Արարատի մարզի Մասիս քաղաքում երեկ երեկոյան միջադեպ է տեղի ունեցել ՀՀԿ-ական թեկնածուների աջակիցների միջև:
ArmLur.am-ն արդեն հայտնել է, որ երեկ Արարատի մարզի Մասիս քաղաքում «Հայաստանի հանրապետական» կուսակցության ռեյտինգային ընտրակարգով առաջադրված թեկնածուների թիմակիցների միջեւ տեղի ունեցած բախումը, ըստ երեւույթին, դեռեւս շատ ջուր կքաշի:
Նախ հիշեցնենք, որ Հանրապետական կուսակցության երկու պատգամավորներ նախընտրական բախումներ են ունեցել, ինչի հետևանքով կողմերից մեկը տուժած ունի: Մասնավորապես, հայտնել էինք, որ ԱԺ պատգամավոր Արայիկ Գրիգորյանը՝ Ավշարի Արայիկը, որը ՀՀԿ-ի թեկնածուն է Արարատում՝ ռեյտինգային ընտրակարգով, վերջերս Մասիս քաղաքում նախընտրական շտաբ է բացել: Նա իր շտաբը տեղակայել է Հանրապետական կուսակցության թեկնածու Մուրադ Մուրադյանի շտաբի կողքին: Այս հանգամանքը դուր չի եկել Հանրապետական թեկնածու Մուրադ Մուրադյանին։
ArmLur.am-ի տեղեկություններով մինչ այդ կուսակցությունում ներքին պայմանավորվածություն է եղել, որ Արայիկ Գրիգորյանը չպետք է Մասիս քաղաքում գործունեություն ծավալի։ Նա Արարատի մարզի մի քանի քաղաքներում պետք է գործի, շտաբ բացի և այլն։
Իսկ կոնկրետ Մասիս քաղաքը, պայմանավորվածության համաձայն, «հանձնված» է մարզում առաջադրված Հանրապետական մեկ այլ թեկնածու, ԱԺ պատգամավոր Մուրադ Մուրադյանին։ Սակայն Արայիկ Գրիգորյանը՝ Ավշարի Արայիկը, խախտել է ներքին պայմանավորվածությունը եւ գնացել Մասիս քաղաքում շտաբ է բացել, ինչը դժգոհություն է հարուցել։ Մուրադ Մուրադյանն էլ որոշել է պատժել նրան։ Ուղարկել է իր թիմի տղաներին, որոնք մի քանի մեքենայով մտել են Արայիկ Գրիգորյանի շտաբ, դաժան ծեծի են ենթարկել շտաբի պատասխանատուներից Սամվել անունով մի անձի, որը գլխի շրջանում ստացել է մի շարք վնասվածքներ։
ArmLur.am-ին հայտնի դարձավ, որ Սերժ Սարգսյանը հրահանգել է Արայիկ Գրիգորյանին հանգստանալ և փակել պատմությունը։
Մեր աղբյուրները հայտնում են, որ Արայիկ Գրիգորյանը հայտարարել է, որ Մուրադ Մուրադյանին շատ խիստ պատժելու է: Այսօր, կարծես, թեմայի շարունակություն է սպասվում:
Այս պահին, սակայն, քաղաքում հանգիստ վիճակ է: Երկու շտաբներն էլ մարդաշատ են, դռները՝ փակ:
Ի տարբերության վաղ առավոտյան, երբ շտաբները շրջապատված էին ավտոմեքենաներով, այս պահին, կարելի է ասել, հանգիստ է:
Մուրադ Մուրադյանն, ի դեպ, Մասիսում է: Թերեւս, փակ քննարկում է անցկացվում, ծրագրեր են մշակվում:
.gif)
