ՌԴ ԳԵՆԵՐԱԼԻ ԱՆՎԱՆ ՏԱԿ

2016թ. ՀՀ իրավապահները մի շարք դեպքեր էին բացահայտել, երբ ժամկետային զինվորական ծառայություն անցնող զինվորների ծնողները, ցանկանալով իրենց երեխաներին ազատել ծառայությունից կամ մի զորամասից այլ զորամաս տեղափոխել, խաբվել են: «Ժողովուրդ» օրաթերթը պարզեց, որ մի քրեական գործ էլ կապված է Ռուսաստանի անվտանգության դաշնային ծառայության սահմանապահ վարչության պետ, գեներալ լեյտենանտ Վիկտոր Վլասովի անվան հետ:

2016 թվականի մարտի 18-ին ազգային անվտանգության ծառայությունը պաշտոնական հաղորդագրություն էր տարածել՝ տեղեկացնելով, որ ձերբակալվել է Կոտայքի մարզի Հրազդան քաղաքի բնակիչ Համլետ Ղազարյանը: Պարզվել էր, որ Հ.Ղազարյանը տարբեր քաղաքացիների ներկայանալով ՀՀ պաշտպանության նախարարության եւ ԼՂՀ պաշտպանության բանակի բարձրաստիճան ղեկավարների անունից՝ խոստացել էր ԼՂՀ տարածքում ժամկետային զինվորական ծառայություն անցնող նրանց զավակներին ԼՂՀ-ից տեղափոխել Հայաստան: Յուրաքանչյուր ծնողից իր ծառայության դիմաց իրականում շորթել էր 160 հազարից մինչեւ 200 հազար դրամ:
Նախորդ տարվա նոյեմբերի 23-ին ՀՀ քննչական կոմիտեն հայտարարել էր, որ Երեւանի մի բնակչուհի տարբեր քաղաքացիների ներկայացել է որպես ՀՀ զինված ուժերի նախկին աշխատակից եւ կլորիկ գումարի դիմաց ծնողներին առաջարկել էր նրանց երեխաներին ազատել զորակոչից:
Այսքանով պաշտոնատար անձանց անվան տակ զինված ուժերում որեւէ հարց լուծելու պատմությունները չեն ավարտվում: Եվ այսպես՝ «Ժողովուրդ» օրաթերթը պարզեց, որ քաղաքացի Ռաֆիկ Վերդյանը ցանկացել է որդուն՝ Արթուր Վերդյանին, տեղավորել աշխատանքի ՌԴ սահմանապահ զորամասերից մեկում: Այդ առիթով ծանոթացել է Կոտայքի մարզի Բալահովիտ գյուղի բնակիչ Գրիգոր Սահակյանի հետ, որն էլ նրան հայտնել է, թե Հայաստանում Ռուսաստանի անվտանգության դաշնային ծառայության սահմանապահ վարչության պետ, գեներալ լեյտենանտ Վիկտոր Վլասովի մտերիմն է եւ կարող է նրան օգնել այս հարցում:
Եվ, ահա, Սահակյանը գործը գլուխ բերելու համար պահանջել է 4.000 ԱՄՆ դոլար գումար, որը իբր թե տալու է Վլասովին:
Վերդյանը համաձայնել է տալ պահանջված գումարը եւ «Աբովյան» ԲԿ-ում անձամբ Գ. Սահակյանին տվել մոտ 1 միլիոն 635 հազար դրամ:
Սակայն, ինչպես ցույց է տվել փորձը, գումարը անհետացել է, իսկ աշխատանքի տեղավորման հարցը այդպես էլ չի լուծվել:
Նկատենք, որ Գրիգոր Սահակյանը իրավապահներին հայտնել է. «Աշխատանքի տեղավորման համար զանգահարել եմ Վլասովին ու նրանից տեղեկանալով գների մասին՝ հայտնել եմ Ռաֆիկ Վերդյանին: Նա ինձ է տվել պահանջված 4000 ԱՄՆ դոլարը եւ համապատասխան փաստթղթեր, որոնք պատճենահանել եւ պահել եմ ինձ մոտ, իսկ բնօրինակները տվել եմ գեներալ Վլասովին: Նշված գումարը զորամասում հանձնել եմ Վլասովին, եւ նա հայտնել է, որ 2-3 ամսում հրամանը կլինի, պետք է Մոսկվայից համաձայնություն ստանան»: Այդ հանդիպումից 2-3 ամիս հետո հանդիպել է Վլասովին, տեսել է Արթուր Վերդյանի հրամանը, սակայն թե ինչու Արթուր Վերդյանի աշխատանքի հարցը այդպես էլ չի կարգավորվել, չի կարող ասել:
Ըստ նրա՝ իր մեղքը կայանում է նրանում, որ Ռաֆիկ Վերդյանից գումար է վերցրել` որդուն աշխատանքի ընդունելու համար, սակայն նրա տղայի աշխատանքի տեղավորման հարցը չի լուծել:
Նկատենք, որ իրավապահները Գրիգոր Սահակյանի ցուցմունքի հիման վրա հարցում են իրականացրել ՀՀ-ում Ռուսաստանի ԱԴԾ սահմանապահ վարչություն՝ հասկանալու համար, թե Գրիգոր Սահակյանը իսկապե՞ս մուտք է գործել զորամաս: Ինչին ի պատասխան՝ ՀՀ-ում Ռուսաստանի ԱԴԾ սահմանապահ վարչությունը հայտնել է, որ Գրիգոր Սահակյանը ռուսական զորքերի շտաբ մուտք չի գործել, քանի որ մուտքը իրականացվում է միայն անցագրերով:
Հիմա պատասխանատվության կենթարկվեն ինչպես կաշառք տվողը, այնպես էլ՝ վերցնողը:

ՔՆԱՐ ՄԱՆՈՒԿՅԱՆ

 
ՓՈԽՈՍՏԻԿԱՆԱՊԵՏԸ ՎԿԱ
Նախորդ տարվա հուլիսի 29-ի լույս 30-ի գիշերը Սարի թաղում իրականացված բախումների ժամանակ ՀՀ փոխոստիկանապետ, ներքին զորքերի հրամանատար Լեւոն Երանոսյանի եղբայրը` ՀՀ ՈԶ 1001 զորամասի շտաբի օպերատիվ բաժնի պետի տեղակալ Լեռնիկ Երանոսյանը եւս ակտիվ մասնակցություն է ունեցել վերոնշյալ դեպքերին: Նրա ձեռքում լուսաձայնային նռնակ է եղել:
Մինչ այժմ տարվող նախաքննությունը դեռեւս շարունակվում է, ու այդպես էլ պարզ չէ, թե ինչ պատիժ է սպասվում խաղաղ ցուցարարների նկատմամբ հատուկ միջոցներ կիրառած պաշտոնյաներին:
«Ժողովուրդ»-ին այս գործով նոր մանրամասներ են հայտնի դարձել: Պարզվում է` վերոնշյալ պաշտոնատար անձանց եւս մեկ անգամ հարցաքննել են: Ավելին` նախաքննություն իրականացնող մարմնի կողմից հարուցված քրեական գործի շրջանակում կարգավիճակ են ստացել: «Ժողովուրդ»-ին հայտնի դարձավ, որ ՀՀ փոխոստիկանապետ, ներքին զորքերի հրամանատար Լեւոն Երանոսյանը, ինչպես նաեւ նրա եղբայր Լեռնիկ Երանոսյանը գործով անցնում են որպես վկաներ:

«ԳՐԱՆԴ ՔԵՆԴԻ»-ԻՆ ՆԵՂԱՑՆՈՒՄ Է
«Գրանդ Քենդի» «Հայ-Կանադական ՀՁ» ՍՊԸ-ի աշխատակիցները ընկերության գործունեության պատճառով ընկել են դատարանի դռները: Կարեն եւ Միքայել Վարդանյանները թեեւ մի կողմից բարեգործություն են անում` իրենց իմիջը «ռեստավրացիա» անելու համար, մյուս կողմից էլ նրանց գործունեության արդյունքում այս ընկերության աշխատակիցների մոտ լուռ դգոհություն է հասունանում:
«Ժողովուրդ» օրաթերթին հայտնի դարձավ, որ քաղաքացի Սուրեն Ազոյանը դիմել է Շենգավիթ վարչական շրջանների ընդհանուր իրավասության դատարան, որպեսզի «Գրանդ Քենդի» «Հայ-Կանադական ՀՁ» ՍՊԸ-ին պարտավորեցվի վճարել իր վերջնահաշվարկը: Այս գործով մի քանի դատական քնություններ են տեղի ունեցել:
Իսկ թե ինչով կավարտվի այդ դատական վեճը, ցույց կտա ժամանակը:

ՆՈՐԻՑ ԿԱԼԱՆԱՎՈՐԵՑԻՆ
Դատարանը երեկ որոշել է կրկին փոխել Արթուր Սարգսյանի՝ Հաց բերողի խափանման միջոցը՝ երկու ամսով կալանավորելով նրան: Ավելի վաղ Հատուկ քննչական ծառայությունը ձերբակալել էր «Սասնա ծռեր» զինված խմբին օժանդակելու մեջ մեղադրվող Սարգսյանին: «Ազատության» հետ զրույցում նրա փաստաբան Տիգրան Եգորյանն ասել է, որ ՀՔԾ-ն ձերբակալման հիմք է համարել այն, որ Սարգսյանը փետրվարի 3-ին չի ներկայացել քննչական մարմնին: Մինչդեռ փաստաբանի խոսքով՝ նախապես քննիչին տեղյակ են պահել չներկայանալու մասին եւ խնդրել են փոխել հանդիպման օրը:

 
ԿՓՈՐՁԱՐԿԵՆ
Փետրվարի 12-ին Արմավիրի մարզի Վարդանաշեն եւ Գեղարքունիքի մարզի Սեմյոնովկա համայնքներում կայանալիք ՏԻՄ ընտրություններում փորձարկվելու են Ազգային ժողովի ընտրություններում կիրառվելիք ընտրողների էլեկտրոնային գրանցման սարքերը: Tert.am-ին այս մասին հայտնել է կենտրոնական ընտրական հանձնաժողովի նախագահ Տիգրան Մուկուչյանը: Նրա խոսքով՝ ընտրողների էլեկտրոնային գրանցման սարքերը կիրառվելու են փորձնական, որպեսզի ծագող հնարավոր խնդիրները, թերությունները հայտնի դառնան ու շտկվեն մինչեւ ապրիլին կայանալիք խորհրդարանական ընտրությունները:

ԿԱՐՃՎԵԼ Է
ԱԺ պատգամավոր Ռուբիկ Հակոբյանի եւ լրագրող Վահե Մակարյանի միջեւ Ազգային ժողովում տեղի ունեցած միջադեպի գործով հատուկ քննչական ծառայությունում հարուցված քրեական գործը կարճվել է հանցակազմի բացակայության պատճառով: Այս կապակցությամբ լրագրող Վահե Մակարյանը Tert.am-ին ասել է. «Փաստորեն անտեսվել է, որ հարված է եղել, վնասվածք եմ ստացել, ցավ եմ զգացել, ինչը դատաբժիշկը ֆիքսել է: ՀՔԾ-ն ընդունել է միայն պատգամավորի ցուցմունքը, համաձայն որի՝ իբր մեկ անգամ ապտակել է ինձ, այնինչ՝ բռունցքով հարվածել է: Անգամ եթե, ըստ ՀՔԾ-ի, պատգամավորն ինձ ապտակել է, եթե այդպես համարենք, ստացվում է, որ պատգամավորը կարող է լրագրողին ապտակել եւ պատասխանատվության չենթարկվել»: Հարցին, թե ի՞նչ է պատրաստվում անել լրագրողը, պատասխանել է, որ մտադիր է բողոքարկել ՀՔԾ-ի որոշումը եւ հնարավորինս ապացուցել նույն ՀՔԾ-ին, որ իրականում եղել է բռունցքներով հարված, որը ֆիքսել է դատաբժիշկը:

ԴԵՌ ՉԵՆ ՈՐՈՇԵԼ
«Ազատամարտիկների դաշինքն» իր նախօրեի նիստում չի որոշել, թե 2017թ. խորհրդարանական ընտրություններում որ քաղաքական ուժին է սատարելու: Այս մասին Tert.am-ին ասել է «Ազատամարտիկների դաշինքի» խորհրդի անդամ, «Ապարան» ջոկատի հրամանատար Ռազմիկ Պետրոսյանը: «Որոշումն արդեն կայացրած պետք է լինեինք, բայց քանի որ կուսակցությունների միջեւ բանակցությունները դեռ ավարտված չեն, որոշում չենք կայացրել: Կհայտարարենք, երբ քաղաքական ուժերի առաջադրումները կլինեն»,- նշել է Պետրոսյանը՝ հավելելով, որ իրենք աջակցելու են միայն միասնական ընդդիմադիր լայն ճակատին: