Ազգային ժողովի առանցքային պաշտոնների ընտրություններից հետո սկսեցին լուրեր շրջանառվել, թե Հայաստանի հանրապետական կուսակցության ներսում եւս եղել են մարդիկ, ովքեր դեմ են քվեարկել իրենց կուսակցության թեկնածուներին: Արդյո՞ք այդ հանգամանքը մտահոգությունների եւ ներկուսակցական քննարկումների առիթ չի դարձել. այս եւ այլ հարցերի շուրջ «Ժողովուրդ»-ը զրուցել է ԱԺ փոխնախագահ Էդուարդ Շարմազանովի հետ:
-Պարո՛ն Շարմազանով, քաղաքական գործիչներից շատերի կարծիքով 6-րդ գումարման ԱԺ-ն դադարում է քաղաքական մարմին լինել: Ինչպե՞ս կպատասխանեք նման պնդմանը:
-Ծանոթ եմ մեր գործընկերների նման գնահատականներին եւ բնականաբար համամիտ չեմ: Ազգային ժողովը չի կարող դադարել քաղաքական մարմին լինելուց, որովհետեւ ազգային ժողովը ձեւավորվել է քաղաքական ընտրությունների արդյունքում, կուսակցական համամասնական ընտրությունների արդյունքում, եւ այսօր ԱԺ-ն ձեւավորել են այն ուժերը, ում որ ժողովուրդը ձայն է տվել: Հիմա մեկի դուրը կգա, մյուսի դուրը չի գա, դա ճաշակի հարց է: Մենք ունենք այն, ինչ որ ունենք: Կա չորս քաղաքական խմբակցություն՝ երկուսը կոալիցիոն, երկուսն ընդդիմադիր, կարծում եմ, որ այս ազգային ժողովը դեռեւս կապացուցի, որ ինքը ե՛ւ քաղաքական մարմին է, ե՛ւ արժանիորեն կարող է լուծել այն խնդիրները, որոնք Սահմանադրությամբ եւ ԱԺ կանոնակարգ օրենքով դրված են իր վրա: Բնականաբար ես գտնում եմ, որ կոռեկտ չէ համեմատել այս եւ նախորդ խորհրդարանները, ամեն մեկն իր առավելությունները եւ թերություններն ունի:
-ԱԺ փոխնախագահների, հանձնաժողովների նախագահների ընտրության արդյունքները մտածելու առիթ չե՞ն տվել ՀՀԿ-ին: Որոշ դեպքերում ակնհայտ դարձավ, որ անգամ ՀՀԿ-ականներն են եղել դեմ քվեարկողների մեջ:
-Ոչ մի մտածելու առիթ էլ չեն տվել: Ես նախ շնորհակալ եմ բոլոր խմբակցություններին, որովհետեւ ՀՀԿ խմբակցությունը 58 հոգի է, իսկ ես, օրինակ, 84 ձայն եմ ստացել, սա վստահություն է ներշնչում, որ մենք կարողացել ենք միասին աշխատել:
-Օրինակ՝ Արմեն Աշոտյանին կողմ քվեարկեցին 56 հոգի:
-Ես կարծում եմ, որ Արմեն Աշոտյանին հանրապետականները բոլորն էլ ձայն են տվել:
-Այսինքն՝ Դուք վստահ եք Ձեր կուսակիցների վրա եւ կարծում եք, որ հանրապետականները բոլորն էլ կո՞ղմ են քվեարկել Ձեր թեկնածուներին:
-Ես կարծում եմ, որ այն հրապարկումները, թե 10-20 հոգի Աշոտյանին ձայն չեն տվել, չեն համապատասխանում իրականությանը: Հանրապետականները 51 հոգի են, կարծում եմ, որ այդ օրը քվեարկել են, իսկ Աշոտյանը ստացել է 56 ձայն: Ես մեր կուսակցականներից որեւէ մեկին չեմ կասկածում:
-Պարո՛ն Շարմազանով, անդրադառնանք Սերժ Սարգսյանի՝ ԱԺ առաջին նիստի օրը հնչեցրած ուղերձին: Սարգսյանն իր ելությում խոսեց ծրագրերի մասին, որոնք պետք է կատարվեն մինչեւ 2040 թվականը: Որտեղի՞ց այդ վստահությունը, որ մինչեւ այդ Դուք եք լինելու իշխանության ղեկին:
-Շատերը չեն հասկացել նախագահի ելույթի ուղերձը: Նախագահը որ ասում է՝ մինչեւ 2040 թվական, չի ասում, որ Հանրապետականը պիտի /իշխանություն /ունենա: Նախագահը, որպես պետության առաջնորդ, երկարաժամկետ ռազմավարական ծրագիր է դնում: Ինչի Միացյալ Նահանգներում, որ մինչեւ 2050 թվականը ծրագիր են անում, կամ չինացիք, որ չինական պատը սարքում են, մտածո՞ւմ են, որ մինչ այդ մնալու են իշխանության: Այսինքն՝ մենք պետք է մարտավարական քայլերից գնանք դեպի ռազմավարական: Եւ նախագահի ելույթի ամենամեծ մեխն այն է, որ մենք պետք է կարողանանք մեր առջեւ, մեր պետության առջեւ երկարաժամկետ խնդիրներ դնել անկախ նրանից, թե որ ուժը կլինի իշխանության, մենք պետք է ունենանք տեսլական, եւ ես համոզված եմ, որ նախագահի դրած չափանիշի տեսլականի հետ որեւէ քաղաքական ուժ չի կարող չհամաձայնել, ասել, որ 3 միլիոնը չպետք է դառնա 4 միլիոն, որեւէ մեկը չի կարող ասել, որ կոռուպցիայի դեմ չպետք է պայքարենք, որեւէ մեկը չպետք է ասի, որ Արցախի հարցը այսպես պետք է լուծել: Սա նորություն է, եւ ես սա ողջունում եմ: Իմ նախկին ելույթներում ես բազմիցս ասել եմ, որ ճիշտ կլինի, որ մենք երկարաժամկետ որոշումներ կայացնենք: Մի անգամ էլ, որպես պատմաբան, ես ասել եմ, որ պետք է կարողանանք օրինակ վերցնել Չինաստանից: Չինացիք ինչու են այս ձեւ, որովհետեւ չինական արքան, երբ սկսում էր մեծ պատը ստեղծել, ինքը նույնիսկ համոզված չէր, որ իր որդին կտեսնի, բայց ինքը գնում էր այդ քայլին, ինքը չէր ասում, որ ես չպետք է տեսնեմ, ուրեմն չի կառուցվելու: Չինական պատը մի քանի հարյուրամյակ կառուցվել է, չէ՞, բայց նախաձեռնողը հասկացել է, որ դա պետք է արվի: Անպայման չէ, որ ՀՀԿ-ն 2040 թվականին լինի: ՀՀԿ-ի համար նպատակը դա չէ, որ 2040-ին լինի: Վաղը կարող է նպատակ դնենք մինչեւ 2050-ը:
-Բայց վստա՞հ եք, որ ճգնաժամ չի լինի այդ ընթացքում, որոհետեւ 2008-ին էլ էին խոստումներ հնչում, որոնք չկատարվեցին, իսկ պատճառաբանությունը մեկն էր՝ ճգնաժամ եղավ:
-Կապ չունի: Մեր հերն անիծում է միջակությունը: Մենք չպետք է հարմարվենք միջակությանը: Մենք պետք է կարողանանք հստակ ազգային ռազմավարական նպատակներ դնել, երկարաժամկետ, որովհետեւ մեր պրոբլեմները երկարաժամկետ են: Եթե Ձեզ թվում է, որ Ղարաբաղի հարցը լուծեցինք, այլեւս Թուրքիայի եւ Ադրբեջանի հետ պրոբլեմ չենք ունենալու, այդպես չէ: Մենք ապրում ենք երկու թուրքական պետությունների մեջտեղում: Այսօր մեր տարածքների 87 տոկոսը փակ է, 13 տոկոսն է բաց: Մենք պետք է չափանիշ դնենք: Մենք պետք է նպատակ դնենք ու գնանք դրան:
-Սարգսյանը նշեց նաեւ, որ 1990-2015 թթ.-ին Հայաստանի ՀՆԱ-ն աճել է: Բայց, օրինակ, ՀԱԿ փոխնախագահ Լեւոն Զուրաբյանի պնդմամբ՝ Սարգսյանի օրոք եղել է 0 տոկոս աճ: Ի՞նչ կասեք այս մասին:
-Ուրեմն Լեւոն Զուրաբյանն իր կարծիքն ասելու իրավունք ունի,Դուք բացեք նոյեմբերի 26-ի ՀՀԿ համագումարին նախագահ Սարգսյանի ելույթը, եւ այնտեղ բոլոր փաստերը կան:
-Այսինքն՝ վստահեցնում եք, որ Սարգսյանի իշխանության տարիներին եւս աճ եղե՞լ է:
-Ես հիմք չունեմ վստահելու պարոն Զուրաբյանին եւ չվստահելու իմ նախագահին:
ԻՆՉՈ՞Ւ ԴԱՇԻՆՔՈՒՄ ՀԵՆՑ ԱՅԴ ԵՐԵՔԻՆ ՉՆԵՐԵՑԻՆ
Մայիսի 19-ին՝ 6-րդ գումարման ԱԺ գործունեության երկրորդ օրը, ԱԺ նախագահ Արա Բաբլոյանը հայտարարեց, որ «Ծառուկյան» դաշինք խմբակցության պատգամավորներից երեք հոգի ինքնաբացարկի դիմումներ են ներկայացրել՝ Խաչիկ Մանուկյանը, Արտյոմ Ծառուկյանը եւ Հարություն Ղարագյոզյանը: Նրանք այն ութ ըմբոստներից էին, ովքեր համարձակվել էին գնալ ԿԸՀ եւ վերցնել նախօրոք գրած ինքնաբացարկի դիմումները:
Եթե ութն էին ըմբոստացողները, ապա ինչո՞ւ դաշինքում որոշվեց չներել հենց այս երեքին:
ԱԺ «Ծառուկյան» դաշինք խմբակցության քարտուղար Վահե Էնֆիաջյանը վստահեցրեց, որ պարզապես այդ երեք հոգին են դիմում գրել, դա իրենց ցանկությունն է եղել, եւ իրենք հարգել են նրանց ցանկությունը: «Սա մեր կուսակցության, մեր քաղաքական թիմի ներքին հարցերը եւ ներքին աշխատանքներն արդյունավետ ծավալելու համար է»,- վստահեցրեց Էնֆիաջյանը եւ հորդորեց մնացածների հետ կապված հարցերը ուղղել հասցեատերերին: Երեկ ողջ օրվա ընթացքում փորձեցինք կապ հաստատել թե՛ Խաչիկ Մանուկյանի եւ թե՛ Հարություն Ղարագյոզյանի հետ, սակայն վերջիններս անպատասխան թողեցին մեր զանգերը:
Այնուամենայնիվ, քանի որ դաշինքի առաջնորդ Գագիկ Ծառուկյանը հայտարարել էր, որ վեց հոգու ինքն է ասել, որ գնան եւ հետ վերցնեն իրենց դիմումները, «Ժողովուրդ»-ը Էնֆիաջյանից հետաքրքրվեց՝ այդ դեպքում ինչո՞ւ երեքը հրաժարվեցին իրենց մանդատից, քանի որ եթե ութից 6-ին Ծառուկյանն էր ասել, նշանակում է, որ երկուսը պետք է հրաժարվեին. «Ես մի բան կարող եմ ասել, որ «Ծառուկյան» դաշինքում կա աշխատանքային մթնոլորտ, կա արդարության մթնոլորտ, եւ մենք տրամադրված ենք առաջիկայում մեր ծրագրերն իրականացնել: Որեւիցե տարաձայնություններ չկան»,- վստահեցրեց խմբակցության քարտուղարը:
Նյութերը՝ ՎԱՀԱԳՆ ՀԱԿՈԲՅԱՆԻ
ՆԱԵՎ ՊՐԻՄԻՏԻՎ ՄԻՋՈՑՆԵՐՈՎ
ՀՀ ՊՆ պաշտպանական քաղաքականության վարչության պետ Լեւոն Այվազյանը երեկվա ասուլիսի ժամանակ անդրադարձել է սահմանի տեխնիկական հագեցվածությանը: Նրա խոսքերով՝ 2016-ի ապրիլյան պատերազմից հետո ղարաբաղա-ադրբեջանական շփման գծում եւ հայ-ադրբեջանական պետական սահմանին անվտանգությունը բարձրացնելուն ուղղված քայլեր են արվում, եւ արդեն տեղադրվել են տեսադիտարկման համակարգեր, որոնք թույլ են տալիս վերահսկելի դարձնել հակառակորդի շարժն ու ավելի անվտանգ դարձնել զինծառայողների ծառայության պայմանները: «Չնայած այս ամենին՝ համակարգը դեռեւս կատարելագործվելու տեղ ունի եւ այդ նպատակով աշխատանքներ են տարվում,-ասել է նա՝ հավելելով, որ տեսադիտարկման սարքեր հիմնականում տեղադրվել են ղարաբաղա-ադրբեջանական շփման գծում. -Դա մի քանի աստիճան ավելացրել է շփման գծում վերահսկելիության, հակառակորդի շարժին հետեւելու մեր հնարավորությունները»: Այվազյանը չի հերքել, որ նորագույն տեխնոլոգիաների հետ միասին շարունակում են կիրառել նաեւ պահածոների տարաներ՝ նշելով, որ պահածոների տարաները պրիմիտիվ, բայց արդյունավետ միջոցներ են. «Դրանք թեեւ պրիմիտիվ միջոցներ են, բայց կարող եմ ուղղակի ասել, որ արդյունավետ են: Եթե դա աշխատում է, եթե օգուտ է տալիս, բարձր տեխնոլոգիական միջոցների կողքին կարող են լինել նաեւ նման միջոցներ, որոշ տեղերում դրանք անհրաժեշտ են»:
ԳՈՐԾ ՉԵՆ ԱՆՈՒՄ
Տեւական ժամանակ է՝ Ջրառատ համայնքում ՕՐՕ դաշինքի համակիրների եւ ՀՀԿ-ական գյուղապետի թիմակիցների միջեւ տեղի ունեցած միջադեպի գործով որեւէ քննչական գործողություն չի իրականացվում: «Ժողովուրդ» օրաթերթի հետ զրույցում միջադեպի արդյունքում տուժող ճանաչված Մանվել Մելքոնյանը եւս հայտնեց, որ երկար ժամանակ է, ինչ որեւէ տեղեկություն չունի, եւ իրենց էլ որեւէ բան չեն հայտնել: Գրել էինք, որ միջադեպի մասնակիցներ Մելքոնյանները իրավապահներին ցուցմունք էին տվել, որ բողոք չունեն: ՀՀ փոխոստիկանապետ Լեւոն Երանոսյանը, ինչպես նաեւ նրա եղբայրը` Լեռնիկ Երանոսյանը եւս գրել էին, որ բողոք չունեն: Ըստ էության, գործին հանգուցալուծում տալու համար իրավապահներին անելանելի վիճակի մեջ է գցել գյուղապետի տեղակալ Տիգրան Սարգսյանը, որն այդ օրը ապօրինի զենքից կրակոցներ էր արձակել:
«ՆԱԻՐԻՏԸ» ՎԱՃԱՌՈՒՄ Է ԳՈՒՅՔԸ
«Ժողովուրդ» օրաթերթին հայտնի դարձավ, որ մայիսի 19-ին «Նաիրիտ գործարան» ՓԲԸ-ի գույքի աճուրդը մասնակի է կայացել: Արդյունքում, հունիսի 9-ին կկայանա ընկերության կրկնաճուրդը բաց դասական եղանակով: «Ժողովուրդ»-ի տեղեկություններով՝ վաճառքի են հանվել սարքավորումներ, հաստոցներ, պահեստամասեր` վենտիլներ, փականներ, քիմիական նյութեր, տարողություններ եւ այլն: Հիշեցնենք, որ «Նաիրիտ գործարան» ՓԲԸ-ն սնանկ է ճանաչվել դեռեւս անցած տարի: Ընկերությանը սնանկ ճանաչելու պահանջով դատարան էր դիմել «Հայաստան էլեկտրական ցանցեր» ՓԲԸ-ն:
.gif)
