ՏԵՍԱՆՅՈՒԹ. «Սա խոշտանգելու մի ա՞յլ միջոց է». կալանավորված սարիթաղցիների հարազատները նստացույց են անում դատախազության շենքի առջև

Սարի թաղում հուլիսին տեղի ունեցած միջադեպերով կալանավորվածների հարազատներն արդեն երկրորդ շաբաթն է, ինչ նստացույցի են դուրս եկել ՀՀ Գլխավոր դատախազության շենքի դիմաց:

Նրանք պահանջում են, որպեսզի 316-րդ հոդվածը փոխեն, քանի որ նրանց հարազատներից ոչ ոք այդ հանցագործությունը չի կատարել: Նստացույցի մասնակիցները պնդում են, որ իրենց հարազատները ՊՊԾ գնդի գրավման օրերին սոցիալական խնդրիների լուծման պահանջով են փողոց դուրս եկել փողոց, քանի որ Սարի թաղը երեք օր հոսանքազրկված ու ջրազրկված է եղել:

ArmLur.am-ի հետ զրույցում Էդուարդ Զեյթունյանի կինը՝ Լալա Բերնեցյանը նշեց, որ պայքարելու են մինչև վերջ, մինչև արդյունքի հասնեն: «Շարունակելու ենք այնքան ժամանակ, մինչև տղաները ազատ չարձակվեն: Ոստիկանները ցուցմունք են տալիս, որ այո եղել է կենցաղային խնդիրներ, վեճը այդտեղից է սկսվել, բայց 316-րդ հոդվածի երկրորդ մասը դիտարկվում է ծանր մարմնական վնասվածք: Սա խոշտանգելու մի ա՞յլ միջոց է»,- նշեց նա:

Խոսելով հացադուլի դիմելու մասին` Լալա Բերնեցյանն ասաց, որ չի կարծում, թե իրավիճակը դրան կհասնի, քանի որ ՀՀ գլխավոր դատախազի հետ հանդիպումից այլ տպավորություն է ստացել:

Նշենք, որ նախորդ շաբաթ ՀՀ գլխավոր դատախազ Արթուր Դավթյանն ընդունել էր սարիթաղցիներից մի քանիսին:

Իսկ եթե դատարանը հաստատի ոստիկանի նկատմամբ բռնություն կիրառելու մեղադրանքը, ապա սարիթաղցիները կազատազրկվեն 5-10 տարի ժամկետով:

Հիշեցնենք, որ 9 ամիս առաջ զինված խմբի կողմից ոստիկանության ՊՊԾ գնդի գրավումից հետո, Խորենացի փողոցից Սարի թաղ տանող ճանապարհը ոստիկանությունը փակել էր։ Սարիթաղցիները զրկված էին տրանսպորտից, չունեին նաև գազ և ինտերնետ կապ։ Հուլիսի 19-ին ոստիկանության և բնակիչների միջև տեղի ունեցան բախումներ, որից հետո 10 անձ կալանավորվեց:

Արփինե Թովմասյան