ArmLur.am-ի զրուցակիցն է «Եվրանեսթ» խորհրդարանական վեհաժողովի պատվիրակության անդամ Յարոմիր Շտետինան, ով այսօր դիտորդական առաքելություն է անցկացնում Արցախում:
– Պարո՛ն Շտետինա, ինչպե՞ս եք գնահատում սահմանադրական փոփոխությունների հանրաքվեն Արցախում:
– Ամեն ինչ կախված է նրանից, թե քանի հոգի մարդ է մասնակցել հանրաքվեին: Եթե այն կազմի հիսուն տոկոսից ավելին, ես հույս ունեմ, որ կլինի, ապա դա նշանակում է, որ ղարաբաղցիներն այս հանրաքվեին շատ լուրջ են վերաբերվում:
– Իսկ դուք ի՞նչ եք կարծում, այս փոփոխություններն առաջին հերթին ի՞նչ կտան Արցախին:
– Կարծում եմ, որ առաջին ձեռքբերումն այն է, որ Արցախն այսուհետ կանվանվի Արցախ: Սա շատ կարևոր է, որ քանի որ ես, որպես Եվրախորհրդարանի պատգամավոր, գիտեմ, որ պատգամավորների մեծ մասը երբևէ չի լսել Արցախ բառը: Պետք է սկսել, քիչ-քիչ, բայց պետք է անել:
– Այս փոփոխություններով անցում է կատարվելու սուպեր նախագահական կառավարման համակարգի: Դա Արցախի նման պետության համար ճի՞շտ փոփոխություն եք համարում:
– Դա պետք է, քանի որ երկիրը պատերազմական իրավիճակում է: Ես կարծում եմ, որ նախագահը պետք է լինի խորհրդարանի խիստ հսկողության ներքո: Կարդալով տեքստը` ես հասկացա՝ ցանկություն կա, որ նա լինի հսկողության ներքո:
– Իսկ ինչ եք դուք մտածում ռուս բլոգեր Ալեքսանդր Լապշինի արտահանձնման մասին: Արդյոք այս դեպքը կարող է վախի մթնոլորտ ստեղծել:
– Ես մեկ շաբաթ առաջ Բրյուսելում խոսել եմ Արցախի ՄԻՊ Ռուբեն Մելիքյանի հետ, և նա ինձ բացատրեց ամեն ինչ: Ես կարծում եմ, որ այն նպատակ ունի վախեցնել բոլոր այն մարդկանց, ովքեր Արցախ գալու ցանկություն ունեն:
– Եվ ի՞նչ եք կարծում, այն ազդեցություն ունեցա՞վ: Վախ կա՞:
– Մենք այստեղ ենք և մեզ չեն վախեցրել: Հիմա պետք է ձգտել նրան, որ ինչ-որ բան անել: Ես և իմ գործընկեր Ֆրանկ Էնգելն արդեն Մելիքյանին ասել ենք, որ մենք կփորձենք բարձրացնել այս հարցը Եվրախորհրդարանում: Բայց դա կախված չէ միայն մեզնից:
Զրուցեց Նաիրա Հովհաննիսյանը
.gif)
