Նովոսելցովո ջրատարի վթարը վերացվել է նախատեսված ժամկետից շուտ

Ջրամատակարարումը կվերականգնվի մարտի 31-ին` մինչև ժամը 06.00-ն Օրերս «Վեոլիա Ջուր» ՓԲԸ-ն տարածեց հայտարարություն Լոռու մարզի 13` Վահագնի, Վահագնաձոր, Ձորագյուղ, Եղեգնուտ, Փամբակ, Ձորագետավան, Գուգարք, Անտառամուտ, Կուրթան, Ամրակից, Հոբարձի, Գուլագարակ, Վարդաբլուր գյուղական համայնքների և Վանաձոր քաղաքի ավելի քան 40 տոկոս բնակչության ջրամատակարարումը մարտի 30-ին` ժամը 08.00-ից դադարեցնելու մասին:

Պատճառը Նովոսելցովո-Վանաձոր խողովակաշարի վրա տեղի ունեցած վթարներին էին: Վանաձոր-Ալավերդի ճանապարհի վրա շինարարական աշխատանքներ կատարելու ընթացքում ճանապարհաշինարարները վնասել էին 1000 մմ տրամագծով մայր ջրատարը` Փամբակ և Վահագնաձոր գյուղերը սնուցող հատվածներում:

Ջրամատակարարման բնականոն ընթացքը վերականգնելու համար անհրաժեշտ էր դադարեցնել Նովոսելցովոյից ջրի մատակարարումը: Այսօր, ինչպես և պլանավորվել էր, «Վեոլիա Ջուր» ՓԲԸ-ի «Լոռի» տեղամասի աշխատակիցները, տեխնիկական տնօրեն Արթուր Ենոքյանի գլխավորությամբ, վնասված ջրատարի 3 հատվածներում կազմակերպեցին վթարավերացման աշխատանքներ: Գործի արագ և ճիշտ կազմակերպման շնորհիվ` հաջողվեց աշխատանքները ավարտել նախատեսված ժամկետից շուտ:

«Վեոլիա Ջուր» ՓԲԸ-ն տեղեկացնում է` ջրամատակարարումը Վանաձորի` Նովոսելցովո ջրատարից սնվող թաղամասերում և վերոհիշյալ 13 գյուղերում կվերականգնվի մարտի 31-ին` մինչև ժամը 06.00-ն:

«Վեոլիա Ջուր» ՓԲԸ

Հանրային կապերի ծառայություն