ԵԼՔ դաշինքի անդամները Էդմոն Մարուքյանի, Արամ Սարգսյանի և Նիկոլ Փաշինյանի գլխավորությամբ այժմ գտնվում են Արմավիրի մարզում և մի շարք համայնքներում քարոզչություն են իրականացնելու:
Ելույթ ունեցավ ԵԼՔ դաշինքի անդամ Արամ Սարգսյանը, ով նշեց, թե վստահ գիտի, թե մարդիկ ինչ են մտածում: «Ընտրություններ են, դրա համար էլ եկել ենք: Այստեղ են գալու նաև մյուսները: Գուցե մեր նման մտնեն բակերը, բայց այդ ընտրություններում պետք է ընտրություն կատարեք»,- նշեց նա:
Սարգսյանը նշեց, որ պետք է կարդան ծրագրերը և հետևություններ անեն: «Գիտեմ, որ դժվար է, քանի որ մեր երկրում շատ տնտեսագետներ անգամ այդ ուժերի թերթիկները չեն բացել, չեն համադրել ու ընտրություն անելը բավականին բարդ է»,-հավելեց նա:
Սարգսյանը նաևւ ներկայացրեց, թե ինչպես պետք է ընտրի սովորական քաղաքացին: «Անպայման մասնակցեք ընտրության. սա մեր հորդորն է, խնդրանքը: Եթե չեք ընտրում դուք, ընտրում են Ձեր փոխարեն: Եթե չեք ուզում կարդալ, կորցրել եք հույսը, ապա նայեք այն մարդկանց, ովքեր ներկայացնում են այդ կուսակցությունը»,-շարունակեց նա:
Սարգսյանի խոսքով, պետք է նայել, թե որտեղ էին այդ ուժերը 1999-ի հոկտեմբերին, 2008-ին և ինչեր էին ասում այդ իրադարձություններից հետո: «Ինչ արեցին այդ ուժերը 2008-ից հետո, գնացին կոալիցիա կազմեցին այդ իշխանությունների հետ՝ շամպայնի բաժակներ չխկացնելով, թե պայքարեցին»,- եզրափակեց նա:
.gif)
