Կանխվել է ՀՀ քաղաքացի չհանդիսացող անձի զորակոչը. ՀՔԱՎ

Արտաշատի զինվորական կոմիսարիատը 2015 թ. փետրվարի 17-ին զորակոչելու նպատակով հաշվառել է Ուկրաինայի քաղաքացի Հ. Պ.-ին եւ 2017 թ. սեպտեմբերին զորակոչման նպատակով ուղեգրել բժշկական զննության:

Այս առնչությամբ ՀՔԱՎ գրասենյակի տարածած հաղորդագրության մեջ ասվում է.

«ՀՀ Պաշտպանության նախարարությունը պատճառաբանել է, որ հաշվառման համար հիմք է հանդիսացել նրա ծննդյան վկայականում Երեւանը՝ որպես ծննդավայր նշած լինելու հանգամանքը: Այսինքն՝ պաշտպանական գերատեսչությունը, հիմնվելով միայն ծննդյան վկայականում ծննդավայրի վերաբերյալ տվյալների վրա, առանց ստուգելու, ճշտելու անձի քաղաքացիությունը, անձին կցագրում է եւ զորակոչի ենթարկում:

Մինչդեռ ՀՀ Պաշտպանության նախարարությունը պարտավոր է յուրաքանչյուր անձի վերաբերյալ տվյալների ճշտումից հետո միայն կայացնել նման որոշումներ:

Տվյալ դեպքում Հ. Պ.-ն, ծնվելու պահին գործող «Քաղաքացիության մասին» ՀՀ օրենքի համաձայն, ծնողների համաձայնությամբ ձեռք է բերել Ուկրաինայի քաղաքացիություն, որի մասին վկայում է վերջինիս տրամադրված ծննդյան վկայականը եւ այնուհետեւ Ուկրաինայի քաղաքացու անձնագիրը: Ավելին՝ 2016 թ. օգոստոսի 4-ին Հ. Պ.-ի հորը ՀՀ Ոստիկանության անձնագրային եւ վիզաների վարչությունից տեղեկանք է տրվել այն մասին, որ «Հ. Պ.-ի քաղաքացիության վերաբերյալ տեղեկություններ չկան, ՀՀ քաղաքացու անձնագիր վերջինս չի ստացել»:

Հ. Պ.-ի իրավունքների պաշտպանությունը ՀՔԱ Վանաձորի գրասենյակն ստանձնել է դեռեւս 2017 թ. հունվարից եւ մի շարք հարցումներ ուղարկել ՀՀ Պաշտպանության նախարարություն ու ՀՀ զինվորական կոմիսարին՝ նրա հաշվառման հիմքերի վերաբերյալ:

ՀՀ Պաշտպանության նախարարությանն ուղղված 2017 թ. մարտի 3-ի հարցման պատասխանը ՀՔԱ Վանաձորի գրասենյակն ստացել է այն ներկայացնելուց 3 ամիս անց միայն, երբ ՀՔԱ Վանաձորի գրասենյակը ՀՀ վարչապետին ուղղված վարչական բողոքով պահանջել էր պարտավորեցնել իրավասու մարմիններին՝ տրամադրելու պահանջվող տեղեկատվությունը:

ՀՀ Զինվորական կոմիսարն իր՝ 2017 թ. հունիսի 9-ի գրությամբ հավաստիացրել էր, որ Հ. Պ.-ի զինապարտության հարցը հստակեցնելու նպատակով ՀՀ ոստիկանության վիզաների եւ անձնագրային վարչություն հարցումներ են ուղարկվել, եւ խոստացել էր դրանց պատասխաններն ստանալուն պես լրացուցիչ տեղեկացնել:

Նրանցից ավելի քան 4 ամիս պահանջվեց այդ տեղեկատվությունն ստանալու համար: