ԼՈՒՐ ԿԱԴՐ

Լուսանկարը արվել է մայրաքաղաքում

Հավանաբար այս փոսն այնքան երկար ժամանակ է խանգարել մարդկանց, որ նրանք որոշել են նման գրությամբ պաստառ փակցնել` այն անվանակոչելով «Տարոն Մարգարյանի անվան փոս»: Ինչպես կասեր Սերժ Սարգսյանը՝ «Տարո՛ն, սիրուն չէ»: Այս դեպքում ո՛չ փոսն է սիրուն, ո՛չ անվանումը:

ՀԱՐՑ. Ես ուզում եմ իմանալ՝ ովքե՞ր կարող են հավակնել գիտությունների թեկնածուի գիտական աստիճանի: Եվ խնդրում եմ նաեւ տեղեկացնել, թե ովքե՞ր կարող են ունենալ գիտությունների դոկտորի գիտական աստիճան:

Լիաննա Միրզոյան (58 տարեկան, դասախոս)

ՊԱՏԱՍԽԱՆ. Տեղեկացնում ենք, որ գիտությունների թեկնածուի գիտական աստիճանի կարող են հավակնել այն անձինք, ովքեր ունեն բարձրագույն կրթություն (դիպլոմավորված մասնագետի կամ մագիստրոսի որակավորում) եւ հանձնել են քննություն Հայաստանի գիտական աստիճանաշնորհման անվանացանկի համապատասխան մասնագիտությունից: Նշենք նաեւ, որ գիտությունների դոկտորի գիտական աստիճան կարող են ստանալ այն անձինք, ովքեր ունեն գիտության որոշակի բնագավառում ներդրած գիտական ավանդ եւ թեկնածուի գիտական աստիճան:

ՀՀ կրթության եւ գիտության նախարարություն

«ԺՈՂՈՎՈՒՐԴ». Ավելացնենք, որ գիտական աստիճան շնորհում է մասնագիտական խորհուրդը՝ հիմք ընդունելով ատենախոսության պաշտպանությունը: Գիտական աստիճանի վկայագիր հանձնում է ՀՀ ԿԳՆ բարձրագույն որակավորման հանձնաժողովը (ԲՈՀ): Նշենք, որ ԲՈՀ-ը գիտական կոչում շնորհելու հարցը քննարկում է համապատասխան փաստաթղթերն ստանալուց հետո՝ 2 ամսվա ընթացքում:

ՀԱՐՑ. Եթե օտարերկրացին եկել է Հայաստան եւ պետք է ձեռք բերի կացության կարգավիճակ, ապա նա ի՞նչ պետք է անի: Կացության ինչպիսի՞ կարգավիճակ կարող է ստանալ: Խնդրում եմ ասեք՝ առաջնահերթ ո՞ւմ պետք է դիմի: Ցանկանում եմ մանրամասն ծանոթանալ կարգին:

Իսկուհի Ղանթարչյան (49 տարեկան, տնային տնտեսուհի)

ՊԱՏԱՍԽԱՆ. Ի. Ղանթարչյանի հարցին ի պատասխան՝ տեղեկացնում ենք, որ Հայաստանի Հանրապետությունում օտարերկրացիների համար սահմանվում են կացության 3 կարգավիճակներ` ժամանակավոր, մշտական եւ հատուկ:
Ժամանակավոր կացության կարգավիճակը տրվում է մինչեւ 1 տարի ժամկետով` յուրաքանչյուր անգամ 1 տարով երկարաձգելու հնարավորությամբ: Մշտական կացության կարգավիճակը տրվում է օտարերկրացուն, եթե նա ապացուցում է ՀՀ-ում ՀՀ քաղաքացի հանդիսացող կամ հատուկ կացության կարգավիճակ ունեցող ամուսնու կամ մերձավոր ազգականների առկայությունը, ՀՀ-ում ապահովված է բնակարանով ու գոյության միջոցներով եւ մինչեւ մշտական կացության կարգավիճակ ստանալու համար դիմում ներկայացնելն օրենքով սահմանված կարգով առնվազն 3 տարի բնակվել է ՀՀ-ում: ազգությամբ հայ է կամ ՀՀ-ում իրականացնում է ձեռնարկատիրական գործունեություն: Հատուկ կացության կարգավիճակը տրվում է ազգությամբ հայ օտարերկրացիներին: Կարող է տրվել նաեւ ՀՀ-ում տնտեսական կամ մշակութային գործունեություն ծավալող այլ օտարերկրացիների:
Միաժամանակ հայտնում ենք, որ ժամանակավոր կամ մշտական կացության կարգավիճակ ստանալու համար դիմումը ներկայացվում է ՀՀ ոստիկանության բնագավառում լիազորված պետական կառավարման մարմին: Հատուկ կացության կարգավիճակ uտանալու համար դիմումը ՀՀ տարածքում ներկայացվում է ՀՀ ոuտիկանության բնագավառում լիազորված պետական կառավարման մարմին, իuկ oտարերկրյա պետությունում` ՀՀ դիվանագիտական ներկայացուցչություն կամ հյուպատոuական հիմնարկ:

ՀՀ միգրացիոն պետական ծառայություն

«ԺՈՂՈՎՈՒՐԴ». Նշենք, որ հատուկ կացության կարգավիճակը տրվում է տասը տարի ժամկետով: Այն կարող է տրվել մեկից ավելի անգամ: