Սուքիաս Ավետիսյանը` խորհրդարան չանցնելու և նախընտրական ծախսերի մասին

ArmLur.am-ը ՀՀԿ ռեյտինգային թեկնածու Սուքիաս Ավետիսյանից հետաքրքրվել է իր խորհրդարան չանցնելու պատճառների և առաջիկա ծրագրերի մասին:

-Պարո′ն Ավետիսյան, ապրիլի 2-ին տեղի ունեցան խորհրդարանական ընտրություններ, որոնց արդյունքներով Դուք չանցաք խորհրդարան: Վերլուծե՞լ եք` ինչու չկարողացաք բավարար արդյունքի հասնել:

-Ձայներով չի որոշվում խորհրդարան անցնելը: Խորհրդարան անցնելը որոշում է կուսակցության ղեկավար մարմինը, կուսակցության նախագահը: Այնպես որ, կարևորը մենք թիմով կարողացանք ապահովել կուսակցության ընդհանուր ձայները, այդ թվում նաև Շիրակի մարզում: Բնական է, կուսակցության ղեկավարության որոշելիքն է:

-Կնշե՞ք, թե քարոզարշավի ընթացքում ինչքան գումարներ եք ծախսել և ինչպե՞ս եք այն հետ բերելու:

-Եթե գումարը ծախսում ես ընտրության համար, ուրեմն հետ վերադարձնելու մասին չպետք է մտածել, որովհետև դու գնում ես աշխատելու և ժողովրդին ծառայելու: Ի՞նչ է նշանակում` ոնց պետք է վերադարձնել:

Քանակը չեմ կարող ասել, քանակի հետ կապված կարող եք դիմում գրել կուսակցության գրասենյակ, այնտեղ հստակ կասեն` ով ինչքան գումար է ծախսել, ինչ նպատակների համար: Մենք առանձին հիմնադրամ չենք ունեցել, որ ծախսերն էլ կարողանանք ասել:

-Պարո′ն Ավետիսյան, ընտրություններից հետո Սերժ Սարգսյանը հանդիպում է խորհրդարան չանցած թեկնածուների հետ, հուսադրում նրանց: Հանդիպում Ձեզ հետ եղե՞լ է:

– Կոնկրետ հանդիպում չեմ ունեցել, նախընտրական քարոզարշավի շրջանակներում եմ հանդիպել, դրանից հետո հանդիպում չի եղել: Եթե ժամանակ գա ապա կլինի այդ հանդիպումը:

-Իսկ Ձեր առաջիկա գործունեությունը ինչպե՞ս եք պատկերացնում:

-Իմ առաջիկա գործունեությունը պատկերացնում եմ այնպես, ինչպես կորոշի կուսակցությունը: Որտեղ հարմար կգտնի, ես այնտեղ էլ կաշխատեմ և կծավալեմ իմ գործունեությունը:

Զրուցեց Արփինե Թովմասյան