Լուսանկարն արվել է Ազգային Ժողովում
Երեկ տեղի ունեցավ 6-րդ գումարման խորհրդարանի առաջին նիստը: Ինչպես երեւում է՝ Աժ ՀՀԿ պատգամավոր Կարեն Ավագյանը շատ երջանիկ է, պատճառն էլ պարզ է. նա նորից ընտրվել է 6-րդ գումարման խորհրդարանի պատգամավոր:
ՀԱՐՑ. Ես ուզում եմ իմանալ` ի՞նչ սկզբունքով է կարգավորվում անձի մասնակցությունը կուտակային բաղադրիչին, եթե նա չունի բազային եկամուտ:
Սոնյա Հայրապետյան (53 տարեկան)
ՊԱՏԱՍԽԱՆ. Ս. Հայրապետյանի հարցին ի պատասխան` տեղեկացնում ենք, որ եթե անձը չունի բազային եկամուտ, ապա նա չի կատարում նպատակային սոցիալական վճար: Այնուամենայնիվ, այդ անձինք չեն զրկվի պետական կենսաթոշակային համակարգից կենսաթոշակ ստանալու իրավունքից եւ 65 տարին լրանալուց հետո ձեռք կբերեն սոցիալական կենսաթոշակի (նպաստի) իրավունք: Իսկ եթե անձն ունենա 10 եւ ավելի տարվա աշխատանքային ստաժ, ապա նա կստանա աշխատանքային կենսաթոշակ:
Կենսաթոշակային համակարգի իրազեկման կենտրոն
«ԺՈՂՈՎՈՒՐԴ». Տեղեկացնենք, որ բազային եկամուտը համախառն եկամտի մեջ ներառվող՝ աշխատանքի վարձատրության եւ դրան հավասարեցված այլ վճարումների, ձեռնարկատիրական եւ նոտարական գործունեությունից ստացման ենթակա եկամուտների հանրագումարն է (աշխատանքի վարձատրության եւ դրան հավասարեցված այլ վճարումների ցանկը սահմանում է Հայաստանի Հանրապետության կառավարությունը):
ՀԱՐՑ. Խնդրում եմ ասեք` ուսանողները կրթաթոշակ ստանալու իրավունք ունեն, թե՞ ոչ: Եթե այո, ապա ուզում եմ իմանալ` ո՞ր ուսանողները կարող են ստանալ, ո՞ւմ է տրվում կրթաթոշակ:
Իրինա Մարտիրոսյան (42 տարեկան, վաճառողուհի)
ՊԱՏԱՍԽԱՆ. Տեղեկացնում ենք, որ պետական կրթաթոշակը պետական ֆինանսական խրախուսանք է, որը մրցութային կարգով տրվում է միջին մասնագիտական ուսումնական հաստատության ուսանողին՝ գերազանց եւ լավ առաջադիմության, հասարակական ակտիվության, պատշաճ վարքագիծ դրսեւորելու համար, ինչպես նաեւ սահմանամերձ կամ բարձր լեռնային բնակավայրերի ուսանողներին:
Ուսանողների հասարակական ակտիվությունը բնութագրող ցուցանիշներ են համարվում՝
1) մասնակցությունն ուսումնական հաստատության ուսանողական, հասարակական աշխատանքներին.
2) զեկուցումները, ռեֆերատները, հրատարակած աշխատանքները (գիտական ամսագրերում եւ զանգվածային լրատվության միջոցներում).
3) մասնակցությունը միջքոլեջային, քաղաքային, հանրապետական եւ միջազգային մրցույթներին, օլիմպիադաներին, ուսանողական գիտական նստաշրջաններին, ուսանողական շինարարական ջոկատների աշխատանքներին.
4) այլ ստեղծագործական նախաձեռնություններ՝ միջին մասնագիտական ուսումնական հաստատության հայեցողությամբ:
Նախնական մասնագիտական (արհեստագործական) ուսումնական հաստատությունում պետական կրթաթոշակը տրվում է ուսանողական նպաստի համակարգում ընդունված ուսանողին: Պետության կողմից կրթաթոշակ տրվում է ՀՀ պետական բյուջեից ֆինանսավորվող ուսումնական հաստատությունների ուսանողներին: ՀՀ պետական բյուջեից չֆինանսավորվող ուսումնական հաստատություններում կրթաթոշակի հատկացման մասին որոշումն ընդունում է հիմնադիրը:
ՀՀ կրթության եւ գիտության նախարարություն
«ԺՈՂՈՎՈՒՐԴ». Ավելացնենք, որ բարձրագույն ուսումնական հաստատություններ ընդունված եւ ընտանիքների անապահովության սահմանային միավորից բարձր միավորներ ունեցող 1-ին կուրսի ուսանողներին, ըստ սահմանված չափերի, համապատասխան փաստաթղթերի առկայության դեպքում տրամադրվում է պետության կողմից ուսանողական նպաստի ձեւով ուսման վճարի մասնակի փոխհատուցում:
.gif)
