Բուլղարիայում պատանի եւ երիտասարդ սուսերամարտիկները մասնակցեցին աշխարհի առաջնությանը: Երիտասարդ խոցասուսերակիրների պայքարում Էմմա Պողոսովան գրանցեց անկախ Հայաստանի լավագույն արդյունքը` հայտնվելով ուժեղագույն ութնյակում:
Հայաստանի սուսերամարտի ֆեդերացիայի գլխավոր քարտուղար եւ հավաքականի մարզիչ Արտաշես Մադոյանն ամփոփեց հայ մարզիկների ելույթները.
«Էմմա Պողոսովան շատ բարձր արդյունք գրանցեց: Նա 154 մասնակիցների պայքարում հասավ քառորդ եզրափակիչ: Սա աննախադեպ արդյունք է անկախ Հայաստանի պատմության մեջ: Մրցավայրում զարմացած էին, բոլորը շնորհավորում էին եւ խոսում մեր արդյունքի մասին: Էմմայի ամենակարեւոր մենամարտն ամերիկացի սուսերամարտիկի հետ էր, որը նրանց հավաքականի առաջատարն է: Շատ դժվար պայքարում նա մեկ միավորի առավելությամբ հաղթեց (15:14):
Մյուս մրցակիցներին եւս մեր սուսերամարտիկը հաղթել է մեկ խոցումի առավելությամբ: Պողոսովան բրոնզե մեդալի համար պայքարում մրցեց ԱՄՆ-ի մեկ այլ ներկայացուցչի հետ, բայց արդեն փոքր ինչ հոգնած էր եւ պարտվեց իրենից ավելի փորձառու մրցակցին»,- նշեց մարզիչը:
Ինչ վերաբերում է մեր մյուս մարզիկներին` Արտաշես Մադոյանը նրանց ելույթները բավարար համարեց.
«Պատանիները վատ հանդես չեկան, բավարար եմ գնահատում: Երիտասարդներ Մայքլ Հովհաննիսյանից եւ Էդուարդ Օվիկյանից ավելին էի ակնկալում: Նրանք կարող էին եւ պատրաստ էին ավելի լավ արդյունք գրանցել: Մեր սուսերամարտիկները միջազգային փորձի պակաս ունեն: Նրանք տարեկան մասնակցում են մեկ կամ երկու միջազգային մրցաշարի: Իսկ բարձրակարգ սուսերամարտիկները 20-25 մրցում են ունենում: Ցավալի է, որ մեր ներքին առաջնությունը թույլ է, մրցակցություն չկա: Դա խանգարում է մարզաձեւի զարգացմանը: Սակայն, ուրախությամբ նշեմ, որ վերջին տարիներին սուսերամարտիկների աճ է գրանցվել»,-ասաց Արտաշես Մադոյանը:
Ֆեդերացիայի գլխավոր քարտուղարը տեղեկացրեց, որ երիտասարդների հավաքականը մի քանի օրից Մինսկում կմասնակցի Մ 23 տարեկանների Եվրոպայի առաջնությանը:
.gif)
