ԻՆՉՈՎ ԵՆ ԶԲԱՂՎԱԾ ՄԵՐՕՐՅԱ ԴԱՍԱԼԻՔՆԵՐԸ

Factor.am լրատվական կայքն օրեր առաջ, հղում անելով ՀՀ պաշտպանության նախարարությանը, հրապարակել էր այն պաշտոնյաների որդիների անունները, ովքեր ազատվել են զինվորական ծառայությունից կամ տարկետման իրավունք են ստացել: «Ժողովուրդ»-ը փորձեց պարզել, թե ինչով են զբաղվում մերօրյա դասալիքները: Մեր ուսումնասիրության արդյունքներով պարզվեց, որ նրանց մի մասն աշխատում է պետական համակարգում, մի մասը հայրիկների ընկերություններն է տիրություն անում, մի մասն էլ սովորում է:

1. ԱԺ նախկին պատգամավոր, ԲՀԿ խմբակցության անդամ Կարո Կարապետյանի որդին՝ Վիլիկ Կարապետյանը: Պրահայում հիմնադրել է 100.000 կրոն (մոտ 2 մլն դրամ) կանոնադրական կապիտալ ունեցող «ViloKaro» ՍՊԸ-ն, ծնվել է 1990թ.:
2. Երեւանի նախկին քաղաքապետ Երվանդ Զախարյանի որդին՝ նախկին դատավոր Արտակ Զախարյանը: Այժմ նա զբաղվում է բիզնեսով. 1998թ.-ից մինչեւ 2001 թվականը Արտակ Զախարյանն աշխատել է ՀՀ մաքսային պետական կոմիտեում՝ որպես արագ հակազդման բաժնի առաջատար մասնագետ, տեսուչ, այնուհետեւ ավագ տեսուչ: 2001թ. Երեւան քաղաքի Մալաթիա-Սեբաստիա համայնքի դատախազությունում նշանակվել է որպես քննիչ, իսկ 2005-ին՝ Մալաթիա-Սեբաստիա համայնքի դատախազությունում դատախազի օգնական, 2007 թվականին՝ դատախազ:
3. ՊԵԿ նախկին ղեկավար, ֆինանսների նախկին սուպերնախարար Գագիկ Խաչատրյանի որդիները՝ Գուրգեն (1983թ.) եւ Արտյոմ (1986) Խաչատրյանները: Նրանք զբաղվում են բիզնեսով. բազմաթիվ ընկերություններ են առնչվում նրանց անվան հետ՝ «Յուքոմ», «Մեգաֆուդ», «Ապեյրոն», «Մեգամոթորս», «Մեգասպորտ», «Խրոնոգրաֆ», «Գալաքսի Կոնցեռն», «Չիմեգ» եւ այլ:
4. Գյումրիի նախկին ՀՀԿ-ական քաղաքապետ, այժմ «Ծառուկյան» դաշինքով պատգամավոր դարձած Վարդան Ղուկասյանի որդին, մշտապես սկանդալային պատմություններում հայտնվող Սպարտակ Ղուկասյանը: Նա որեւէ տեղ չի աշխատում, հոր բիզնեսներին է տիրություն անում եւ «գողական գնում»:
5. Աժ պատգամավոր Խոսրով Հարությունյանի որդին՝ արտաքին գործերի փոխնախարար Ռոբերտ Հարությունյանը: Նա ծնվել է 1975 թ.-ին եւ միշտ պետական պաշտոններ զբաղեցրել:
6. Նախորդ գումարման խորհրդարանի հանրապետական պատգամավոր Ալեքսան Պետրոսյանի որդին՝ Մակար Պետրոսյանը, իր հորը պատկանող «ՄԱՊ» ՓԲԸ-ի տնօրենն է:
7. ԱԺ գործող պատգամավոր Հակոբ Հակոբյանի որդին՝ «Արփա-Սեւան» ԲԲԸ տնօրեն Պարույր Հակոբյանը: Նա եւս հոր գործը շարունակողն է:
8. Շիրակի նախկին մարզպետ, ԱԺ ներկայիս պատգամավոր Ֆելիքս Ցոլակյանի որդին՝ Վարդան Ցոլակյանը: Մագիստրատուրայում է սովորել, հետո գիտությունների թեկնածու է դարձել: Դիսերտացիա պաշտպանելուց հետո գիտական գործունեությամբ է զբաղվել, համալսարանում դասախոս է աշխատում:
9. Կոտայքի մարզպետ, Գագիկ Ծառուկյանի փեսա Կարապետ Գուլոյանը: Նախկինում եղել է քննիչ, դատախազ, Աբովյանի քաղաքապետ, հիմա էլ մարզպետ է:
10. Ծառայությունից ազատված է գյուղատնտեսության նախարար Իգնատի Առաքելյանի որդին՝ Էդուարդ Առաքելյանը: Տարկետման հիմքով զինվորական ծառայություն չեն անցել նաեւ Առաքելյանի մյուս որդիները՝ Ալեքսանդր եւ Բորիս Առաքելյանները: Նրա երեք տղաներն էլ ուսանող են, ավագ որդին սովորում է բժշկական համալսարանում: Մյուս երկուսը երկվորյակ են, նրանցից մեկը սովորում է ճարտարապետական, մյուսը՝ ագրարային համալսարանում:
11. Տարածքային կառավարման եւ զարգացման նախարար Դավիթ Լոքյանի որդին՝ Սերգեյ Լոքյանը: Հայրը պարզաբանում է, թե որդին ալերգիկ է: Սակայն դա չի խանգարել, որ նա պետական պաշտոններ զբաղեցնի: Սերգեյ Լոքյանը նախկինում Աժ նախագահ Հովիկ Աբրահամյանի խորհրդականն էր, այնուհետեւ՝ ՀՀ վարչապետի օգնական: Ապրիլի 2-ին տեղի ունեցած խորհրդարանական ընտրությունների ժամանակ Սերգեյ Լոքյանն իր թեկնածությունն էր առաջադրել վարկանիշային ընտրակարգով թիվ 1 ընտրատարածքում (Ավան, Նոր Նորք եւ Քանաքեռ-Զեյթուն), սակայն արդյունքում ստացել էր ընդամենը 2524 ձայն:
12. ԱԺ ՀՀԿ պատգամավոր Սեյրան Սարոյանի որդին՝ Զարզանդ Սարոյանն ազատված է ծառայությունից: Նա հիմնական զբաղմունք չունի: Իսկ մյուս որդին տարկետման մեջ է: Աշոտ Սարոյանը այժմ սովորում է ագրարային համալսարանի գինեգործություն բաժնում: Ի դեպ, այս բաժնում սովորող շարքային մահկանացուները չեն օգտվում տարկետման իրավունքից:
13. Զինվորական ծառայություն չի անցել նաեւ Հայաստանի վարչապետ, ՀՀԿ առաջին փոխնախագահ Կարեն Կարապետյանի որդին՝ Տիգրան Կարապետյանը: Նա այժմ զբաղեցնում է «Գազպրոմ Արմենիա» ընկերության տնօրենի տեղակալի պաշտոնը կապիտալ շինարարության եւ վերանորոգման գծով: Ներկա պաշտոնում նա նշանակվել է 2016 թվականի մայիսից: Իսկ մինչ այդ` 2012 թվականից, եղել է «Գազպրոմ Արմենիայի» գլխավոր տնօրենի օգնականը, այնուհետեւ` խորհրդականը:
14. Տարկետման հիմքով ազատվածների թվում է ԱԺ ՀՀԿ խմբակցության գործարար պատգամավոր Արկադի Համբարձումյանի որդին՝ Ստանիսլավ Համբարձումյանը: Վերջինս մշտապես աղմկոտ պատմությունների մեջ է եղել: 2013 թվականին՝ 17 տարեկան հասակում, Աբովյան փողոցում վիճաբանության կիզակետում էր հայտնվել, երբ տակավին Երեւանի տնտեսագիտական համալսարանի առաջին կուրսի ուսանող էր: Ուսանող լինելու առիթից օգտվելով էլ ազատվել է պարտադիր զինվորական ծառայությունից:
15. Սյունիքի նախկին մարզպետ Սուրիկ Խաչատրյանի երկու որդիները՝ Տիգրան եւ Տրդատ Խաչատրյանները: Նրանք երկուսն էլ, ճիշտ է, պետական համակարգում չեն աշխատել, սակայն մշտապես քրեական աղմկոտ պատմությունների կիզակետում են հայտնվել:

ՆԱԻՐԱ ՀՈՎՀԱՆՆԻՍՅԱՆ

 
ՄԻԼԻՈՆՆԵՐ` ՏԵԽՍՊԱՍԱՐԿՄԱՆ ԵՎ ԲԵՆԶԻՆԻ ԳՆՄԱՆ ՀԱՄԱՐ
ՀՀ աշխատանքի եւ սոցիալական հարցերի նախարարությունը իր ծառայողական ավտոմեքենաների տեխնիկական սպասարկման համար յուրաքանչյուր տարի պետբյուջեի հաշվին միլիոններ է ծախսում:
«Ժողովուրդ» թերթը տեղեկացավ, որ միայն 17 հատ ավտոմեքենայի տեխնիկական սպասարկման համար նախարարությունը ընթացիկ տարում պետական միջոցներից ծախսելու է 7 մլն 265 հազար դրամ: Տեղեկացնենք, որ այդ ավտոմեքենաները ԱՊՀ արտադրության են՝ մեկ հատ «Գազ-3110», 2 հատ «Վազ-2121», 2 հատ «Վազ 2106» եւ 12 հատ «Վազ-2107»: Օրինակ՝ ԱՊՀ արտադրության մեկ «Գազ-3110» ավտոմեքենայի համար ծախսվելու է 377 հազար դրամ, իսկ 2 ավտոմեքենայի` «Գազ-3110» եւ «Վազ-2121»-ի համար` 600 հազար 500 դրամ: Իսկ նշված ավտոմեքենաների տեխսպասարկման աշխատանքների ձեռքբերման համար նախարարությունը ապրիլի 28-ին պայմանագիր կնքել է «Մ-Բի-Ռ» ընկերության հետ:
Ի դեպ, այս ընկերության հետ նույն աշխատանքների ձեռքբերման նպատակով պայմանագիր կնքում է նաեւ Երեւանի քաղաքապետարանը: Նկատենք, որ ՀՀ որոշ գերատեսչություններ վերջին ամիսների ընթացքում վաճառքի են հանում իրենց հաշվեկշռում եղած հին տարեթիվ ունեցող, ռուսական արտադրության ավտոմեքենաները: Ասել է, թե ազատվում են «ժեշտից»: Քանի որ այդ հին ավտոմեքենաների վրա պետական բյուջեից ավելի շատ ծախսեր են արվում: Իսկ սոցապ նախարար Արտեմ Ասատրյանի դեպքում ամեն ինչ հակառակն է:
Այսքանով դեռ չի ավարտվում նախարարության ավտոմեքենաների տեխսպասարկումը. այս նպատակով պայմանագիր կնքվել է նաեւ «Ֆլեշ մոտորս» ընկերության հետ 5 մեքենայի համար եւ ծախսվել մոտ 1 մլն 300 հազար դրամ:
Բացի տեխսպասարկման աշխատանքներից՝ նախարարությունը գնել է նաեւ բենզին` ե՛ւ պրեմիում, ե՛ւ ռեգուլյար տեսակի: Այսպես՝ «Ժողովուրդ»-ը տեղեկացավ, որ ընթացիկ տարվա համար «Սի Փի Էս օիլ» ընկերությունից գնվել է 1 մլն 509 հազար դրամի ռեգուլյար տեսակի բենզին, որի մեկ լիտրի դիմաց վճարվել է 330 դրամ: Նշված ընկերությունից այս գերատեսչությունը գնել է նաեւ 31 հազար 25 լիտր ռեգուլյար տեսակի բենզին եւ վճարել 10 մլն 238 հազար 250 դրամ: Այսինքն՝ ռեգուլյար տեսակի բենզինի համար ծախսվել է 11 մլն 747 հազար դրամ:
Իսկ պրեմիում տեսակի բենզինի համար պետական միջոցներից ծախսվել է 7 մլն 740 հազար դրամ: Այսինքն՝ գնվել է 22 հազար 494 լիտր պրեմիում տեսակի բենզին: Ասել է, թե սոցապ նախարար Արտեմ Ասատրյանին, ով մատը մատին չի խփում՝ իր ղեկավարած ոլորտում առկա խնդիրները լուծելու համար, վայել չէ ռեգուլյար տեսակի բենզինով լի մեքենայով երթեւեկելը: Ու տպավորություն է, որ ռեգուլյար տեսակի բենզինով նախարարը կարող է տեղ չհասնել:
Հավելենք, որ այս նախարարությունը համարվում է «աղքատների» նախարարություն տարիներ շարունակ: Սակայն նախարարը շքեղություններից չի հրաժարվում:

ՍՅՈՒՆԷ ՀԱՄԲԱՐՁՈՒՄՅԱՆ

 
«ԿՅԱՆՔԻ ՃԱՄՓԱՆ» ՈՒ ՊԱՐԳԵՎՆԵՐԸ

Դատախազության համար փող կա, «կյանքի ճանապարհի» համար՝ ոչ: Այս պնդումն ամենեւին էլ անհիմն չէ: 2016թ. սեպտեմբերի 14-ից Հայաստան-Վրաստան միջպետական ավտոճանապարհի Վանաձոր-Ալավերդի հատվածը վերանորոգման նպատակով փակվել է, Վրաստանի սահմանից մինչեւ Երեւան ուղին խոշոր բեռնատարները անցնում են Նոյեմբերյան-Իջեւան ճանապարհով: Արդյունքում ճանապարհի բեռնվածությունը մի քանի անգամ աճել է:

«Ժողովուրդ»-ի թղթակիցը նկատեց, որ նշված ճանապարհի Ոսկեպար-Կիրանց 11 կիլոմետրանոց հատվածը շատ վատ վիճակում է: Ադրբեջանի հետ սահմանը շրջանցող Ոսկեպար-Կիրանց ճանապարհը այլընտրանք չունի, այն «կյանքի ճանապարհ» է: Բեռնված, մինչեւ 40 տոննա քաշով ֆուռերը իրենց ծանրությամբ քանդել են ասֆալտի ծածկը, Ոսկեպար-Կիրանց շրջանցիկ ավտոճանապարհի վրա մոտ 30 տեղ խորը փոսեր, ճանապարհի իջվածքներ կան:
Տեղեկացնենք, որ այդ ճանապարհը սպասարկում է Նոյեմբերյանի ճանապարհաշինական «Լեւոն երկրորդ» ՍՊԸ-ն: Ընկերության աշխատակիցների ջանքերով միջպետական ավտոճանապարհով երթեւեկությունը երբեւէ չի փակվել, ճանապարհաշինական ընկերությունը պարբերաբար շրջանցիկ ավտոճանապարհի փոսային նորոգումներ է կատարում: Սակայն 15 տարի առաջ ոչ այնքան որակով կառուցված ավտոճանապարհի հողային հիմքը փխրուն է, ճանապարհի ծածկը բեռնատարների ծանրության տակ իջվածքներ է առաջացրել: Մի խոսքով, «Կյանքի ճանապարհը» ոչ թե փոսային նորոգումների, այլ հիմնանորոգման կարիք ունի: Սակայն պետական բյուջեից ֆինանսական հատկացում չի արվում Հայաստան-Վրաստան միջպետական ավտոճանապարհի մաս կազմող, ռազմավարական նշանակություն ունեցող Ոսկեպար-Կիրանց շրջանցիկ ավտոճանապարհի հիմնանորոգման համար: Սակայն դրան զուգահեռ՝ Հայաստանի Հանրապետության կառավարության պահուստային ֆոնդից վերջերս 150 միլիոն դրամ հատկացվեց՝ դատախազության աշխատակիցներին պարգեւատրելու համար:
Ու ստացվում է, որ դատախազության աշխատողներին պարգեւատրելու համար պետական բյուջեում փող կա, իսկ այլընտրանք չունեցող, ռազմավարական նշանակություն ունեցող շրջանցիկ ավտոճանապարհի հիմնանորոգման համար՝ ոչ:

ՈՍԿԱՆ ՍԱՐԳՍՅԱՆ
Տավուշ