքը գնում է ՀԱԿ-ՀԺԿ դաշինքի մասին, եւ ոչ մի արտառոց բան այստեղ չկա: Մենք համագործակցել ենք ՀԱԿ-ի հետ եւ շարունակում ենք համագործակցել: Ինչ վերաբերում է, այսպես ասած, բանակցություններին, մենք ժամանակին շատ հստակ ասել ենք, որ առաջին հերթին մենք քննարկելու ենք մեր մասնակցության հետ կապված հարցերը մեր դաշնակից ՀԱԿ-ի հետ, եւ այսօր արդեն հստակ կա որոշում դաշինքով մասնակցելու մասին: Նաեւ ուզում եմ ասել, որ ինչ-որ բաների մասին եք խոսում, որոնք իրականության մեջ գոյություն չեն էլ ունեցել, ապատեղեկատվություն է շրջանառության մեջ դրվել: Ուրեմն, նախ գրել էին ՀԱԿ-ում՝ 6-րդ տեղ, մյուս դաշինքներում, մեկում՝ 5-րդ, մեկում՝ 3-րդ, այդ բոլորը ապատեղեկատվություն է:
-ՀԱԿ-ից բացի՝ այլ քաղաքական ուժերի հետ բանակցություններ չե՞ն եղել:
-Հանդիպում եղել է Գագիկ Ծառուկյանի հետ, բայց այն, ինչ-որ ներկայացվել է որոշ լրատվամիջոցների կողմից, ապատեղեկատվություն է, այդքան բան: Այսինքն՝ իմ փոխարեն տարբեր տեղեր ընդգրկել են, հետո ասում են՝ դե, պատասխանեք: Ընդ որում, հերքում էին, սակայն շարունակում էին տարածել:
-Այսինքն՝ միավորվելու շուրջ չե՞ք բանակցել Գագիկ Ծառուկյանի հետ:
-Եղել է հանդիպում: Այն, ինչ-որ շրջանառվել է, դա իրականության հետ բացարձակ կապ չունի: Հիմա ավելորդ էլ եմ համարում խոսել այդ ամենի մասին, հիմա կա որոշում: Ինչ-որ շրջանառվել է, դա ապատեղեկատվություն է: Կրկնում եմ՝ հանդիպում եղել է Ծառուկյանի հետ, բայց այն, ինչ-որ շրջանառվել է, դա սուտ է, նաեւ այն մյուս ցուցակների հետ կապված:

Նյութերը՝ ՎԱՀԱԳՆ ՀԱԿՈԲՅԱՆԻ

 
ՉԱՐԱՇԱՀՈՒՄՆԵՐ
Կրթական ոլորտում մեծ չափերի հասնող չարաշահումներ են բացահայտվում, որոնցից, պարզվում է՝ անմասն չեն կարկառուն ՀՀԿ-ականները: ՀՀ գլխավոր դատախազությունը Վ. Բրյուսովի անվան լեզվահասարակագիտական համալսարանում ավելի քան 30 մլն դրամ արժողության նյութական միջոցների պակասորդ է հայտնաբերել: Այդ առիթով քրեական գործ է հարուցվել ՀՀ քրեական օրենսգրքի 179 հոդվածի հատկանիշներով` վատնում, յուրացում: «Ժողովուրդ»-ի հետ զրույցում, սակայն, այս համալսարանի ռեկտոր Գայանե Գասպարյանը շտապեց հերքել. «Ոչ մի բան էլ տեղի չի ունեցել: Ես զարմացած եմ, թե որտեղից են այդպիսի տվյալները»: Սակայն իրավապահ շրջանակներում այդ վատնումների եւ յուրացումների մասով շրջանառվում է ԱԺ ՀՀԿ-ական պատգամավոր Կարեն Ավագյանի եղբոր` բուհի ֆինանսատնտեսական գծով պրոռեկտոր Արթուր Ավագյանի անունը: Բանն այն է, որ հենց նա է ի պաշտոնե իրավասու այդ հարցերով զբաղվելու: Ու դժվար թե Կարեն Ավագյանը կարողանա նրան փրկել պատասխանատվությունից: Հիշեցնենք, որ այս բուհի խորհրդի նախագահը ՀՀ ՊԵԿ նախկին նախագահ Հովհաննես Հովսեփյանն է: Ի դեպ, սա կրթական ոլորտում չարաշահումների առաջին դեպքը չէ. ՀՀ ՎՊ ստուգումների արդյունքում կոռուպցիոն լուրջ երեւույթներ բացահայտվել էին նաեւ ԿԳՆ ԾԻԳ-երում, եւ այդ բոլոր վատնումները, յուրացումներն ու չարաշահումները կատարվել էին ՀՀԿ փոխնախագահ Արմեն Աշոտյանի պաշտոնավարման ժամանակ: ՎՊ բացահայտումների հիման վրա եւս գործ էր հարուցվել: Թե ինչ ընթացքի մեջ է գործը, դեռ որեւէ մանրամասն չի հաղորդվում:

ԴԵՌ ՄՏԵՐԻՄ ԵՆ
Ոչ վաղ անցյալում ԱԺ ՀՀԿ խմբակցության պատգամավորներ Ռուզաննա Մուրադյանն ու Կարինե Պողոսյանը ոչ միայն գործընկերներ էին, այլեւ մտերիմ ընկերուհիներ: Սակայն Կ. Պողոսյանն իր զարմիկի` նախկին վարչապետ Հովիկ Աբրահամյանի` ՀՀԿ-ից հեռանալուց հետո ինքն էլ որոշեց լքել կուսակցությունը: «Ժողովուրդ» օրաթերթն էլ ԱԺ ՀՀԿ խմբակցության պատգամավոր Ռուզաննա Մուրադյանից հետաքրքրվեց` ինչպես է վերաբերվում ընկերուհու այդ քայլին: «Մենք ընդհանրապես բոլոր կանանցով նաեւ շատ մտերիմ հարաբերությունների մեջ ենք: Որոշմանը վերաբերվում եմ այնպես, ինչպես յուրաքանչյուր մարդ իրավունք ունի ինքնուրույն կայացնելու իր քաղաքական որոշումը, որպես անհատի, ով կայացրել է իր որոշումն իր գիտակցումով, իր խղճի մտոք, իր սրտի մտոք»,- ասաց նա: Իսկ հարցին, թե արդյոք Մուրադյանը կշարունակի ընկերական հարաբերություններ պահպանել Պողոսյանի հետ, ասաց. «Մենք բոլորի հետ ենք շփվում, մենք նաեւ ընդդիմադիր գործիչ ընկերուհիներ ունենք: Քաղաքականությունը մեկ այլ բան է, մարդկային հարաբերություններն այլ բան է»: Մինչ այդ, նկատենք, որ Կ.Պողոսյանը ՀՀԿ-ից հեռանալուց հետո խորհրդարան չի գալիս ու չի մասնակցում ԱԺ նիստերին: