ՀՀ աշխատանքի և սոցիալական ապահովության պետական ծառայության գործունեության շուրջ աղմուկը դեռեւս շարունակվում է

ՀՀ աշխատանքի եւ սոցիալական ապահովության պետական ծառայության գործունեության շուրջ աղմուկը դեռեւս շարունակվում է: «Ժողովուրդ» օրաթերթին հայտնի դարձավ, որ ամբաստանյալի աթոռին է հայտնվել ՀՀ աշխատանքի եւ սոցիալական ապահովության պետական ծառայության աշխատակազմի Գորիսի սոցիալական ապահովության տարածքային բաժնի գլխավոր մասնագետի պաշտոնը զբաղեցնող Աշոտ Բաբայանը:

Պարզեցինք, որ 2014թ. դեկտեմբերին Գորիս քաղաքի բնակիչ Անահիտ Հայրապետյանը դիմել է Գորիսի սոցիալական ապահովության տարածքային բաժին եւ հայտնել, որ ցանկանում է մանկավարժական թոշակ ստանալ: Գորիսի սոցիալական ապահովության տարածքային բաժնի գլխավոր մասնագետի պաշտոնը զբաղեցնող Աշոտ Բաբայանը որոշել է ընդառաջել Անահիտ Հայրապետյանին եւ օգնել նրան մանկավարժական թոշակ ստանալ: Իսկ ինչպես է իրականացրել այդ գործառույթը: Նա Գորիսի թիվ 2 միջնակարգ դպրոցի ավագ ջոկատավարի, ապա նաեւ մանկապատանեկան կոլեկտիվի կազմակերպչի հաստիքներում աշխատած տարիների ստաժի հաշվարկը կատարելու, նշված հաստիքների նույնությունը ստուգմամբ պարզելու, ապա նրան մասնակի կենսաթոշակ նշանակելու համար 2015 թվականի մարտին Անահիտ Հայրապետյանից պահանջել է 100 հազար դրամ:
Անահիտ Հայրապետյանը նրան ասել է, որ այդ պահին չունի 100 հազար դրամ: Աշոտ Բաբայանը «գործը գլուխ» բերելու համար համաձայնության է եկել, որ Անահիտը նախ 50 հազար դրամ վճարի, իսկ երբ թոշակի հարցերը կարգավորված լինեն, կվճարի նաեւ մյուս 50 հազար դրամը:

Անահիտը համաձայնության է եկել ու 2015 թվականին Գորիս քաղաքի Կոմիտաս փողոցում Բաբայանին է տրամադրել 50 հազար դրամը:
Այս գործարքի համար Աշոտ Բաբայանին մեղադրանք է առաջադրվել ՀՀ քրեական օրենսգրքի 311-րդ հոդվածի 3-րդ մասի 1-ին կետով` կաշառք ստանալ: Այս գործով նախաքննությունը ՀՀ քննչական կոմիտեի Սյունիքի մարզի քննչական բաժնում ավարտվել է, Աշոտ Բաբայանի խափանման միջոց է ընտրվել ստորագրությամբ չհեռանալու մասին: Ի դեպ, գործը 2017 թվականի մարտի 14-ին ուղարկվել է Սյունիքի մարզի ընդհանուր իրավասության դատարան, դատավոր է նշանակվել Նապոլեոն Օհանյանը:

Նկատենք, որ 2017 թվականի ընթացքում ՀՀ գլխավոր դատախազության հրահանգով ՀՀ աշխատանքի եւ սոցիալական ապահովության պետական ծառայությունում հայտնաբերված չարաշահումների դեպքով 4 քրեական գործ կա հարուցված, որով նախաքննությունը ՀՀ քննչական կոմիտեում դեռեւս շարունակվում է:
Իսկ ՀՀ աշխատանքի եւ սոցիալական հարցերի նախարար Արտեմ Ասատրյանը, ինչպես միշտ, «ջրից չոր է դուրս գալիս»:

Քնար Մանուկյան