Սեպտեմբերի 8-15-ը Սոչիում կկայանա «Նոր Ալիք 2017» երիտասարդ կատարողների մրցույթը: Հատկանշական է, որ այս տարի առաջին անգամ Հայաստանը կներկայացնեն երկու մասնակիցներ՝ «Հայաստանի Ձայնը» մրցույթի մասնակից Էռնա Միրզոյանը եւ «Դեպի Եվրատեսիլ» մրցույթից հայտնի երգչուհի Սյուզաննա Մելքոնյանը: Վերջինս «Ժողովուրդ»-ի հետ զրուցել է իր սպասելիքների, շոու-բիզնեսում լինել-չլինելու եւ այլ թեմաների շուրջ:
-Սյուզաննա, ինչպե՞ս որոշեցիք մասնակցել «Նոր Ալիք»-ին:
-Դեռես 15-16 տարեկանում հետաքրքրված էի մրցույթով, եւ, անկեղծ ասած, մասնակցելու ցանկությունս մեծ էր: Այնպես որ, որոշումս տարիների խմորումների արդյունք է: Առհասարակ, միշտ էլ երազել եմ մասնակցել միջազգային որեւէ մրցույթի: Այս տարի արդեն որոշումս հստակ էր եւ վերջնական:
-Մրցույթից ակնկալում եք հաղթանա՞կ, թե՞ դա Ձեզ համար պարզապես փորձ ձեռք բերելու հարթակ է:
-Բնականաբար, 16 տարվա պատմություն ունեցող մրցույթին մասնակցելը, երեք շաբաթ բարձրակարգ երաժիշտների հետ շփումը մեծ դպրոց կլինի, բայց պետք է խոստովանեմ՝ առաջին անգամն է, որ մասնակցում եմ որեւէ մրցույթի՝ հաղթելու նպատակով: Այլ պարագաներում երբեք ի սկզբանե այդ մասին չեմ մտածել, կարծում եմ՝ այդ պատճառով էլ չեմ հաղթել: Բայց այս անգամ ուզում եմ զգալ հաղթանակի բերկրանքը:
-«Դեպի Եվրատեսիլ»-ից հետո շատերը ճանաչեցին Ձեզ: Մտավախություն չունե՞ք, որ եթե ակտիվություն չցուցաբերեք, կարող եք մոռացվել հանդիսատեսի եւ հեռուստադիտողի կողմից:
-Աշխատում եմ երեւանյան ժամանցի լավագույն վայրերում, ունեմ իմ բենդը, եւ ինձ համար գերխնդիր չէ իրար հետեւից տեսահոլովակներ թողարկելը. հայկական իրականության այդ աժիոտաժը, անկեղծ ասած, չեմ սիրում: Թող իմ գործունեությունն ընթանա դանդաղ, հանգիստ, բայց լինի պրոֆեսիոնալ եւ գեղեցիկ: Հատկապես այս շրջանում զբաղված եմ «Նոր Ալիք»-ի նախապատրաստական աշխատանքներով, այնպես որ, չեմ կարող խոստանալ, թե առաջիկայում կհասցնեմ նկարահանել տեսահոլովակ:
-Դուք Ձեզ երաժշտական ո՞ր ժանրում եք տեսնում:
-Ես բազմաժանր երգչուհի եմ եւ չեմ սիրում սահմանափակվել մեկ ժանրով: Լավ իմաստով խառնաշփոթի սիրահար եմ: Բայց կարող եմ թվարկել մի քանի ժանր, որոնցով հաստատ հանդես կգամ՝ փոփ-ռոք, սոուլ եւ բլյուզ:
-Որքանով հասկացա՝ Դուք նախընտրում եք ոչ թե մուտք գործել շոու-բիզնես, այլ հետք թողնել երգարվեստում, ճի՞շտ է:
-Ե՛վ մեկը, ե՛ւ մյուսը: Փորձում եմ համատեղել: Սուտ կլինի, եթե ասեմ, որ չեմ ուզում մուտք գործել շոու-բիզնես, ավելին՝ ես ինձ ինչ-որ առումով համարում եմ շոու-բիզնեսի մի մասնիկ՝ սկսնակ արտիստ: Ինչ խոսք, հաճելի է լինել սիրված եւ ճանաչված:
-Իսկ Դուք գտե՞լ եք Ձեր պրոդյուսերին:
-Ես չունեմ պաշտոնական պրոդյուսեր. ինքս եմ իմ պրոդյուսերը եւ կարծում եմ՝ այսպես ավելի լավ եմ հաղթահարում այն դժվարությունները, որոնք հանդիպում են յուրաքանչյուր արտիստի: Ինձ համար կարեւորն այն է, թե ով եմ ես եւ ինչպես եմ կարողանում ինքս ինձ մատուցել: Իսկ պրոդյուսերական դպրոցի ձեւավորման համար, կարծում եմ, Հայաստանին ժամանակ է հարկավոր:
-Իսկ հիմնականում ի՞նչ խոչընդոտների եք հանդիպում:
-Անշուշտ, շատ դժվարություններ կան: Ինձ համար ամենակարեւորն այն է, որ երբեք չդավաճանեմ սկզբունքներիս եւ չդառնամ կոմերցիոն երգչուհի: Երեւի սա գլխավոր խնդիրն է, որի շուրջ ես պարբերաբար մտածում եմ, եւ, փառք Աստծո, դեռեւս ստացվում է հաղթահարել հանդիպող խոչընդոտները: Հավատացեք՝ եթե մարդ գիտի՝ ինչ է ուզում, ինչպես եւ ինչու, իր համար արդեն հաղթահարելի են բոլոր խնդիրները:
Զրուցեց ԱՆՆԱ ԲԱԲԱՋԱՆՅԱՆԸ
Ո՞ՒՐ Է ԿՈՐԵԼ ԷԼԼԱ ՏԱՐՈՒՆՑԸ
Երգչուհի Էլլա Տարունցը տեւական ժամանակ է՝ ասպարեզում չի երեւում: Երկրպագուները սկսել են անհանգստանալ եւ հետաքրքրվում են՝ ուր է կորել նա, ինչով է զբաղված: «Ժողովուրդ»-ը կապ հաստատեց երգչուհու հետ եւ պարզեց, որ նա այժմ Ֆրանսիայում է եւ դեռ մի քանի ամիս էլ կմնա այնտեղ. «Մոտ ժամանակներում Հայաստանում չեմ լինի, որոշակի ժամանակահատված կապրեմ Եվրոպայում, այստեղ մնալու համար ունեմ ե՛ւ գործնական, ե՛ւ անձնական պատճառներ: Ամեն դեպքում, այժմ ինձ մոտ ստեղծագործական բուռն շրջան է»,-պատմեց Էլլան՝ հավելելով, որ գործերից է կախված՝ երբ կվերադառնա Հայաստան:
Նա շեշտեց, որ հաճախ է բացակայում հայրենիքից, բայց կրկին վերադառնում է. այս «անհետացումն» էլ ժամանակավոր բնույթ է կրում: Ամեն դեպքում, երգչուհին օտար ափերում միայնակ չէ, այլ, ինչպես ինքը տեղեկացրեց, հարազատների շրջապատում:
Մեր այն հարցին, թե ստեղծագործական ինչ նորություններ են սպասվում, երգչուհին պատասխանեց, որ ունի մի շարք նոր երգեր. «Հուսամ՝ մոտ ժամանակներում կներկայացնեմ դրանցից գոնե մեկը՝ տեսահոլովակի տեսքով»,-ասաց նա:
Մենք նաեւ հետաքրքրվեցինք՝ Էլլան Ֆրանսիայում նոր գործեր կթողարկի՞, թե՞ ոչ. «Իմ բոլոր երգերը հիմնականում թողարկում եմ Երեւանում, իսկ արտերկրում զբաղվում եմ զուտ ստեղծագործելով, նաեւ հանդես եմ գալիս համերգներով»,-պատասխանեց երգչուհին: Նա նաեւ վստահեցրեց, որ առաջիկայում համերգով հանդես կգա նաեւ հայաստանցի հանդիսատեսի համար. «Շատ եմ կարոտել ինձ՝ հանդիսատեսի հետ կենդանի շփումը պահող երգչուհու դերում: Աստված տա՝ գա այն օրը, երբ կկարողանամ ապրել իսկական Էլլայի կյանքով»:
Երգչուհին նշեց, որ պահում է հայ համայնքի հետ կապը, սակայն, հիմնականում, անհատների միջոցով: Ի դեպ, նա նաեւ պատմեց, որ իր բնավորության համաձայն՝ տեղում չի նստել եւ ժամանակը օգատգործելով՝ նաեւ հաճելի ճամփորդություններ է ունեցել: Անդրադառնալով անձնական կյանքին՝ հետաքրքրվեցինք՝ գուցե Էլլան օտար ափերում գտել է նաեւ իր կյանքի կեսին. «Ես ամբողջական եմ եւ կեսեր չունեմ»,-կես կատակ-կես լուրջ եզրափակեց մեր զրուցակիցը:
Ա. ԲԱԲԱՋԱՆՅԱՆ
.gif)
