ՀՀ ԿԱ քաղաքաշինության պետական կոմիտեի նախագահի տեղակալ Արմեն Ղուլարյանն ընդունել է Զարգացման ֆրանսիական գործակալության (ԶՖԳ) տարածաշրջանային գրասենյակի տնօրեն Գայել Ասայագին:
ԶՖԳ առաքելության նպատակը Հայաստանում իրականացվող էներգաարդյունավետ և էներգախնայող շինարարության ոլորտի ծրագրերին ծանոթանալն էր, այս համատեքստում՝ Կոմիտեի հետ հնարավոր համագործակցության ուղղությունները նախանշելը:
Հանդիպման ընթացքում ՀՀ ԿԱ քաղաքաշինության պետական կոմիտեի բնակարանային քաղաքականության և կոմունալ ենթակառուցվածքների, շինարարության և գիտատեխնիկական նորմավորման վարչությունների պատասխանատուները համակողմանի ներկայացրել են էներգաարդյունավետ շինարարության բնագավառում Կոմիտեի կողմից իրականացված և ընթացքի մեջ գտնվող ծրագրերը, համապատասխան օրենսդրական և նորմատիվային դաշտի կարգավորման ուղղությամբ կատարված աշխատանքները, անդրադարձել այդ խնդիրների լուծման համատեքստում առկա խոչընդոտներին:
Զարգացման ֆրանսիական գործակալության տարածաշրջանային գրասենյակի տնօրեն տիկին Գայել Ասայագը շնորհակալություն է հայտնել ոլորտում իրականացվող գործընթացների վերաբերյալ բազմակողմանի և սպառիչ տեղեկատվության համար, միաժամանակ ներկայացնելով տարբեր երկրներում գործակալության իրականացրած և ընթացքի մեջ գտնվող նախաձեռնությունները:
Նա նշել է, որ ԶՖԳ առաքելության հիմնական նպատակը Հայաստանում էներգաարդյունավետ և էներգախնայող շինարարության ասպարեզում իրականացվելիք ծրագրերի հնարավոր ֆինանսավորման շուրջ մտքերի փոխանակումն է, ապա նաև՝ այդ համատեքստում՝ գործնական քայլերի կատարումը:
.gif)
