ՌԵԺԻՄԻ ԳՈՅՈՒԹՅԱՆ ԴԱԴԱՐԵՑՈՒՄԸ ԳԵՐԿԱՐԵՎՈՐ ԽՆԴԻՐ Է

Բաց նակամով «Ժողովուրդ» օրաթերթին է դիմել ՀՀ պաշտպանության նախարարի նախկին տեղակալ Վահան Շիրխանյանը, որն այժմ գտնվում է ՀՀ ԱՆ «դատապարտյալների հիվանդանոց» քրեակատարողական հիմնարկում: Ստորեւ ներկայացնում ենք նամակն ամբողջությամբ.

«Խաբողը պետք է հասկանա, որ խաբելով ուրիշին՝ խաբում է նաեւ իրեն: Հայկական իրականությունում այս պարզ ճշմարտությունը չի ընկալվում: Արդյունքում ունենք շարունակական անկում, քայքայում, բարոյազրկում:
Ընտրությունների կեղծումը ոչ միայն ամենավտանգավոր խաբեությունն ու ինքնախաբեությունն է, այլեւ ամենաանթույլատրելի վարքագիծն է պետականության հանդեպ: Սա պետականության իմաստազրկման ամենակարճ ճանապարհ է, որով գնում է Սերժ Սարգսյանը 21 տարի:
Երկրի այսօրվա վիճակը պայմանավորված է դրանով: Հայաստանն այսօր օրենսդրորեն եւ կառավարման համակարգով իրենից ներկայացնում է բազմագույն, բազմաորակ պատառներից կիսակարկատած սավան, որը ամեն ժամ ինչ-որ տեղից ճաք է տալիս:
Հայոց պետականաշինարարները մերժեցին միջազգային փորձը, որ պահանջում էր ազգային ու համամարդկային արժեքների ներդաշնակեցում, կիրառական վիճակի ապահովում, ապա ներդրում, այն էլ՝ հատվածային: Դա չարվեց: Արդյունքում ստացանք արժեզրկված իրականություն, որտեղ ազգային արժեքները մերծված են, իսկ համամարդկային, եվրոպական արժեքները կալանված ու կիրառումից հանված են:
Ախտորոշումը հետեւյալն է՝ Հայաստանի պետական կառավարման համակարգը անտեսել է պետական եւ ազգային շահը (Հայաստանի դեպքում դրանք նույնն են), եւ պահպանել են անձնական շահը:
Սա քրոնիկ, 22 տարվա հիվանդություն է, որի սկզբնաղբյուրը, հետագայում նաեւ պահապանը, Սերժ Սարգսյանն է: «Կառավարի՛ր արդարությամբ եւ երկրում հանգստություն կլինի». սա կառավարման գլխավոր աքսեոման է, բայց ոչ Հայաստանի համար, որովհետեւ արդարությունն անհամատեղելի է անձնական շահի հետ:
Կա իշխանության ձեւավորման երկու ճանապարհ՝
ա)ժողովրդի վստահության
բ) բռնազավթման
Հայաստանում, այն բռնազավթված է 21 տարի, եւ պետությունը, որպես ժողովրդի (բոլորի) շահերը սպասարկող մարմին, չկա, բայց կա ընտրյալների խմբի շահերը սպասարկող ռեժիմ: Այստեղ զարմանք չկա: Աշխարհին շատ նման դեպքեր են հայտնի: Ցավալին այն է, որ դա մեր երկրում է, որը 1/3 դարձել է աղետի գոտի՝ երկրաշարժով, ներքաշվել է պարտադրված պատերազմի մեջ, կորցրել է տնտեսությունը՝ որպես համակարգ, եւ պաշարված է թշնամիներով: Այսքանից հետո դժվար էր պատկերացնել, որ կգտնվի մի հայ մարդ, որը նման վարքագիծ ընտրի կառավարման մեջ: Առավել անմխիթար է արտաքին քաղաքական ոլորտը, որը դատապարտված է ապարդյուն մաղել Եվրոպայի, ԱՄՆ-ի լիմիտը՝ չունենալով հստակ հայեցակարգ: Ռեժիմի պայմաններում այլ վիճակ հնարավոր չէ: Ինքնգալուխ, առանց Արցախի լիազորման «վերցրել են» միայն Արցախին պատկանող դերը, աջ ու ձախ խոստումներ տվել, խճճվել ու ամբողջ ազգը տանում են կործանման:
Երկիրը ամայացնող արտագաղթը, ժողովրդի ունեզրկումը եւ աղքատացումը, անարդարության ու կամայականության օր օրի խորացումը, անբուժելի հիվանդների ավելացումը, թմրամոլության շեշտակի աճը՝ ռեժիմի գոյության հետեւանքն են: Նույնի հետեւանքն է նաեւ իմ, Սամվել Բաբայանի, Ժիրայր Սէֆիլյանի, Գառնիկ Մարգարյանի, Վովա Առաքելյանի, Անդրեաս Ղուկասյանի, «Սասնա ծռեր»-ի, Շանթի եւ հարյուրավոր այլոց բանտում գտնվելը: Ռեժիմը դարձել է երկրի ապագայի իրական սպառնալիք: Հայությունն ունի երկու գերխնդիր՝
ա)ազատվել ռեժիմից
բ)հասնել Արցախի խնդի արդարացի լուծմանը:
«Պետության կայունությունը պայմանավորված է ինքնաբավությամբ». Արիստոտել:
Կիսադատարկ, բնական, քաղաքական, ռազմական, տնտեսական աղետի շեմին կանգնած Հայաստանի ռեժիմը շարունակում է միակ խնդիր տեսնել սեփական ինքնաբավության ապահովումը:
Եթե երկրում լիներ օրենքի եւ օրինականության պահապան դատա-իրավական համակարգ, ռեժիմը վաղուց վերացած կլիներ, սակայն այն սերտաճել է ռեժիմի հետ, վերածվել նրա հրահանգների կատարածուի եւ դարձել է պետականության քայքայման եւ երկրի ավերման ակտիվ մասնակից:
Ուստի ռեժիմի գոյության դադարեցումը դարձել է համահայկական, համաժողովրդական գերկարեւոր խնդիր: Չեզոքությունը այստեղ հավասար է ինքնամահախոսական կազմելուն:

ՀՀ ՊՆ նախկին տեղակալ Վահան Շիրխանյան»:

ՏԵՂԻ ԳՅՈՒՂԱՊԵՏԱՐԱՆԸ ԳՆԵԼ Է ՍՈՒՐՃԻ ԲԱԺԱԿ, ԱՓՍԵ, ԳԴԱԼ

Սերժ Սարգսյանի ծննդավայր համարվող Տեղի գյուղապետարանը ընթացիկ տարվա համար համայնքի բյուջեի հաշվին «տնական» գնումներ է կատարել. մասնավորապես գնվել է սպասք` բաժակներ, պատառաքաղներ, գդալներ ու շինանյութ:

«Ժողովուրդ» օրաթերթի ձեռքի տակ է հայտնվել ՀՀ Սյունիքի մարզի Տեղ գյուղի՝ սեպտեմբերի 26-ի փոփոխված գնումների պլանը: Ըստ այդմ, գյուղապետարանի ընթացիկ տարվա ծախսերի առյուծի բաժինը կազմում է աշխատավարձը` 72 մլն դրամ: Նշենք, որ Տեղը խոշորացված համայնք է, որի կազմի մեջ է մտնում Արավուսը, Քարաշենը, Խնածախը, Վաղատուրը, Խոզնավարը: Այսինքն՝ 72 մլն դրամը բաշխվելու է նաեւ նշված բնակավայրերի աշխատողների միջեւ: «Ժողովուրդ» օրաթերթին հայտնի դարձավ, որ աշխատողների ընդհանուր թվաքանակը կազմում է 43:
Աշխատավարձի գծով ծախսերից անցում կատարենք կենցաղային ապրանքների գնումներին: Այսպես՝ Տեղի գյուղապետարանը գնել է 10 հատ 600 դրամանոց պլաստմասսե աղբարկղ, 4 հատ 5000 դրամանոց ծաղկաման: Բացի այս, ըստ պաշտոնական փաստաթղթի` գյուղապետարանը գնել է մեկ տուփ բաժակ` 10 հազար դրամով, 2 տուփ թեյի կամ սուրճի բաժակներ` 10 հազար դրամով, վեց հատ 1000 դրամանոց ափսե, ընդհանուրի համար ծախսվել է 6 հազար դրամ: Գյուղապետարանը ափսեներից ու բաժակներից բացի՝ չի մոռացել գդալների ու պատառաքաղների մասին: «Ժողովուրդ»-ը տեղեկացավ, որ Տեղի գյուղապետարանը գնել է 1 տուփ գդալներ, պատառաքաղներ` 15 հազար դրամով, մեկ հատ սկուտեղ` 2000 դրամով: Իսկ շերտավարագույրի համար ծախսվել է 150 հազար դրամ: Մեր հարցին` ո՞ւմ համար են սուրճի, թեյի բաժակները կամ գդալներն ու պատառաքաղները, գյուղապետարանի ֆինանսական հարցերով պատասխանատու Սուսաննա Ալավերդյանն ասաց. «Գյուղապետարանի կարիքների համար է: Հյուրեր ենք ունենում նախարարություններից, մարզպետարանից, պետք է հյուրասիրենք, չէ՞, իրենց»:
Ի դեպ, գնումների պլանից տեղեկացանք նաեւ, որ գնվել է 1000 կգ ցեմենտ, որի համար ընդհանուր վճարվել է 60 հազար դրամ, 1500 կգ գաջ` 75 հազար դրամով, 20 կգ մեխ` 16 հազար դրամով, 40 կգ ներկ` 62 հազար դրամով: «Ժողովուրդ»-ը Սուսաննա Պետրոսյանից հետաքրքրվեց, թե գնված շինանյութով ինչ են պատրաստվում նորոգել: Մեր հարցմանն ի պատասխան՝ գյուղապետարանի աշխատակիցը զարմացավ` նշելով. «Կարող է՝ տարբեր բնակավայրերում հազար ու մի բան կատարվի, մշակույթի տանը, գրադարանում կամ անասունների համար լողարան լինի: Այս պահին որեւէ բան չկա կառուցելու կամ նորոգելու, դա ապահովության համար ենք գրել»:
Բացի այս՝ Տեղի գյուղապետարանը նախատեսել է ներքին գործուղումների համար ծախսել է 1 մլն 680 հազար դրամ: Իսկ ավտոմեքենաների պահեստամասերի համար ծախսվել է 187 հազար դրամ: Գնվել է նաեւ 4 հատ անվադող, յուրաքանչյուր անվադողի համար վճարվել է 38 հազար 750 դրամ: Այսինքն՝ ընդհանուր 4 հատ անվադողի համար ծախսվել է 155 հազար դրամ:
Տեղի գյուղապետարանը իր կարիքների համար գնել է 4000 լիտր ռեգուլյար տեսակի բենզին եւ ծախսել մոտ 1 մլն 400 հազար դրամ: Ստացվում է, որ գյուղապետարանը մեկ լիտր բենզինի դիմաց վճարել է 335 դրամ: Գնվել է նաեւ 2429 լիտր դիզելային վառելիք` մեկ լիտրը 316 դրամով, որի ընդհանուր վճարը կազմել է 768 հազար դրամ: Գյուղապետարանը չի բավարարվել միայն բենզինով ու դիզելային վառելիքով, գնել է նաեւ 8500 խ/մ բնական սեղմված գազ` 1 խ/մ-ի դիմաց վճարելով 200 դրամ: Իսկ բնական սեղմված գազի համար ընդհանուր վճարվել 1 մլն 700 հազար դրամ:

ՍՅՈՒՆԷ ՀԱՄԲԱՐՁՈՒՄՅԱՆ

Ո՛Չ ՋՐԱՏԱՐՆ ԵՆ ՆՈՐՈԳԵԼ, Ո՛Չ ԷԼ ՓՈԽՀԱՏՈՒՑՈՒՄ ՏՎԵԼ
Ավելի քան երկու շաբաթ առաջ Նոյեմբերյանի տարածաշրջանի` Վրաստանին սահմանակից Բագրատաշեն գյուղում արտակարգ դեպք է տեղի ունեցել: Սեպտեմբերի 17-ին՝ առավոտյան ժամը 10-ի սահմաններում, քանդվել է Բագրատաշեն գյուղ մտնող ոռոգման մեծ ջրատարը:
Ջրատարի ջուրը վերեւից մտել է Բագրատաշենի 2 առանձնատան տարածք: Դրանից մեկի բնակիչները տեւական ժամանակ Վրաստանի Բաթումի քաղաքում են բնակվում: Բագրատաշենի վարչական ղեկավար Արկադի Մակյանը «Ժողովուրդ»-ին հայտնեց, որ ջրի հոսանքն այդ տանը մեծ վնաս չի պատճառել: Քանդված ջրագծի հեղեղը մեծ վնասներ է պատճառել Բագրատաշենի բնակիչ Մայոր Մելքումյանի առանձնատանը: Հեղեղը տան գույքը վնասել է, Մելքումյանների այգուց հավաքած, պարկերի մեջ դրված պնդուկը հայտնվել է ցեխի մեջ: Բագրատաշեն արտակարգ դեպքի վայր է ժամանել «Տավուշ» ջուր օգտագործողների ընկերության՝ Նոյեմբերյանի մասնաճյուղի ղեկավար Գագիկ Վերանյանը: Ոռոգման ջրագծի սկզբում սնուցումը փակվել է, սակայն շուրջ 10 կմ երկարությամբ ջրատարում ջուրը շարունակել է հոսել եւ վնասներ պատճառել:
Բագրատաշենի բնակիչները հայտնեցին, որ ոռոգման ջրատարից ներքեւ գտնվում է 15-20 առանձնատուն, իսկ ջրատարը մոտ 70 տարվա հնություն ունի, մաշված է: Հողի մեջ ձգվող ջրատարը մաքրելու, նորոգելու, սպասարկելու համար բավարար տարածք չկա: Բագրատաշենցիների վկայությամբ` ջրատարի մաշվածության խնդիրը վաղուց էր առկա, ջրատարը մի օր պետք է քանդվեր:
Մայոր Մելքումյանի ընտանիքը սոցիալապես անապահով է: Նրա կինը 3 տարի առաջ Դեբեդում խեղդվել է, Մայորի 37-ամյա որդին նախանցած տարի է մահացել: Արկադի Մակյանից տեղեկացանք, որ Բագրատաշենը սնուցող ոռոգման մեծ ջրատարը դեռ չի վերականգնվել: Նա դա պատճառաբանեց անձրեւային եղանակով, մինչդեռ անձրեւները 4-5 օր առաջ են սկսվել: Մայոր Մելքումյանի ընտանիքը պատճառված վնասի համար դրամական փոխհատուցում չի ստացել: Ա. Մակյանն ասաց, որ Տավուշի մարզպետարանի կազմած հանձնաժողովը ներկայումս հաշվարկում է այդ տանը պատճառված վնասները:

ԻՆՔՆԱՌԱՋԱԴՐՎԵԼ Է
Նոյեմբերի 5-ին կայանալու են խոշորացված Բերդ համայնքի ղեկավարի եւ ավագանու, Աչաջուր համայնքի ղեկավարի, Ենոքավանի եւ Այգեհովտի ավագանու ընտրությունները: Թեկնածուների առաջադրումը հոկտեմբերի 1-5-ն է: Հոկտեմբերի 3-ի կեսօրի դրությամբ Տավուշի մարզում համայնքի ղեկավարի կամ ավագանու միայն մեկ թեկնածու է առաջադրվել: Թիվ 37 տարածքային ընտրական հանձնաժողովից տեղեկացա, որ իր թեկնածությունն առաջադրել է Աչաջրի գործող գյուղապետ, ՀՀԿ անդամ Կամո Ղալթախչյանը: 60-ամյա Կ. Ղալթախչյանը Աչաջուր համայնքը ղեկավարում է 2013թ. նոյեմբերի 17-ից:

ՈՍԿԱՆ ՍԱՐԳՍՅԱՆ
Տավուշ