Ղարաբաղյան խնդրում փորձում են փոխել ստատուս քվոն

Միջազգային հանրության ուշադրության կենտրոնում կրկին Ղարաբաղյան հիմնախնդիրն է. շփման գծում վերջին օրերի լարվածությանը երեկ անդրադարձել են միաժամանակ ե′ւ ԱՄՆ, ե′ւ ԵՄ եւ ՌԴ դիվանագետները` հիշատակելով ԵԱՀԿ ՄԽ համանախագահների վերջին հայտարարությունը, որտեղ հետագա լարվածությունից խուսափելու կոչերից բացի նաեւ նշված էր բովանդակային բանակցություններ վերսկսելու, կարգավորման գործընթացում առաջընթացի եւ խաղաղության հասնելու մասին:

ԱՄՆ պետդեպարտամենտի հայտարարությունը ներկայացրել է նրանց խոսնակը` Հիթեր Նաուերթը` կոչ անելով կողմերին խուսափել սրացումներից ու լարվածությունը թուլացնելու նպատակով քննարկումներ սկսել: «Մեր վաղեմի քաղաքականությունը, որում Մինսկի խմբի համանախագահները համակարծիք են, այն է, որ արդարացի կարգավորումը պետք է հիմնված լինի միջազգային օրենքի վրա, ներառյալ՝ Հելսինկյան եզրափակիչ ակտը, հատկապես՝ ուժի չկիրառման, տարածքային ամբողջականության և ինքնորոշման սկզբունքները»,- նշված է ԱՄՆ պետդեպարտամենտի հայտարարության մեջ:

Հրադադարի խախտումներին անդրադարձել է նաեւ ԵՄ-ն` խոսնակի տարածած հայտարարության մեջ ստատուս քվոն որակելով «անկենսունակ»: «Հայաստանի և Ադրբեջանի նախագահները բազմիցս հայտարարել են հրադադարի ռեժիմի պահպանման և այդ հակամարտության խաղաղ հանգուցալուծման նկատմամբ իրենց հանձնառության մասին: Եվրոպական միությունն ակնկալում է լարվածության թուլացում և զսպվածության ցուցաբերում թե՛ գործերում և թե՛ խոսքում»,- նշված է այնտեղ:

ՌԴ ԱԳՆ պաշտոնական ներկայացուցիչ Մարիա Զախարովան էլ իր հերթին հայտարարել է, թե ԼՂ հակամարտության կարգավորման թեման իրենց օրակարգում է. «ԵԱՀԿ ՄԽ համանախագահների տարածաշրջանային այցի արդյունքում հրապարակած հայտարարության մեջ արտացոլված է նաև Ռուսաստանի դիրքորոշումը»,- ասել է նա:

Նախորդ տարվա ապրիլյան քառօրյա պատերազմը ցույց տվեց, որ ստատուս քվոյի պահպանումն առավել քան վտանգավոր է դարձել: Ու հիմա միջազգային հանրությունը փորձում է օր առաջ հասնել Ղարաբաղյան խնդրի լուծմանը եւ տարածաշրջանում խաղաղության հաստատմանը: Առավել եւս, երբ Ադրբեջանը չնայած նախորդ տարի Վիեննայում եւ Սանկտ-Պետերբուրգում ձեռք բերված պայմանավորվածություններին, շարունակում է չկատարել դրանք, դեռ ավելին` շփման գծում պարբերաբար սրում է իրավիճակը: Եւ այս առումով պատահական չէ, որ ԵԱՀԿ ՄԽ համանախագահների քննադատություններն այլեւս հասցեական բնույթ են կրում եւ ուղղված են կոնկրետ Ադրբեջանին:

ԱՐՄԱՆ ԳԱԼՈՅԱՆ