ԼՍՈՒՄՆԵՐԻՆ ԿՈՂՄ ԵՆ, ԵԱՏՄ-ԻՑ ԴՈՒՐՍ ԳԱԼՈՒՆ՝ ԴԵՄ

Երեկ խորհրդարանում տեղի ունեցան ՀՀ ԱԺ «Ելք» խմբակցության կազմակերպած խորհրդարանական լսումները՝ իրենց հեղինակած «ՀՀ մասով Եվրասիական տնտեսական միության պայմանագրի գործողությունը դադարեցնելու գործընթաց սկսելու վերաբերյալ» ՀՀ ԱԺ հայտարարության նախագծի վերաբերյալ:

Նախագծի հիմնական զեկուցողը խմբակցության պատգամավոր Էդմոն Մարուքյանն էր, ով իր ելույթում ընդգծեց, թե Հայաստանը պետք է սկսի ԵԱՏՄ-ից դուրս գալու գործընթաց, քանի որ կառույցին անդամակցության ընթացքում ոչ մի բնագավառում առաջընթաց չի գրանցվել, ընդհակառակը, խմբակցությունը հետընթաց է արձանագրել:
ՌԴ Դաշնային ժողովի պետական դումայի ԱՊՀ գործերով, եվրասիական ինտեգրման եւ հայրենակիցների կապերի կոմիտեի նախագահ Լեոնիդ Կալաշնիկովն առհասարակ դրական է վերաբերվում խորհրդարանական լսումներ առկայությանը, սակայն բացասական է վերաբերվում ՀՀ-ի՝ ԵԱՏՄ-ից դուրս գալու մասին նախաձեռնությանը կամ բերված հիմնավորումներին: «Ժողովուրդ» օրաթերթի հետ զրույցում նա կարծիք հայտնեց, թե ՀՀ-ի համար ԵԱՏՄ-ից օգուտներն ակնհայտ են:
«Ժողովուրդ» օրաթերթի զրուցակիցն է ՌԴ Դաշնային ժողովի պետական դումայի ԱՊՀ գործերով, եվրասիական ինտեգրման եւ հայրենակիցների կապերի կոմիտեի նախագահ Լեոնիդ Կալաշնիկովը:
-Պարո՛ն Կալաշնիկով, խորհրդարանում ընդդիմադիր «Ելք» խմբակցությունը խորհրդարանական լսումներ էր կազմակերպել՝ ՀՀ-ի կողմից ԵԱՏՄ-ից դուրս գալու գործընթաց սկսելու վերաբերյալ: Ինչպե՞ս եք վերաբերվում նման լսումներին:
-Լսումներ կարող են անցկացվել ամենատարբեր թեմաներով, եւ հենց դրա համար գոյություն ունի խորհրդարանը, որպեսզի այդպիսի լսումներ լինեն: Իմ կարծիքով, այդ լսումները պետք է ցույց տային հստակ իրավիճակը, որն այդ խորհրդարանին բնորոշ է՝ ինչպիսի ուժեր են կողմ, ինչպիսի ուժեր՝ դեմ: Այդ պատճառով ես շատ պոզիտիվ եմ վերաբերվում նման լսումների առկայությանը, սակայն ինչ վերաբերում է ԵԱՏՄ-ից դուրս գալուն, բնական է, որ բացասական եմ վերաբերվում: Իմ կարծիքով, լսումները ցույց են տվել իրերի իրական դասավորվածությունը:
-Ընդդիմադիր ուժի կողմից ներկայացվող հիմնական փաստարկն այն է, որ կառույցին անդամակցության ընթացքում ոչ մի բնագավառում առաջընթաց չի գրանցվել:
-Դա իրենց անձնական տեսակետն է: Ես նրանց հետ համաձայն չեմ եւ տեղյակ չեմ, թե որքանով են նրանց այդ տեսակետի հետ համաձայն մյուս խորհրդարանական ուժերը: Որքանով ինձ է հայտնի՝ նրանք եւս այլ տեսակետ ունեն եւ կարծում են, որ ԵԱՏՄ-ն օգուտ է բերում Հայաստանին, եւ դժվար է դրա հետ չհամաձայնել, եթե մենք տեսնում ենք ՌԴ եւ ԵԱՏՄ մյուս երկրներ մատակարարվող ապրանքների աճ: Բացվել է շուկա Հայաստանի համար, ինչպես կարելի է դրան դեմ լինել:
-Նշվում է, թե ՌԴ-ի հետ մենք մինչ ԵԱՏՄ-ին անդամակցելն էլ ունեինք առեւտրային հարաբերություններ, սակայն կառույցի մյուս երկրների հետ դրանց աճն առկա չէ:
-Թող զարգացնեն այդ համագործակցությունը, ով է նրանց խանգարում: ԵԱՏՄ-ն ընդհանուր նորմեր է սահմանել բոլոր երկրների համար, ինչպե՞ս կարող է այն վնասել Հայաստանին: Հայաստանն իր համար բացել է այդ շուկաները: Ես ինքս այդ կառույցից Հայաստանի համար միայն օգուտներ եմ տեսնում: Եվ դա փորձում եմ բացատրել նաեւ ընդդիմախոսներին ու ցույց տալիս թվեր, որոնց համաձայն ՌԴ-ի համար ավելի քիչ շահավետ է բաց շուկան, իսկ մյուս երկրների համար շահավետ է, որ բացվում է ռուսական շուկան:
-Օրեր առաջ ՌԴ արտաքին գործերի նախարար Սերգեյ Լավրովը հայտարարել էր, թե իրենք դեմ չեն Ադրբեջանի՝ ԵԱՏՄ միանալուն: Ո՞ր դեպքում է դա հնարավոր, եթե հաշվի առնենք, որ Հայաստանը նաեւ վետոյի իրավունք ունի:
-Առանց Հայաստանի համաձայնության նման համաձայնություն ստանալ մյուսներից շատ դժվար կլինի: Եվ դա բոլորը լավ հասկանում են: Թե այդ ամենը հետագայում ինչպես կարող է զարգանալ, բոլորն էլ լավ հասկանում են, որ դա հնարավոր է միայն Հայաստանի, Ադրբեջանի ՌԴ-ի, Բելառուսի եւ Ղազախստանի միջեւ կոնսենսուսի ձեռքբերման պայմաններում: Իհարկե, ՌԴ-ն դեմ չէ Ադրբեջանի՝ ԵԱՏՄ-ին միանալուն, սակայն վերջին խոսքը Հայաստանինն է:
-Ղարաբաղյան հակամարտության առկայության պայմաններում ինչպե՞ս եք տեսնում Հայաստանի եւ Ռուսաստանի միջեւ նման կոնսենսուսի առկայության հնարավորությունը:
-Տնտեսությունը՝ տնտեսություն, իսկ տարածքային հարցերն այլ են: Մենք այսօր ունենք տարածքային հարցեր Ուկրաինայի հետ, սակայն միեւնույն ժամանակ տնտեսական հարաբերություններ են առկա եւ նույնիսկ զարգանում են: Ահա եւ պարադոքս: Իհարկե, միշտ տնտեսությունը եւ գեոքաղաքականությունը կապակցված են եւ չեն կարող զարգանալ տարբեր ուղղություններով, սակայն իմ կարծիքով՝ տնտեսությունը թույլ կտա լուծել կամ մոտենալ նաեւ քաղաքական հարցերի լուծմանը:

Զրուցեց ՆԱԻՐԱ ՀՈՎՀԱՆՆԻՍՅԱՆԸ

ՀԱՍԱՎ ԱՄՆ
«Երկիր Ծիրանի» կուսակցության նախագահ Զարուհի Փոստանջյանն ԱՄՆ-ում բողոքի ցույց է անցկացրել: Նոյեմբերի 26-ին՝ Լոս Անջելեսի ժամանակով ժամը 12:00-ին, ԱՄՆ-ի Լոս Անջելեսի Գլենդել քաղաքի քաղաքապետարանի դիմաց տեղի է ունեցել համահայկական ընդվզմանն ընդառաջ «Երկիր Ծիրանի» կուսակցության նախագահ Զարուհի Փոստանջյանի մասնակցությամբ բողոքի ցույց: Այն ավարտվել է երթով, որի մասնակիցները, Զարուհի Փոստանջյանի գլխավորությամբ, շարժվել են դեպի Լոս Անջելեսում Հայաստանի Հանրապետության հյուպատոսարան՝ հանձնելու պահանջագիր: Սակայն հյուպատոսարանը փակ է եղել, եւ ինչպես փաստում են կուսակցության անդամները, նույնիսկ հերթապահ չի եղել, որ ընդուներ ցույցի մասնակիցների անունից ներկայացվող պահանջագիրը: Հյուպատոսարանի դիմաց տեղի է ունեցել փոքր հավաք, որտեղ եւս ելույթ է ունեցել Զարուհի Փոստանջյանը: Այսքանով կուսակցությունն ավարտել է այդ օրվա ցույցը, Փոստանջյանի հետ հաջորդ հանդիպումն արդեն պետք է տեղի ունենա այսօր: Այդ հանդիպմանը «Երկիր Ծիրանի» կուսակցության նախագահը կպատասխանի ներկաների հարցերին: Հիշեցնենք, որ Զարուհի Փոստանջյանը հայտարարել է, թե նախապատրաստում է համահայկական ընդվզում եւ մինչեւ ԱՄՆ մեկնելը համախոհներ գտնելու ակնկալիքով շրջում էր Հայաստանի բնակավայրերում:

ԿՐԿԻՆ ԲԱՑԱԿԱ ԷԻՆ
Երեկ տեղի ունեցավ ԱԺ եվրոինտեգրման հարցերի մշտական հանձնաժողովի հերթական նիստը: Սպասվածի համաձայն՝ նիստից կրկին բացակայում էին ՀՀԿ-ական պատգամավորներից երեքը՝ Աշոտ Արսենյանը, Արտակ Սարգսյանն ու Արկադի Համբարձումյանը, ովքեր հանձնաժողովի ձեւավորման առաջին իսկ օրվանից նիստերին չեն մասնակցել: Ինչպես հայտնի է՝ նիստերից բացակայելու համար պատգամավորների աշխատավարձերից պահումներ են կատարվում, եւ վերը նշված պատգամավորներից նախորդ ամիսներին նման պահումներ արդեն իսկ կատարվել են: Սակայն, ինչպես երեւում է, այդ հանգամանքը նրանց այնքան էլ չի հուզում, եւ բացակայությունները շարունակվում են: «Ժողովուրդ» օրաթերթի հետ զրույցում հանձնաժողովի նախագահ Նաիրա Զոհրաբյանը նշեց, թե պատշաճ կարգով նշված պատգամավորների բացակայությունների մասին տեղեկանքը կներկայացվի ԱԺ նախագահ Արա Բաբլոյանին, որպեսզի աշխատավարձերից կրկին պահումներ արվեն: Հիշեցնենք, որ ի սկզբանե այս հանձնաժողովի անդամ էր նաեւ ՀՀԿ-ական Արայիկ Գրիգորյանը, սակայն Նաիրա Զոհրաբյանի դիտողություններից նեղսրտել էր եւ լքել հանձնաժողովը: Այժմ վերջինս տնտեսական հարցերով հանձնաժողովի անդամ է եւ շարունակում է բացակայել նաեւ այդ նիստերից:

ՀՈՂԱՄԱՍԵՐԻ ՏԻՐԱԿԱԼԸ
ՀՀ Կոտայքի մարզի ընդհանուր իրավասության դատարանի 31-ամյա դատավոր Գեղամ Մարգարյանը, ով իր կարիերան սկսել է դատական կարգադրիչից հասցրել է լուրջ ունեցվածք կուտակել: «Ժողովուրդ» օրաթերթը տեղեկացավ, որ նա ունի 12 հատ հողամաս, մեկ հատ պտղատու այգի, մեկ հատ անհատական բնակելի տուն եւ «BMW 730», «Mercedes-Benz A 170» մակնիշի ավտոմեքենաներ: Երիտասարդ դատավորի դրամական միջոցները կազմում են 10 մլն դրամ, 35 հազար դոլար, 10 հազար վրացական լարի: Ի դեպ, այս տարի նա 8 մլն դրամով գույք է վաճառել, իսկ աշխատավարձը պաշտոնը ստանձնելու օրվա դրությամբ կազմել է 296 հազար դրամ:
Փաստորեն տասը աշխատանքային տարիների ընթացքում նա «հասցրել է» ե՛ւ ֆինանսական միջոցները բարելավել, ե՛ւ աշխատանքում առաջընթաց գրանցել: Ու իզուր չէ, քանի որ նա ՀՀ վճռաբեկ դատարանի քրեական պալատի նախկին նախագահ, թոշակի անցած Դավիթ Ավետիսյանի ազգականն է, ով այս տարվա մարտի 10-ից փոխարինում է Կոտայքի դատարանի դատավոր, թոշակի գնացած Յուրա Բաղդասարյանին:

ՆԱԽԿԻՆ ՊԱՏԳԱՄԱՎՈՐԻ ԴԵՄ
Աժ ԲՀԿ խմբակցության անդամ Արշակ Մխիթարյանին՝ Բրիլիանտի Արշակին պատկանող «Դայմոնդ Հաուզ» ՓԲԸ-ն հայտնվել է դատական քաշքշուկների մեջ: «Ժողովուրդ» օրաթերթին տեղեկություններ հասան, որ միջնորդություն է ներկայացվել դատարան նախկին պատգամավորին պատկանող ընկերության գույքի դրամական միջոցների վրա արգելանք դնելու մասին, ինչը դատարանի կողմից բավարարվել է: Եվ այսպես՝ տեղեկացանք, որ Երեւանի քաղաքապետարանը դատական հայց է ներկայացրել նախկին պատգամավորին պատկանող «Դայմոնդ Հաուզ» ՓԲԸ-ի դեմ՝ պահանջելով գանձել մոտ 118 միլիոն դրամ եւ համապատասխան գանձված գումարը առարկայի վրա տարածել: Այս գործով դատավորը Ռուբեն Ափինյանն է: Իսկ դատաքննությունը նշանակվել է հունվարի 23-ին:

ԷԼԻ ԹԱՆԿԱՑՈՒՄ
Հայաստանում վերջին ամսիներին սկիզբ առած գնաճը «նոր հորիզոններ է նվաճում». մինչ հասարակությունը քննարկում է կարագի, ձվի, բենզինի շուկայում թանկացումները, «Ժողովուրդ» օրաթերթին հայտնի դարձավ, որ ՀՀ ազգային վիճակագրական ծառայությունը հսկայական գնաճ է արձանագրել սառեցված մսի եւ ձկնամթերքի շուկայում: Խոզի սառեցված միսը հունվար-հոկտեմբեր ամիսներին թանկացել է 41.6 տոկոսով, ընդ որում, միայն հոկտեմբերին գնաճը կազմել է 3.4 տոկոս: Ոչ միայն թարմ, այլեւ սառեցված ձկնամթերքն էլ այս ընթացքում թանկացել է 27.8 տոկոսով, ծովամթերքը՝ 24.7 տոկոսով:
Նկատենք, որ այս թանկացումները հիմնականում հետեւանք են ԵԱՏՄ մաքսային դրույքաչափերի, քանի որ մի շարք ապրանքատեսակների դեպքում ՀՀ-ի համար սահմանված արտոնությունների ժամկետը սպառվել է, եւ արդեն սկսել են կիրառվել ԵԱՏՄ-ում ընդունված ընդհանուր դրույքաչափերը: