«Իմ այգին» բարեգործության եւ աջակցության հիմնադրամի հիմնադիրները դիմել են Հայաստանի Հանրապետության վարչապետ Կարեն Կարապետյանին
«Մեծարգո պարոն Վարչապետ,
Շուրջ մեկ ամիս առաջ Արցախում մեկնարկել ենք մի նախաձեռնություն, որը կոչել ենք «Իմ այգին»: Նախաձեռնության նպատակը համահայկական ներուժի՝ Արցախի զարգացմանը յուրովի մասնակից դարձնելն է: Այս դեպքում ձեւաչափը մի քիչ այլ է՝ մենք կոչ ենք անում մեր հայրենակիցներին անվանական պտղատու ծառ ունենալ Արցախում, հատկապես ազատագրված տարածքներում: Այս տարի մենք սկսում ենք Արցախի հարավից՝ Արաքսի հովտում հիմնելով նռան, արքայանարնջի եւ սերկեւիլի այգիներ:
Այս նպատակով հիմնադրել ենք «Իմ այգին» բարեգործության եւ աջակցության հիմնադրամը եւ կոչ արել մեր հայրենակիցների մասնակից դառնալ նախաձեռնությանը:
Այս կերպ փորձում ենք աջակից լինել նաեւ կյանքի կոչելու Արցախի պետական կարևորագույն ծրագիր և հավատացած ենք, որ ունենալու ենք աջակցողներ և հետևորդներ:
Հուսով ենք, որ արդեն իսկ ծանոթ եք հիմնարդամի գործունեությանը և կոչերին: Ուզում ենք տեղեկացնել Ձեզ և մեր հանրությանը, որ մենք արդեն տնկել ենք մոտ հինգ հազար նռան, սերկևիլի և արքայանարնջի տնկիներ և շարունակում ենք մեր ծառատնկման աշխատանքները՝ հավատացած լինելով, որ բոլոր ծառերն ունենալու են իրենց տերերը՝ հնարավորություն ընձեռելով մեզ շարունակել ծառատունկի աշխատանքները:
Հետևելով Ձեր գործունեությանը և կոչերին, համոզված ենք, որ Դուք անձնապես անմասն չեք մնա մեր ծրագրի և գաղափարի կյանքի կոչման գործում: Շատ կցանկանաինք, որ Դուք նույնպես ունենայիք Ձեր անվանական ծառը Արաքսի հովտում՝ համոզված լինելով, որ Ձեր այդ նախաձեռնությամբ կունենաք բազմաթիվ հետևորդներ:
Այս նամակը փոխանցում ենք Ձեզ հրապարակայնորեն, ակնկալելով, որ Դուք նույնպես մեզ կարձագանքեք հրապարակայնորեն՝ մաս կազմելով մեր ծրագրին:
Ընդամենը անհրաժեշտ է հիմնադրամի 1570025483500100 հաշվեհամարին փոխանցել 1 ծառի համար 5000 ՀՀ դրամ և Արաքսի հովտում ունենալ անվանական պտղատու ծառ»:
Ակնկալիքով եւ հարգանքով՝
16 մարտի 2017 թ.
Ք. Ստեփանակերտ
.gif)
