ԿԱՐԱՊԵՏՅԱՆՆ ԱՅԴՊԵՍ ԷԼ ՉԴԱՐՁԱՎ ՔԱՂԱՔԱԿԱՆ ԳՈՐԾԻՉ

«Մեդիամաքս» գործակալությանը ՀՀ վարչապետ Կարեն Կարապետյանի տված վերջին հարցազրույցը պատահական չէր. 2018թ. ապրիլին ընդառաջ փորձ է արվում հասարակությանը ներկայացնել նաեւ Կ. Կարապետյան անձնավորությանը:

Այլ կերպ ասած՝ լայն թափով սկսվել է Կարեն Կարապետյան անձի PR-ը, ինչը նշանակում է, որ նա հայտ է ներկայացնում 2018թ. ապրիլից հետո եւս վարչապետի պաշտոնը զբաղեցնելու համար: Հիշում եք` ավելի վաղ մի քանի անգամ Կարապետյանն ասել էր, որ ցանկություն ունի եւ պատրաստ է 2018թ. լինել վարչապետը, նաեւ հավելել էր, որ մինչ այդ կհամապատասխանի Սահմանադրությամբ կառավարության ղեկավարի համար սահմանված չափանիշներին. խոսքը վերջին 5 տարում մշտական բնակության ցենզի մասին է: Հիմա որքան մոտենա 2018թ. ապրիլը, այնքան հաճախակի են նման դրսեւորումներ լինելու: Մանավանդ, գիտեք՝ այդ պաշտոնը զբաղեցնելու նպատակ ունի նաեւ Սերժ Սարգսյանը, եւ այս առումով իշխանության ներսում ներքին մրցավազք է սկսվել:
Այստեղ հետաքրքիր է մեկ այլ հանգամանք. նոր Սահմանադրության համաձայն՝ երկրի փաստացի ղեկավարը լինելու ՀՀ վարչապետը: Ըստ այդմ, վարչապետի վրա է դրված երկրի արտաքին քաղաքականության, անվտանգության ու պաշտպանության բնագավառների պատասխանատվությունը (պատահական չէ, որ արտաքին քաղաքականությանն առնչվող բոլոր որոշումները, համաձայնագրերի ստորագրումը նոր Սահմանադրության համաձայն՝ նախագահը կայացնելու է կառավարության կամ անձամբ վարչապետի առաջարկության հիման վրա): Միայն թե պարզ չեն արտաքին քաղաքականության եւ անվտանգության բնագավառների վերաբերյալ Կարեն Կարապետյանի պատկերացումները:
Իր գործունեության ավելի քան մեկ տարվա ընթացքում Կարեն Կարապետյանն այդպես էլ որեւէ հստակ դիրքորոշում չի հայտնել Հայաստանի համար առանցքային հարցերի, մասնավորապես Ղարաբաղյան խնդրի կարգավորման գործընթացի մասին, հայ-թուրքական, հայ-ռուսական, հայ-վրացական հարաբերությունների մասին: Նա այդպես էլ որեւէ գնահատական չի հնչեցրել ներքաղաքական գործընթացների վերաբերյալ, չնայած ի պաշտոնե Կարապետյանն իշխող կուսակցության առաջին փոխնախագահն է, Սահմանադրությամբ էլ՝ պետության երրորդ քաղաքական պաշտոնյան: Այս ընթացքում նա կարծես թե մեկ անգամ է խոսել ԼՂ խնդրից՝ այն էլ՝ հնչեցնելով դեկլարատիվ, տրիվիալ հայտարարություններ: Այս տարվա հունվարի 13-ին Կ. Կարապետյանը հայտարարել է, թե Հայաստանը տրամաբանական բանակցությունների արդյունքում կարողանալու է ապահովել իր հաղթանակը եւ անվտանգությունը, ինքնասիրությունը: Իսկ հարցին՝ կո՞ղմ է հարցի լուծման փոխզիջումային տարբերակին, վարչապետը պատասխանել է. «Նայած, թե ինչ փոխզիջման մասին է խոսքը: Եկեք, այդ մասին խոսենք, երբ կգա ժամանակը: Ես համոզված եմ, որ այս հարցում չի կայացվելու մի որոշում, որին դեմ կլինեն Հայաստանի քաղաքացիները, քանի որ սա շատ մեծ պատասխանատվություն է»: Այսինքն՝ ԼՂ խնդրում փոխզիջումների մասին Կարապետյանն այդպես էլ հստակ պատասխան չի հնչեցրել ու չի կոնկրետացրել՝ ինչն է իր համար ընդունելի, ինչը՝ ոչ:
Վարչապետը, նրա թիմը կարող են առարկել՝ ասելով, որ կառավարության 2017-2022թթ. գործունեության ծրագրում խոսք կա արտաքին քաղաքականության ընդհանուր ուղենիշների մասին, ըստ այդմ, ԼՂ խնդիրը պետք է լուծվի միջազգային իրավունքի հիմնարար սկզբունքների եւ նորմերի, մասնավորապես ժողովուրդների ինքնորոշման իրավունքի հիման վրա, իսկ հայ-թուրքական հարաբերություններն էլ պետք է կարգավորվեն առանց նախապայմանների: Բացի այդ՝ նրանք կարող են առարկել՝ ասելով, որ այնքան էլ վարչապետի իրավասությունների մեջ չեն մտնում այս հարցերը, եւ որ Սերժ Սարգսյանն է այժմ այդ ամենի պատասխանատուն եւ այդ բնագավառում քաղաքականություն իրագործողը: Բայց, դե, այս ամենը համոզիչ չէ թեկուզ եւ այն առումով, որ նախ՝ վարչապետն այսօր պետության երրորդ դեմքն է եւ, այնուամենայնիվ, պարտավոր է տեսակետ հայտնել: Եւ հետո՝ պաշտոնավարման այս ընթացքում Կարապետյանը, այնուամենայնիվ, փորձել է մտնել Սերժ Սարգսյանի տիրույթ. պարզապես ոչ թե արտաքին, այլ ներքաղաքական հարցերում: Մասնավորապես նա չի խորշել ոստիկանությանը հանձնարարականներ տալու հարցում, թեեւ այս կառույցը Սերժ Սարգսյանի անմիջական վերահսկողության տակ է: Հիշեցնենք՝ հանձնարարականներ էր տվել ոստիկանությանը «Մաքուր Հայաստան» ծրագրի շրջանակներում աղբահանության ոլորտում վերահսկողություն անելու վերաբերյալ: «…Բռնում եք, ասում եք՝ հավաքի, գնա»,- այս տարվա ապրիլին ասել էր Կարապետյանը ոստիկանապետին (համաձայնեք՝ աղբահանությանը հետեւելն այնքան էլ ոստիկանության գործը չէ): Նա ոստիկանությանը հանձնարարականներ էր տվել նաեւ կապված կարմիր գծերի եւ տեսախցիկների, տուգանքների հետ: Ընդ որում, 2016թ. նոյեմբերի 2-ին Սերժ Սարգսյանն այս թեմայով խորհրդակցություն էր հրավիրել, իսկ հաջորդ օրն իսկ Կարապետյանը որոշել էր մտնել այդ դաշտ, ու Սարգսյանի ասածներին որպես լրացում ոստիկանությանն իր հանձնարարականները տվել: Կարապետյանն ընդունել էր տարկետման իրավունքը սահմանափակող օրենսդրության դեմ բողոքի ցույցեր եւ դասադուլներ անող ուսանողներին՝ փորձելով այս հարցին լուծում տալ: Ու սա այն դեպքում, երբ այս ոլորտը եւս Սերժ Սարգսյանի անմիջական վերահսկողության դաշտից է:
Այնպես որ, որեւէ բան չի խանգարել, որպեսզի Կարապետյանը մտներ նաեւ արտաքին քաղաքական դաշտ: Բայց չի արել, հավանաբար, այդ ոլորտից գլուխ չհանելու պատճառով: Պատահական չէ նաեւ փաստը, որ Կարապետյանը, լինելով տնտեսության պատասխանատուն, այս ոլորտում էլ սահմանափակ շրջանակներում է գործունեություն ծավալում: Մասնավորապես ներդրումներ նա փորձել է ներգրավվել միայն ՌԴ-ից, ռուսաստանահայ գործարարների միջոցով (ասվածի ապացույցը ներդրողների ակումբն է), բացի այդ՝ նա այցեր է արել հարեւան Վրաստան ու Իրան, եղել է ԵԱՏՄ անդամ երկրներում: Իսկ ահա եվրոպական երկրներ իր պաշտոնավարման ավելի քան մեկ տարվա ընթացքում այդպես էլ աշխատանքային այց չի ունեցել եւ եվրոպական երկրներից Կարապետյանն այդպես էլ չի փորձել ներդրումներ բերել:
Հ.Գ. Մինչեւ 2018թ. ապրիլ դեռ 4 ամիս ժամանակ կա, եւ չի բացառվում՝ Կարապետյանն այս ընթացքում փորձի իր «ունակությունները դրսեւորել» եւ պատկերացումները ներկայացնել վերը նշված հարցերի շուրջ: Ամեն դեպքում, որքան մոտենա 2018թ. ապրիլը, այնքան ներիշխանական խաղերն ավելի բացահայտ դրսեւորումներ կունենան:

ԱՐՄԱՆ ԳԱԼՈՅԱՆ

ՌԴ ԴԵՍՊԱՆԸ ՓՈԽՎԵԼՈՒ Է
«Ժողովուրդ» օրաթերթին հայտնի դարձավ, որ առաջիկայում ՀՀ-ում Ռուսաստանի Դաշնությունը նոր արտակարգ եւ լիազոր դեսպան կնշանակի: Բանն այն է, որ մարտի 22-ին լրանում է դեսպան Իվան Վոլինկինի պաշտոնավարման հինգ տարին: Առհասարակ, դեսպանները նշանակվում են 3 կամ 5 տարի ժամկետով, որից հետո փոխարինվում են: Իվան Վոլինկինը դիվանագիտական աշխատանքի Հայաստանում նշանակվել էր 2013 թվականի մարտի 22-ին՝ այդ պաշտոնում փոխարինելով Վյաչեսլավ Կովալենկոյին: Այսպիսով՝ չորս ամիս անց ՀՀ-ում ՌԴ-ի նոր դեսպան կունենանք: Սակայն դեռեւս հայտնի չէ, թե ՌԴ-ն դեսպանի պաշտոնում ո՞ւմ թեկնածությունն է առաջադրելու:

ՖԻՆԱՆՍԱՊԵՍ ԱՃՈՒՄ Է
Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանին բնակարան եւ ավտոմեքենա չունենալը չի խանգարում, որ դրամական միջոցները տարեցտարի աճեն: Այսպես՝ «Ժողովուրդ» օրաթերթը պաշտոնական փաստաթղթերից պարզեց, որ եթե դատավորը 2012 թվականին ունեցել է 4 միլիոնի չափ դրամական միջոց, ապա այն 2013-ին վերածվել է 5.5 մլն դրամի, 2014-ին` 6 մլն դրամի, 2015-ին` 7 մլն դրամի, 2016 թվականին` 10 մլն դրամի: Բացի այս՝ անցած տարվա ընթացքում դատավորը որպես եկամուտ հայտարարագրել է իր աշխատավարձը, որը ամսական կազմում է 547 հազար դրամ եւ վարձակալության դիմաց ստացած 8 մլն 586 հազ դրամը: Թե ինչ են դատավորից վարձակալել, պաշտոնական փաստաթղթում որեւէ բան նշված չէ: «Ժողովուրդ» օրաթերթը նաեւ պարզեց, որ դատավորի տիկնոջ` Լուսինե Մնացականյանի ունեցածը միայն չոր աշխատավարձն է, որ ամսական կազմում է 235 հազար դրամ: Ի դեպ, դատավոր Արշակ Վարդանյանը երեկ հրապարակեց Իգլայի գործով վճիռը եւ Սամվել Բաբայանին ազատազրկման դատապարտեց վեց տարի ժամկետով:

ԾԱՌԱՅՈՒԹՅԱՆ ՊԵՏԸ ԿԱԼԱՆԱՎՈՐՎԵԼ Է
Պաշտպանության նախարարության պաշտոնատար անձանց կողմից չարաշահումների դեպքերը շարունակվում են: «Ժողովուրդ»-ին հայտնի դարձավ, որ ՀՀ ՊՆ Ն զորամասի իրային եւ պարենային ծառայության պետ Ռաֆիկ Գեւորգյանին մեղադրանք է առաջադրվել այն բանի համար, որ նա լինելով ծառայության պետ՝ պայմանավորվածություն է ձեռք բերել նույն զորամասի իրային եւ պարենային գույքի պահեստի պետ Աշոտ Աբրահամյանի հետ եւ 2017 թվականի հունիսի 26-ին՝ ժամը 20-ից 23:30-ն ընկած ժամանակահատվածում, իրային գույքի պահեստից յուրացման եղանակով հափշտակել է ի պաշտոնե իրեն վստահված գույքը՝ պետությանը պատճառելով 1 մեկ միլիոն դրամ գույքային վնաս: Նշենք, որ Ն զորամասի իրային եւ պարենային ծառայության պետ Ռաֆիկ Գեւորգյանը կալանավորվել է, իսկ ահա իրային եւ պարենային գույքի պահեստի պետ Աշոտ Աբրահամյանի նկատմամբ խափանման միջոց է ընտրվել ստորագրությունը չհեռանալու մասին:

ՊԵՏՔ ՉԷ ՍՊԱՍԵԼ
Ըստ փորձագետ Արա Պապյանի՝ Հայաստանի եւ ԵՄ հետ համապարփակ եւ ընդլայնված համագործակցության պայմանագրի ստորագրումից հետո պետք է երկար ճանապարհ անցնել: Այդ պայմանագրի իրագործման համար կողմերը դեռ երկար ճանապարհ պետք է անցնեն. «Դա, ընդհանուր առմամբ, շրջանակային համաձայնագիր է: Անհրաժեշտ է նկատի առնել այն փաստը, որ գործընկերության մասին պայմանագիրը հաշվի է առնում իրականությունը, մասնավորապես Եվրասիական տնտեսական միության անդամակցությունը: Բացի այդ՝ տվյալ համաձայնագիրը, ըստ նրա, բաղկացած է 386 հոդվածից, եւ դա պետք է վավերացնեն Եվրոպական միության բոլոր 28 երկրները, ինչպես նաեւ եվրոպական երկու կառույցներ ու նաեւ Հայաստանը: Հետեւաբար, Արա Պապյանի կարծիքով, պետք չէ սպասել արագ եւ կայուն փոփոխությունների:

ՀԱՆԴԻՊԵԼ Է
ՌԴ նախագահ Վլադիմիր Պուտինը հանդիպել է Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Յուրի Խաչատուրովի հետ: Նշենք, որ նոյեմբերի 30-ին Մինսկում տեղի է ունենալու Հավաքական անվտանգության խորհրդի նիստը:

ՍՏՈՐԱԳՐԵԼ Է
Սերժ Սարգսյանը ստորագրել է ԱԺ ընդունած «Հայաստանի Հանրապետության եւ այլ երկրների միջեւ միջպետական (միջկառավարական) համաձայնագրերի շրջանակներում ՀՀ զինված ուժերի համար բացառապես ռազմական նշանակության արտադրանքի ներմուծումն ավելացված արժեքի հարկից ազատելու մասին» ՀՀ օրենքը: