ՉԵՄ ԿԱՐԾՈՒՄ, ՈՐ ՍԵՐԺ ՍԱՐԳՍՅԱՆՆ ԱԹՈՌԻՑ ԿԱՌՉԱԾ Է

Աժ ՀՀԿ խմբակցության պատգամավոր Կարեն Կարապետյանը կուսակցության համամասնական ցուցակում զբաղեցնում է 156-րդ տեղը, նա նաեւ առաջադրվել է ռեյտինգային ընտրակարգով՝ Լոռու ընտրատարածքում: Հաշվի առնելով նրա հնարավորությունները եւ կապերը՝ ինչո՞ւ Կարապետյանը կուսակցության ցուցակի առաջնային հորիզոնականներում չէ, եւ հնարավո՞ր է՝ նրան խորհրդարանական ընտրություններից հետո տեսնենք օրենսդիր կամ գործադիր մարմնում՝ բարձր պաշտոնում: «Ժողովուրդ» օրաթերթի զրուցակիցը ԱԺ պատգամավոր Կարեն Կարապետյանն է:

-Պարո՛ն Կարապետյան, Դուք ՀՀԿ-ի համամասնական ցուցակի 156-րդ տեղում եք, փոխարենը առաջադրվել եք ռեյտինգային ընտրակարգով: Ինչո՞ւ:
-Սկզբունքը սա է. նրանք, ովքեր ռեյտինգային ընտրակարգով առաջադրվել են, բնականաբար առաջին մասում չպետք է լինեն, որեւէ ռեյտինգային առաջադրված թեկնածու առաջին տեղերում չկա: Մի բան հաստատ պետք է իմանաք, որ ռեյտինգայինով առաջադրվում են այն մարդիկ, ովքեր քիչ թե շատ պատկերացնում են, որ հանրության մեջ իրենց էլեկտորատը կունենան: Ես միշտ էլ ռեյտինգայինով եմ առաջադրվել, անցած ընտրություններին էլ եթե նայեք, վերջին տեղերում եմ եղել, ի՞նչ է, վա՞տ է, ես այնտեղ ինձ շատ լավ եմ զգում:
-Այսինքն՝ ցուցակի առաջնային տեղերում գտնվողները նրանք են, ովքեր չունեն իրենց էլեկտորատը եւ չէի՞ն կարող կուսակցության համար ձայներ ապահովել:
-Խնդիրը դա չէ, մենք ներքին այդպիսի համաձայնության ենք եկել, եւ ինձ համար դա գոնե ընդունելի է: Համոզված եք, որ եթե դրա կարիքը լիներ, միգուցե ես ուրիշ տեղերում լինեի, չէ՞:
-Ռեյտինգային ընտրակարգի բացասական կողմերն արդեն իսկ տեսանելի են դառնում՝ ի դեմս տարբեր ներկուսակցական բախումների: Լոռիում նման բախումների վտանգ կա՞:
-Ես չեմ կարծում, որ հատուկ այդպիսի բաներ կլինեն, համենայն դեպս, իմ առաջին ելույթը կլինի, եւ կտեսնեք, որ խնդիրները շատ հստակ եմ դնելու: Հանրության մեջ ընտրությունը ընտրություն, բայց բեւեռացում պետք չէ, բեւեռացումը բացասական լուրջ հետեւանքներ կունենա՝ հաշվի առնելով տարածաշրջանում զարգացումները, վտանգները, իսկ հանրության ծայրահեղ բեւեռացումը ամենալուրջ խնդիրն եմ համարում: Պետք չէ որեւէ ձայն կամ որեւէ մանդատ, եթե դա համադրես այն վտանգների հետ, որ կբերի ծայրահեղ բեւեռացումը: Իմ առաջին ելույթի հիմնական շեշտադրումը կլինի դա, եւ ես երբեք որեւէ մեկի կամ որեւէ կուսակցության դեմ չեմ աշխատելու: Իսկ ովքեր քաղաքակրթության օրենքների եւ խաղի կանոնների շրջանակներից կփորձեն դուրս գալ՝ որեւէ մեկը կամ որեւէ կուսակցություն, ապա իմ վերաբերմունքը խիստ կոշտ է լինելու:
-Պարո՛ն Կարապետյան, երբ երկրի վարչապետը Տիգրան Սարգսյանն էր, նրա հասցեին քննադատություններ էիք հնչեցնում…
-Եղել է նման բան, դրանք ներկուսակցական խնդիրներ էին, եւ համոզված էի, որ ավելի շատ աճպարարություն կար, քան թե կոնկրետ գործ: Գիտեք ինչ, ճառ ասելու ժամանակներն անցել են, զանգ կախող չկա, ցավոք, հերիք է, պետք է աշխատել: Երեւանից մի հատ դուրս եկեք, գնացեք մարզեր, գյուղեր, տեսեք՝ մարդիկ ինչպես են ապրում: Մենք մեր համեստ հնարավորությունների սահմաններում փորձել ենք օգնել՝ կրթության ոլորտում, առողջապահության ոլորտում եւ այլն:
-Իսկ գործող վարչապետ Կարեն Կարապետյանին ինչպե՞ս եք վերաբերվում՝ գո՞րծ է անում, թե՞ էլի աճպարարությամբ զբաղվում:
-Այս վարչապետի գործունեության մասին կարող եմ ասել, որ ինքը մեծ ցանկություն ունի փոփոխություններ անելու, դա հեշտ չի լինելու: Ցանկացած կուսակցության մեջ՝ ե՛ւ դիմության, ե՛ւ ընդդիմության, կան պրոգրեսիվ եւ ռեգրեսիվ ուժեր: Պետք է պրոգրեսիվ եւ ռեգրեսիվ ուժերն իրենց մեջ պայքարեն, բոլոր կուսակցությունների մեջ ոչ միայն ընդդիմություն եւ դիմություն երկխոսությունը լինի, ընդդիմանալը լինի, այլեւ ներկուսակցական, որը կուսակցությանը զարգացման կտանի, մեկ այլ հարթության վրա կդնի: Այդ դեպքում նաեւ իշխանությունները զսպված կլինեն, ալան-թալանը, որի մասին խոսվում է, հնարավորինս վերացված կլինի: Նաեւ ընդդիմությունը կհասկանա, որ ճիշտ պետք է աշխատի, եւ պատվիրված ընդդիմություն չպետք է լինի, որպեսզի հանրությունը վաղը համոզվի, որ ինքը պատվիրված ընդդիմություն չէ, եւ ազգաբնակչությունը իրեն ձայն տա:
-Քաղաքական գլխավոր ինտրիգներից մեկն այն է, թե ով 2018 թվականից հետո կլինի երկրի վարչապետը՝ Կարեն Կարապետյա՞նը, թե՞ Սերժ Սարգսյանը: Դուք ու՞մ կցանկանաք տեսնել:
-Գիտեք ինչ, մեկ բառով ես Ձեզ ասեմ. ամեն ինչ իր ժամանակն ունի: Ես մոտավորապես պատկերացնում եմ, թե ինչպես է լինելու, բայց ամեն ինչ պետք է լինի իր ժամանակին, ես այս պահին վաղաժամ եմ համարում այդ մասին խոսել: Ես մեկ սկզբունք կարող եմ ասել. նա, ով իր ֆունկցիան ճիշտ է կատարում եւ երկիրը տանում է զարգացման, բնականաբար կարող է լինել տրամաբանություն: Ես չեմ կարծում, որ նախագահը կառչած է իր աթոռից, ինչպես ներկայացնում են: Մենք նորմալ, մտերմիկ հարաբերություններ ենք միշտ ունեցել, եւ իր պատկերացումները ես շատ լավ գիտեմ: Խնդիրը դա չէ, խնդիրն այն է, թե ինչպես կարելի է այս բարդ իրավիճակում զարգացում ապահովել:
-Ընտրություններից հետո հնարավո՞ր է՝ Ձեզ տեսնենք բարձր պաշտոնում՝ օրենսդիր կամ գործադիր մարմնում:
-Ինձ համար պաշտոնը էական չէ, մարդը պետք է գեղեցկացնի աթոռը, ոչ թե աթոռը՝ մարդուն: Ցավոք, մեր իրականությունն այդպիսին է. ում աթոռից հանում են, հետո հասկանում է, որ ինքը ոչ մի նշանակություն չունի: Ես այդ հոգեվիճակը չեմ ապրել եւ չեմ ապրելու: Կլինեմ այն դեպքում, երբ որ թիմ կլինի, եւ ճիշտ խաղի կանոններ կլինեն, այդ դեպքում թեւերս կքշտեմ եւ կմտնեմ գործի մեջ: Եթե էլի պետք է ամեն մեկս մեր մասին մտածենք, իմ ինչն է պակաս որ, էլ ինչի համար մտնեմ: Մինչեւ հիսուն տարեկանը կարելի է սխալվել եւ սխալը ուղղել, իսկ հիսունից հետո եթե սխալվում ես, սխալներն ուղղելու ժամանակը շատ քիչ է լինում: Բոլոր հնարավորություններն էլ ես ունեմ, կարծում եմ, որ սովորական մարդկանց մեջ էլ հարգանք կա, կոմպլեքսով չեմ տառապում, եթե անհրաժեշտությունը լինի, իմ հնարավորությունները որեւէ տեղ կդրսեւորեմ: Իսկ եթե տեսնեմ ընտրություններից հետո նորից մոռացանք ամեն ինչ, ավելի լավ է՝ ես նորից մարդկանց օգնեմ կողքից, բայց չփչացնեմ իմ երեխաների ապագան:

 
ԹԱԼԻՇՈՒՄ ՆՈՐ ՇԻՆՈՒԹՅՈՒՆՆԵՐԸ ՎՆԱՍ ՉԵՆ ԿՐԵԼ

Այս օրերին Արցախի ու Ադրբեջանի սահմանին իրադրությունը շարունակում է լարված մնալ։ Ընդհանուր առմամբ առավել ինտենսիվ խախտումներ են արձանագրվում արեւելյան, հյուսիսարեւելյան եւ հյուսիսային ուղղություններում:

Նշված հատվածներում ադրբեջանական զինուժը Դ-30, Դ-44 հրանոթներից եւ ականանետերից հայ դիրքապահների ուղղությամբ արկեր է արձակԵլ: Հակառակորդը հրանոթներով կրակել է նաեւ Թալիշ գյուղի ուղղությամբ: Ի՞նչ վնասներ է կրել գյուղը, եւ ընդհանրապես ինչպիսին է իրավիճակը Թալիշում, այս հարցերի շուրջ «Ժողովուրդ»-ը խոսել է Թալիշի գյուղապետ Վիլեն Պետրոսյանի հետ:
-Պարո՛ն Պետրոսյան, Ադրբեջանը շարունակո՞ւմ է կրակահերթեր արձակել Թալիշի ուղղությամբ, ինչպիսի՞ն է իրավիճակը եղել այսօր ¥հեղ.- երեկ):
-Սովորական, ես Թալիշում չեմ, բայց Թալիշում իրավիճակը նորմալ է եղել, գիշերը հանգիստ է եղել, այսօր ցերեկը հանգիստ է եղել, նոր տղաները եկան այնտեղից, կրակոցներ չկան:
-Նշվում էր, որ ադրբեջանիցները արկակոծել են Թալիշը, վնասներ շա՞տ է կրել գյուղը:
-ՉԷ՛, չէ՛, մի շենքի է մի արկ կպել ընդամենը, դե, հաշված արկեր է եկել երկու օրերի ընթացքում էլ, մի արկ է ընդամենը վնաս տվել, վնասն էլ ոչ այդքան մեծ է:
-Նոր շնեք եւ շինություններ էին կառուցվում, դրանց վնաս հասցվե՞լ է:
-ՉԷ՛, դե, նոր շինությունները վնաս չեն կրել: Առանձնատների վրա աշխատանքներ դեռ չկան, երկու շենքերի վրա են շինարարական աշխատանքներ կատարվում, դրանք էլ վնաս չեն կրել:
-Այս օրերին դադարե՞լ էին շինարարական աշխատանքները:
-Դե, չեմ կարող ասել, որ դադարել էին մասամբ, շարունակվում են:
-Այս օրերին Թալիշում բնակչություն կա՞, թե՞ տարհանվել են:
-Բնակիչները գյուղում են, բայց տղամարդիկ: Կին, երեխա, ընտանիքով մարդ չկա:

Նյութերը՝ ՎԱՀԱԳՆ ՀԱԿՈԲՅԱՆԻ

 
ՇԱՀՄՈՒՐԱԴՅԱՆԸ ԿԳՈՐԾՈՒՂՎԻ ԵՎՐՈՊԱ
ԱԺ ՀՅԴ խմբակցության պատգամավոր Կարեն Շահմուրադյանն առաջիկայում դիվանագիտական աշխատանքի է անցնելու: Նկատենք, որ այս ընտրություններում Շահմուրադյանը ՀՅԴ համամասնական ցուցակի 30-րդ հորիզոնականն է զբաղեցնում, ասել է, թե գործնականում չունի պատգամավոր դառնալու որեւէ շանս: Մինչ այդ «ժողովուրդ» օրաթերթը պատգամավորից հետաքրքրվեց, թե ինչու է ՀՅԴ-ն նրա անունը 30-րդ հորիզոնականում գրել: «Ինձ առաջարկ է արվել, ես այդ առաջարկն ընդունել եմ, բնականաբար, շեշտել էլ եմ, որ ինքս չեմ տեսնում պատգամավորական մանդատը ինքնանպատակ: Մենք մի կուսակցության մեջ ենք, եւ բոլորս էլ աշխատում ենք, որպեսզի կուսակցությունը ձայներ հավաքի: Եթե հավաքենք համապատասխան քվե, կունենանք շատ պատգամավորներ, լավ կլինի»,- նշեց պատգամավորը՝ «Ժողովուրդ»-ին տեղեկացնելով նաեւ, որ դիվանագիտական աշխատանքի կանցնի եվրոպական երկրներից մեկում, սակայն ոչ դեսպանի պաշտոնում:
Ի դեպ, նշենք, որ Կարեն Շահմուրադյանը Սերժ Սարգսյանի փեսայի՝ Վատիկանում ՀՀ դեսպան Միքայել Մինասյանի ընկերն է: Ու ենթադրվում է, որ դիվանագիտական աշխատանքի անցնելու հարցում մեծ դեր ունի հենց Մինասյանը, որն իր ընկերներին տեղավորում է այդ ոլորտում: Հիշեցնենք, որ 2013 թվականի հունվարի 29-ին Իտալիայում ՀՀ դեսպան նշանակվեց Սարգիս Ղազարյանը՝ Մինասյանի ընկերը: Դիվանագիտական աշխատանքի է անցնելու նաեւ ՄԻԱԿ կուսակցության անդամ, ԱԺ ՀՀԿ խմբակցության պատգամավոր Լեւոն Մարտիրոսյանը: Սակայն առայժմ չի հրապարակվում, թե ուր է նա մեկնելու:

ՃՈԽ ԿՈՄՈՒՆԱԼՈՎ
«Ժողովուրդ»-ը պաշտոնական փաստաթղթերից տեղեկացավ, որ ՀՀ կառավարությունը մոտ 178 մլն դրամ է հատկացնելու ընթացիկ տարվա կոմունալ ծախսերի համար: Միայն էլեկտրաէներգիայի համար կառավարությունը վճարելու է 97 մլն 231 հազար 500 դրամ, գազի համար՝ 35 մլն 813 հազար 200 դրամ, բջջային հեռախոսների ծառայությունների համար՝ 11 մլն 661 հազար 500 դրամ, իսկ ահա հանրային հեռախոսային ծառայությունների համար՝ 27 մլն դրամ: Նշենք, որ խմելու ջրի վարձը ընթացիկ տարվա համար կազմել է 5 մլն 776 հազար 200 դրամ:

ՍՏՈՒԳՈՒՄ Է
«Ժողովուրդ» օրաթերթին հայտնի դարձավ, որ ՀՀ Արարատի մարզպետարանի ներքին աուդիտի բաժինը փետրվարի 15-ից մինչեւ փետրվարի 23-ը ստուգումներ է իրականացրել Մասիսի սոցիալական ծառայության տարածքային գործակալությունում: Ներքին աուդիտի իրականացման շրջանակում ընդգրկվել է նշված մարզպետարանի աշխատակազմի Մասիսի սոցիալական ծառայության տարածքային գործակալության 2014, 2015 եւ 2016 թվականների ընթացքում իրականացրած գործառույթների համապատասխանությունը ՀՀ օրենքներին եւ այլ իրավական ակտերին, հաշվետվությունների արժանահավատությանը: Առաջիկայում պարզ կլինի, թե ծառայության պետ Վարդան Հովսեփյանը ինչ խախտումներ է թույլ տվել: