ԵՍ ԿԱՐԵՆ ԿԱՐԱՊԵՏՅԱՆԻՆ ԳՆԱՀԱՏՈՒՄ ԵՄ ՈՐՊԵՍ ԺԻԼԵՏՈՎ ՄԱՐԴ

«Ժողովուրդ» օրաթերթը «Հանրապետություն» կուսակցության նախագահ, «Ելք» դաշինքի անդամ Արամ Սարգսյանի հետ զրուցել է 6-րդ գումարման ԱԺ-ի կազմի, վարչապետ Կարեն Կարապետյանի գործունեության եւ այլ թեմաների շուրջ:

-Պարո՛ն Սարգսյան, արդեն վերջնականապես ուրվագծվում է 6-րդ գումարման ԱԺ-ի կազմը: Ինչպիսի՞ տպավորություններ ունեք նոր ԱԺ-ի այդ պատկերից:
-Քիչ քաղաքական, իշխանության կողմից հեշտ կառավարվող, նախորդ ազգային ժողովներից քիչ տարբերվող խորհրդարան, ու դրա հիմնական մեղավորները իշխանություններն են, որոնք այդպես էլ չհասկացան, որ թե՛ Հայաստանում առաջացած խնդիրները եւ թե՛ Լեռնային Ղարաբաղի շուրջ առաջացած խնդիրները լուծել հնարավոր է միայն ժողովրդի հետ համագործակցելով, ժողովրդի մասնակցությամբ, արդար ընտրություններով իշխանություն ձեւավորելով:
-«Ծառուկյան» դաշինքում կոնֆլիկտային մթնոլորտ է: Սակայն սպասվում էր, որ նման իրավիճակ կլինի ՀՀԿ-ի ներսում: Ինչի՞ արդյունք է սա:
-Գիտեք, նախ իմ կարծիքով՝ սա խոսում է նախնական պայմանավորվածության մասին՝ իշխանություն եւ քաղաքական կուսակցություն: Քանի որ պայմանավորվողը Ծառուկյանն է եւ գումարներն էլ ինքն է ծախսում, ինքն է որոշում, թե ով դառնա պատգամավոր, ով՝ ոչ: Ընտրական օրենքի առումով սա կոպիտ խախտում է, պատկերացնո՞ւմ եք, մարդը նոտարի մոտ ստորագրում է մի փաստաթուղթ, որը առ ոչինչ է, այսինքն՝ դա բավարար հիմք է, որ համարվի, որ ընտրություններում ի սկզբանե «Ծառուկյան» դաշինքը գնացել է կեղծիքների: Հստակ է, չէ՞, որերորդ մարդն է ասում, որ ֆեյսբուքից է իմացել, կամ չգիտեմ՝ որտեղից է իմացել, այդ գործելակերպով էլ թե՛ Հանրապետականը եւ թե՛ «Ծառուկյան» դաշինքը միմյանց նման են: Իսկապես այն կարծիքին եմ, որ շատ ավելի ճիշտ կլիներ, եթե կոալիցիա կազմեին «Ծառուկյան» դաշինքն ու ՀՀԿ-ն, քան ՀՅԴ-ն, որովհետեւ շատ-շատ նմանություններ ունեն, ճիշտ է՝ ՀՅԴ-ն էլ նմանություններ ունի, բայց նրանք չէին կարող այդպիսի բան անել, պատմություն, կենսագրություն ունեցող կուսակցություն է, որտեղ որոշակի սկզբունքներ կան, որոնք չորով պահվում են: Իսկ այս երկու կուսակցություններում չկա որեւէ սկզբունք, չկա որեւէ խաղի կանոն, շեֆը ոնց կասի, այդպես է ճիշտ, շեֆը կորոշի, կմտնեմ, չի որոշի, չեմ մտնի, այս տարբերակն է:
-Պարո՛ն Սարգսյան, եթե այդ դաշինքը նույնացնում եք ՀՀԿ-ի հետ, այդ դեպքում ինչպե՞ս եք պատրաստվում նրանց հետ համագործակցել Աժ-ում: Նկատենք, որ Էդմոն Մարուքյանը լրատվամիջոցներից մեկի հետ զրույցում օրերս նշել է, որ խորհրդարանում համագործակցելու եք այդ ուժի հետ:
-Առաջին բանը ԱԺ-ում այն է լինելու, որ առաջարկելու ենք ստեղծել հանձնաժողով ընտրությունների ժամանակ տեղի ունեցած ընտրախախտումները, ոստիկանության անգործունեությունը փողաբաժանության խնդրում քննելու համար, մենք ասում ենք, որ վստահ ենք՝ բազմաթիվ ոստիկաններ ուղղակի գրավոր ցուցումներ են ուղարկել ոստիկանության կենտրոնական բաժին, որ իրենց այս-այս թաղամասերում այս-այս մարդիկ գումար են բաժանում, եւ ուզում ենք հանձնաժողով ստեղծել եւ ուսումնասիրել այդ փաստաթղթերը: Մենք այս նախագիծը, որ սարքենք, առաջարկելու ենք «Ծառուկյան» դաշինքին, բոլորին, ուզում է՝ Հանրապետականն էլ միանա, եթե ինքն արդարության կողմնակից է, եթե ՀՀԿ-ն չմիանա, դա բնական եւ հասկանալի է, որովհետեւ իր ոստիկանը, իր թաղայինը, իր փող բաժանողը… բայց «Ծառուկյան» դաշինքը, որ հայտարարել է, թե ընդդիմություն է, դա արդեն անհասկանալի կլինի:
-Այսինքն՝ միայն ա՞յդ մասով եք համագործակցելու:
-Համագործակցություն ասելով՝ բոլոր այն նախագծերը, ինչը բխում է հանրության շահերից, երկրի շահերից, որը մենք կբերենք ԱԺ, այն բոլոր ուժերին, որոնք համարում են, որ իրենք ընդդիմություն են, մենք պետք է առաջարկենք, որ ոչ միայն քննարկվի, այլեւ քվեարկվի ի օգուտ դրան, որպեսզի դրանից որոշակի օգուտ գա ժողովրդին: Ես նորից եմ ասում, որ եթե «Ծառուկյան» դաշինքը կբերի օրենք, որը բխում է ժողովրդի շահերից եւ լավ մշակված է, այնտեղ էլ կան խելոք մարդիկ, գրագետ մարդիկ, ովքեր օրենքների հետ աշխատել գիտեն, բազմաթիվ օրենսդրական նախաձեռնություններ են արել, մենք էլ կմիանանք այդ օրենքներին եւ կողմ կքվեարկենք: Այսինքն՝ խնդիրը դրանում չէ, որ «Ելք» դաշինքը մտել է Աժ, որպեսզի ցանկացած փաստաթուղթ, որ ինքը չի բերել, դրան դեմ քվեարկի, ընդհակառակը, մենք մտել ենք եւ փորձելու ենք մեր ունեցած ուժերի սահմաններում մաքսիմալ օգտակար լինել:
-Նոր ԱԺ-ի առաջին նիստի օրը հրաժարական է տալու նաեւ կառավարությունը: Որպես նախկին վարչապետ՝ ինչպե՞ս կգնահատեք Կարեն Կարապետյանի գործունեության անցած ամիսները:
-Ես Կարեն Կարապետյանին գնահատում եմ որպես ժիլետով մարդ, ուրիշ որեւէ կերպ չեմ գնահատում:
-Այսինքն՝ արդյունավե՞տ չի եղել նրա գործունեությունը:
-Ինչքան ուզում եմ իրենից ինչ-որ բան հիշել, հիշում եմ հարվածային գործիքները եւ ժիլետը:
-Իսկ ի՞նչ ենթադրություններ ունեք՝ Կարապետյանը կշարունակի՞ ղեկավարել գործադիր մարմինը 2018-ից հետո:
-Իմ կարծիքով ռուսական կապիտալը եւ այդ կապիտալի տեր հայկական շրջանակներն այսօր բաժանած ունեն ՀՀ իշխանությունը, իրենք ուզում են այդ բաժանածը հարյուր տոկոս զավթել եւ այդ ենթատեքստում որպես էլեմենտ, ֆիգուր շախմատային, օգտագործում են նաեւ Կարեն Կարապետյանին: Բայց Կարեն Կարապետյանը ինքը չէ այդ ֆիգուրը, այսինքն՝ կա կապիտալ, որը ներդրումների խոստումներով եւ այլն, ուզում է 100 տոկոս բաժնեմասը վերցնի այս երկրի, դառնա իր սեփականությունը, հետո գուցե որոշեն անունն էլ փոխել այս երկրի, Հայաստանի փոխարեն դնեն իրենց ֆիրմային անունը: Այսինքն՝ այսպիսի մտածելակերպ ունեցող մարդկանց թիմ է, որը այդ շրջանակում անուղղակի մարդիկ ունի, որոնք հայտարարում են, թե ճիշտ կլինի, որ Հայաստանը դառնա ՌԴ-ի մաս, կամ մտնենք ռուբլու գոտի, եւ այս տեսակները, ցավոք, մեր երկրում կան, եւ ինչքան շուտ այս տեսակներից ազատվենք, ինչքան շուտ դեպի մեր անկախությունը քայլեր անենք, այնքան լավ:

 
ԱՐԹՈՒՐ ԲԱՂԴԱՍԱՐՅԱՆՆ ԻՐ «ԶՈՐՔԻՑ» Ո՞ՒՄ ԿԱՇԻՆ Է ՔԵՐԹԵԼ

Նախքան խորհրդարանական ընտրությունները «Հայկական վերածնունդ» կուսակցության ղեկավար Արթուր Բաղդասարյանը կուսակցության 2-րդ համագումարին մասնակցող պատվիրակներին «սպառնացել» էր քերթել կաշիները, եթե լավ չաշխատեն:

«Դուք իմ զորքն եք, պայքարի ու պատասխանատվության կոչ եմ անում: Կաշիներդ քերթելու եմ, եթե լավ չաշխատեք: Պետք է լավ աշխատենք՝ մեր հայրենիքի եւ զավակների համար»,- նշել էր Արթուր Բաղդասարյանը: Հայտարարությունից երկու ամիս անց տեղի ունեցած ընտրությունների արդյունքում «Հայկական վերածնունդ» կուսակցությունը անհաջողության մատնվեց՝ հավաքելով բավականին քիչ՝ 58 հազար 265 քվե, ինչը ԱԺ մուտք գործելու համար սահմանված շեմից հեռու էր: Ընտրություններից հետո ՀՎԿ-ն հանդես եկավ համապատասխան հայտարարությամբ՝ նշելով, որ ընտրակաշառքներ են բաժանվել եւ այլն, բայց եւ ասելով, որ ընտրությունների արդյունքները չեն վիճարկելու: «Ժողովուրդ» օրաթերթը փորձեց պարզել՝ արդյո՞ք Արթուր Բաղդասարյանը բարկացել է իր «զորքի» վրա եւ կրկին ԱԺ-ում չհայտնվելու պատճառ է համարում նաեւ վատ աշխատանքը: Եւ, ընդհանրապես, որեւէ մեկի «կաշին քերթե՞լ է», թե՞ ոչ: Կուսակցության մամուլի խոսնակ Էդգար Առաքելյանը «Ժողովուրդ»-ի հետ զրույցում նշեց, որ ընտրություններից հետո տեղի ունեցած վարչության նիստի արդյունքներով հայտարարություն են տարածել, եւ այնտեղ ամեն ինչ գրված է: Իսկ մեր հարցին՝ արդյոք կաշի քերթելու դեպք չի՞ գրանցվել, Առաքելյանը արձագանքեց. «Դա հումոր էր, եւ դրա մասին բազմիցս ասվել է»:

Նյութերը՝ ՎԱՀԱԳՆ ՀԱԿՈԲՅԱՆԻ

 
ՈՒԺԻ ՄԵՋ Է
«Ելք» դաշինքի ցուցակը գլխավորող Նիկոլ Փաշինյանն օրերս հարցադրում էր հնչեցրել, թե ինչո՞ւ է քաղաքապետարանը «Փյունիկ» հիմնադրամին գումարներ հատկացնում, եւ երբ լրագրողներից մեկը Տարոն Մարգարյանից հետաքրքրվել էր այդ մասին, քաղաքապետն ասել էր, թե Փաշինյանը թող նամակով դիմի իրեն: «Ժողովուրդ» օրաթերթն էլ Նիկոլ Փաշինյանից փորձեց պարզել, թե ինչպե՞ս է արձագանքում քաղաքապետի այդ հայտարարությանը եւ արդյոք պատրաստվում է նամակով շփվել Մարգարյանի հետ. «Ի՞նչ ասեմ, ինքն իր հարցին պատասխանել է, ես ի՞նչ պատասխանեմ: Ես ամեն օր արձագանքում եմ, նոր բան ասելու անհրաժեշտություն չկա, իմ բանավեճի պատրաստակամությունը քաղաքապետի թեկնածուների ֆորմատով ուժի մեջ է, եւ ես արդեն ասել եմ, թե ինչու են իրենք հրաժարվում բանավեճից»,- ասաց քաղաքապետի թեկնածու Նիկոլ Փաշինյանը:
 

ԽՆՁՈՐԸ` ՀՔԾ-ՈՒՄ
Մաքսանենգ ճանապարհով ՀՀ մուտք գործած ադրբեջանական ծագում ունեցող խնձորների մասով ՊԵԿ-ում հարուցվել է քրեական գործ՝ ՀՀ քրեական օրենսգրքի 311-րդ հոդվածի կաշառք ստանալու հատկանիշներով, հետո այն ուղարկվել է ՀՀ գլխավոր դատախազություն` քննչական ենթակայության հարցը լուծելու համար: Երեկ «Ժողովուրդ» օրաթերթին հայտնի դարձավ, որ այս թեմայի շուրջ իրավապահ համակարգում քննարկումներ են եղել, եւ որոշում է կայացվել գործը ՀՀ հատուկ քննչական ծառայություն ուղարկելու մասին: Այս գործը ՀՔԾ-ն կքննի, քանի որ դրանում խառնված են սահմանային հսկողություն իրականացնող պաշտոնատար անձինք: Հիշեցնենք՝ պարզվել էր, որ ապօրինի ձեռնարկատիրությամբ զբաղվող անձինք առեւտուր իրականացնելու նպատակով պարբերաբար հատել են սահմանը, մաքսային ձեւակերպումներից խուսափելու նպատակով Բագրատաշենի մաքսակետում ՊԵԿ նախաբացթողումային հսկողության վարչության որոշ աշխատակիցների կաշառք տալու միջոցով գյուղմթերքը ներկրել են հանրապետություն:
 

ԱԶԱՏ ԴԱՀԼԻՃ ՉԿԱ
Հայաստանի դատարաններում աննախադեպ վիճակ է ստեղծվել. դատական նիստերը հետաձգվում են ոչ այլ ինչ, քան դահլիճները զբաղված լինելու պատճառով: «Ժողովուրդ»-ի տեղեկություններով` Աջափնյակ եւ Դավիթաշեն վարչական շրջանների ընդհանուր իրավասության դատարանում ՀՀԿ-ական նախկին պատգամավոր Առաքել Մովսիսյանի բարեկամի՝ Ռոբերտ Մովսիսյանի գործով դատական նիստը երեկ չի կայացել, քանի որ դատարանում ազատ դահլիճ չի եղել: Հիշեցնեք՝ Ռ. Մովսիսյանը մեղադրվում է դատապարտյալի պայմանական վաղաժամկետ ազատ արձակելու համար վերջինիս հարազատներից գումար վերցնելու մեջ: Սակայն նկատենք, որ այս իրավիճակը նաեւ զարմանալի չէ այն տեսանկյունից, քանի որ զգալի աճել է հանցագործությունների թիվը, ըստ այդմ, նաեւ ավելացել դատարանների ծանրաբեռնվածությունը: