ՏԵՍԱԽՑԻԿՆԵՐԻ ՏԵՂԱԴՐՄԱՆ ԳՈՐԾԸՆԹԱՑԸ՝ «ՅՈՒՔՈՄ»-Ի ՁԵՌՔՈՒՄ

Երեկ կենտրոնական ընտրական հանձնաժողովի արտահերթ նիստում «Ի ԱՅ ՍԻ Տելեկոմ» ընկերությանը թույլտվություն տրվեց Ազգային ժողովի ընտրությունների ժամանակ քվեարկության ընթացքի եւ քվեարկության արդյունքների ամփոփման գործընթացի տեսանկարահանում եւ միաժամանակյա համացանցային հեռարձակում իրականացնել: Ինչպես հայտնի է` Եվրամիության ֆինանսական աջակցությամբ ընտրատեղամասերում ապրիլի 2-ին կապահովվեն ուղիղ հեռարձակում եւ տեսանկարահանում: Այս հարցով ստեղծված ընդդիմադիրների եւ իշխանության ներկայացուցիչների հանձնաժողովը որոշել էր՝ բավարարվելով եղած ֆինանսական միջոցներով՝ նկարահանում ապահովել ոչ թե բոլոր 2000, այլ առնվազն 1500 ընտրատեղամասերում, այսինքն՝ 500 ընտրատեղամասեր կմնան առանց տեսանկարահանման:

Ընտրությունների տեսանկարահանման գործընթացի մասնակի իրագործումը ԱԺ ՀԱԿ խմբակցության քարտուղար Արամ Մանուկյանը կորուստ չի համարում: Նրա խոսքով՝ թեեւ որոշ ընտրատեղամասերում տեսախցիկներ չեն տեղադրվի, սակայն դա, ըստ էության, չի խոչընդոտի ընտրությունների թափանցիկությանը: «Մխիթարանքն այն է, որ այն ընտրատեղամասերում, որտեղ տեսախցիկներ չեն լինի, կենտրոնացված է հանրապետության բնակչության 7 տոկոսը: Մենք համաձայնեցինք, որ դրանք չտեղադրվեն այն ընտրատեղամասերում, որտեղ 20-50 հոգի ընտրող կա», – նշել է նա:
Քաղաքացիական հասարակության ակտիվ ներկայացուցիչ, «Իրազեկ քաղաքացիների միավորում» ՀԿ նախագահ Դանիել Իոաննիսյանը, սակայն հակառակ տեսակետն ունի: «Ըստ ամենայնի, դուրս են մնալու փոքր տեղամասերը: Մենք կուզեինք, որ ծածկվեին հենց հեռավոր փոքր տեղամասերը, իսկ բաց մնային մեծերը, քանի որ դրանք մենք հաստատ կկարողանանք ծածկել դիտորդներով», – «Ժողովուրդ»-ի հետ զրույցում նշեց նա:
Ուշագրավն այն է, որ իրականում «Յուքոմ»-ը եւ մրցույթը հաղթած ընկերությունն են որոշելու, թե որոնք կլինեն այն ընտրատեղամասերը, որտեղ տեսախցիկներ չեն տեղադրվի, իսկ դա էլ կախված կլինի այն հանգամանքից, թե որ ընտրատեղամասերում ընկերությունը կարող է արագ կապ ապահովել: Ընդգծենք, որ հենց հայ-կանադական «Ի ԱՅ ՍԻ Տելեկոմ» ընկերությունն է որոշել համագործակցել «Յուքոմ»-ի հետ եւ ընտրություններում ինտերնետ-կապի ապահովումը վստահել վերջինիս:
Հատկանշական է, որ ավանդաբար ընտրակեղծիքներ տեղի են ունենում հենց այն ընտրատեղամասերում, որոնք դուրս են գտնվում վերահսկողությունից: Իսկ նման վտանգի տակ մշտապես հեռավոր գյուղերում գտնվող փոքր ընտրատեղամասերն են: Առկա մտահոգությունների շուրջ «Ժողովուրդ»-ը զրուցեց կենտրոնական ընտրական հանձնաժողովի նախագահ Տիգրան Մուկուչյանի հետ:
-Պարո՛ն Մուկուչյան, ինչպե՞ս են ընտրվելու այն տեղամասերը, որտեղ տեսախցիկներ չեն տեղադրվելու:
-Դա որոշելու է ընկերությունը համապատասխան հանձնաժողովի հետ միասին: Կենտրոնական ընտրական հանձնաժողովը ստացել էր գրություն 1500 տեղամասերում նկարահանումների իրականացման մասին: Իսկ թե կազմավորված ընտրատեղամասերից որ մեկում կլինեն տեսախցիկները, ԿԸՀ-ն դրա հետ որեւէ առնչություն չունի:
-Գաղտնիք չէ, որ ընտրական գործընթացների նկատմամբ վստահության մակարդակը ցածր է: Տեսախցիկների տեղադրումը կոչված էր հենց վստահության բարձրացմանը, մինչդեռ հիմա շուրջ 500 ընտրատարածք բաց թողնելով՝ արդյո՞ք կարող ենք վստահ լինել, որ կեղծիքներ չեն լինի, եւ հանրային անվստահությունն այդ պատճառով չի խորանա:
-Ո՛չ, որովհետեւ նախ պետք է նկատի ունենալ, որ ընտրական գործընթացի բոլոր մասնակիցներն էլ նախկինում հնարավորություն ունեին կատարել տեսաձայնագրումներ: Տեղամասերում գտնվող մարդիկ նույն ձեւով կարող են իրականացնել տեսանկարահանում կամ ֆոտոնկարահանում: Միայն նրանից, որ ընտրատեղամասերի մի հատվածում է տեղադրվել, մնացյալում որեւէ խոչընդոտ չի կարող լինել այն մարդու նկատմամբ, ով ցանկանում է տեսանկարահանումներ անել:
-Պարո՛ն Մուկուչյան, ինչպե՞ս պետք է անել, որ բաց մնացած տեղամասերում ընտրությունը վստահություն ներշնչի:
-Կարծում եմ՝ ընտրական օրենսգրքում ամրագրված բոլոր կանոնակարգումները, որոնք արվել են՝ ի լրումն նախկինում արված կանոնակարգումների, հենց հիմքում ունեցել են այդ խնդիրները՝ ապահովել թափանցիկություն, որը հիմնական գործընթացն է վստահության բարձրացման համար:
-Չեք կարծում, որ ամեն դեպքում ինտերնետ կապի հետ կապված խնդիրներ կլինեն հեռավոր գյուղերում, փոքր ընտրատարածքներում, որտեղ էլ մեծամասամբ կատարվում են խախտումները:
-Մենք նշված քննարկումներին չենք մասնակցել եւ, բնականաբար, չենք կարող ասել, թե որ ընտրատեղամասերը նկատի ունեն, որտեղ են տեղադրվելու տեսախցիկները եւ այլն: Իսկ ինչ վերաբերում է կոնկրետ դիտարկմանը, նշեմ, որ այսօր ես տեղյակ չեմ՝ որոշված է արդյոք, թե որտեղ պետք է լինի: Բայց եթե մյուս ընտրատեղամասերում նույնպես թույլատրված է կատարել տեսանկարահանում, հետեւաբար ես կարծում եմ՝ այդ հարցադրումները որեւէ հիմնավորում չունեն:
-Ձեզ համար՝ որպես ԿԸՀ նախագահ, կարեւո՞ր չէր, որ տեսախցիկներ տեղադրվեին բոլոր ընտրատեղամասերում, որպեսզի ամեն ինչ թափանցիկ լիներ, եւ, ի վերջո, Ձեզ չմեղադրեին կեղծիքների կամ թվանկարչության մեջ:
-Խնդիրը հետեւյալն է. կան ընտրական օրենսգրքի կանոնակարգումներ, որոնց համաձայն էլ իրականացվել է այդ գործընթացը, կազմակերպվել է մրցույթը, իրականացվել են բանակցություններ, եւ նշված հանձնաժողովը, որի անդամ են տարբեր կուսակցությունների ներկայացուցիչներ, եկել է այն եզրակացության, որ հենց այդքան թվով ընտրատեղամասերում պետք է տեղադրվեն տեսանկարահանող սարքեր:
Հավելենք, որ տեսախցիկների տեղադրման մրցույթին մասնակցել էր միայն մեկ ընկերություն՝ «Ի ԱՅ ՍԻ Տելեկոմ»-ը: Հայ-կանադական այս ընկերությանը տեսախցիկների տեղադրման համար հատկացվելու է 2 մլն 332 հազար եվրո, որից 2 մլն եվրոն տրամադրում է Եվրամիությունը, իսկ մնացածը` պետությունը: Ընդգծենք, որ ծրագիրը մոտ էր տապալվելուն, սակայն գրեթե վերջին պահին Եվրամիությունը ավելացրեց հատկացված գումարը այն հասցնելով 2 միլիոն եվրոյի: Մինչ այդ ԵՄ-ն հատկացրել էր 1 մլն 600 հազար եվրո:

Զրուցեց ՆԱԻՐԱ ՀՈՎՀԱՆՆԻՍՅԱՆԸ

 
ՏԱՔՍՈՒ ՎԱՐՈՐԴՆԵՐԸ ՉԵ՞Ն ԾԱՆՈՒՑՎՈՒՄ
Ինչպես հայտնի է՝ տաքսի-ծառայությունները դեռեւս 2014 թվականից անցել են պարտադիր լիցենզավորման գործընթաց: Այս կարգի համաձայն՝ տաքսու վարորդները պետք է վճարեն ամսական 12 հազար դրամ լիցենզավորման վճար:
Ի դեպ, մարզային քաղաքներում այդ վճարը կազմում է 8000 դրամ, իսկ գյուղերում՝ 5000 դրամ: Սակայն տաքսի-ծառայությամբ զբաղվող որոշ վարորդներ «Ժողովուրդ» օրաթերթին ներկայացրին, որ իրենք ամսական վճարը չվճարելու դեպքում օրական տուգանվում են 8 դրամով (մեզ դիմած վարորդները մարզային քաղաքներում գրանցված են, իսկ Երեւանում գրանցված վարորդների տուգանքը կազմում է օրական 18 դրամ), սակայն այդ մասին ծանուցում չեն ստանում: «Ամսական վճարը չմուծելուց երկու ամիս անց եմ պարզել, որ օրական 8 դրամով տուգանվել եմ, բայց այդ մասին ինձ չի ծանուցվել»,- «Ժողովուրդ»-ին ներկայացրեց վարորդ Կարեն Բարսեղյանը:
Այս թեմայի շուրջ պարզաբանում ստանալու նպատակով «Ժողովուրդ»-ը զրուցեց ՀՀ կապի, տրանսպորտի եւ տեղեկատվական տեխնոլոգիաների նախարարության լիցենզավորման գործակալության պետի տեղակալ Արայիկ Ստեփանյանի հետ: Նա փոխանցեց, որ լիցենզիան ստանալու ժամանակ նախարարության համապատասխան հարցերով աշխատակիցները վարորդներին մանրամասն բացատրում են, որ պետական տուրքը (խոսքը լիցենզավորման ամսական վճարի մասին է) մուծելու ամսվան հաջորդող ամիսներին լիցենզիայի տրման օրերին պետք է վարորդները կատարեն ամսական վճարումները, քանի որ ուշացման դեպքում կտուգանվեն: «Եթե վարորդը պետական տուրքը չի մուծում, ապա լիցենզիան օրենքի ուժով կասեցված է համարվում: Օրինակ՝ եթե դեկտեմբերի 1-ին մուծել է ամսական վճարը, ապա պետք է հաջորդ ամսվա 1-ին կամ մինչեւ 1-ը կրկին վճարի պետական տուրքը: Մենք իրենց նույնիսկ իրավական ակտերի ցանկն էլ ենք տրամադրում, ամեն բան բացատրում ենք: Չմուծելու դեպքում յուրաքանչյուր ուշացած օրվա համար «Պետական տուրքի» մասին ՀՀ օրենքով 0.15 տույժ է հաշվարկվում»,- տեղեկացրեց Ստեփանյանը:
Զրույցի ընթացքում Ստեփանյանը պնդեց, որ իրենց կողմից համապատասխան ծանուցումներն արվում են: Ապա խնդրեց փոխանցել դժգոհող քաղաքացիներին իրենց հուզող հարցերով մոտենալ նախարարություն: «Մենք նույնիսկ հեռախոսով ենք մեր վարորդներին զգուշացնում պետական տուրքը վճարելու մասին: Ավելին՝ հիմա հեշտացել է ամեն բան, քանի որ քաղաքացիները պետական տուրքը կարող են մուծել վճարային ցանկացած համակարգով՝ առանց որեւէ խնդրի»,- լրացրեց լիցենզավորման գործակալության պետի տեղակալը: Մինչ պաշտոնյան հայտարարում է, որ իրենք ծանուցում են վարորդներին տուգանքների եւ ամսական վճարը մուծելու մասին, վարորդները հակառակն են պնդում:
Նա նաեւ նշեց, որ տաքսի-ծառայությունների այն վարորդը, ով որոշել է դադարեցնել տաքսի վարել, ապա ինքը կարող է ստացած լիցենզիան հետ վերադարձնել նախարարություն եւ դիմում գրել այն ուժը կորցրած ճանաչելու վերաբերյալ:

ՍՅՈՒՆԷ ՀԱՄԲԱՐՁՈՒՄՅԱՆ

 
ԻՆՉՈ՞Ւ Է ՓԱԿՎԵԼ ՔՐԳՈՐԾԸ

Իջեւանի տարածաշրջանի Խաշթառակ գյուղի մշակույթի տունը կարծես ադրբեջանական զինուժի կողմից ռմբակոծված լինի: Այն ավերված, թալանված է:

Խաշթառակի գյուղապետ Անդրանիկ Վիրաբյանը հայտնեց, որ 2015թ. սեպտեմբերի 25-ին, երբ ինքը սկսել է պաշտոնավարել որպես համայնքի ղեկավար, մշակույթի տունն արդեն ավերված վիճակում է եղել: Նրա խոսքերով՝ 2008թ., երբ ինքը համայնքի ավագանու անդամ էր, շենքի տանիքը վնասված էր, սակայն կառույցն ավերված չէր: Գյուղապետ ընտրվելուց անմիջապես հետո Ա. Վիրաբյանը փաստացի չգործող մշակույթի տան 5 աշխատողներին հայտնել է, որ համայնքապետարանը չպետք է ֆինանսավորի չգործող մշակույթի տունը: 2015թ. հոկտեմբերի 1-ին մշակույթի տան 5 աշխատակիցիները՝ տնօրենը, գրադարանավարր, հաշվապահը, հավաքարարը, երեխաների զարգացման կենտրոնի աշխատակիցը, դիմում են գրել աշխատանքից ազատվելու մասին: Համայնքի ղեկավարը մշակույթի տան գործունեությունը դադարեցնելու համար դիմել է հարկային տեսչություն: Մշակույթի տան գրադարանի սակավաթիվ գրքերը տեղավորել են գյուղապետարանի շենքի մի սենյակում: Նշենք, որ չգործող մշակույթի տան աշխատակիցները տարիներ շարունակ ամսական ընդհանուր առմամբ ստացել են 450-480 հազար դրամ աշխատավարձ: Որեւէ կազմակերպության դիմե՞լ եք մշակույթի տունը վերանորոգելու առաջարկով, այս հարցին Ա. Վիրաբյանը պատասխանեց, որ ինքը չի դիմել, սակայն նախկին գյուղապետ Հայկ Քամալյանն այդ խնդրով դիմել է «Հայաստան» համահայկական հիմնադրամին: Խաշթառակ համայնքի ղեկավարից նաեւ հետաքրքրվեցինք, թե ինչ ընթացք ունեցավ մշակույթի տան ավերվելու կապակցությամբ հարուցված քրեական գործը: Գյուղապետն ասաց, որ իր տեղեկություններով՝ այդ գործը փակվել է: Տարակուսելի է, թե ինչո՞ւ է փակվել այդ քրեական գործը, չէ որ ակնհայտ է մշակութային օջախի թալանը եւ համայնքի ֆինանսական միջոցների տարիներով վատնումը:

ՈՍԿԱՆ ՍԱՐԳՍՅԱՆ
Տավուշ