«Ժողովուրդ»-ը երգիչ Արսեն Սաֆարյանի հետ զրուցել է 2017 թվականին ունեցած ձեռքբերումների, կորուստների մասին: Վերջինս պատմել է իր կատարած հետաքրքիր ճամփորդության, մյուս տարվա հետ կապած հույսերի մասին: Նա խոստովանել է, որ ցանկանում է շուտ ճանապարհել 2017-ը եւ նորանոր սպասումներով դիմավորել նոր տարին:
-Արսեն, ո՞րն եք համարում 2017 թվականի Ձեր մեծագույն ձեռքբերումը:
-Եթե անկեղծ լինեմ` 2017 թվականն այնքան էլ հաջող տարի չի եղել, սրտանց ուզում եմ, որ այն շուտ գնա, այն հիասթափությունների տարի էր: Չեմ ուզում մանրամասնել, թե այդ հիասթափությունները կոնկրետ որ հարաբերություններում գրանցվեցին, իմաստ չունի որեւէ բան ասել: Հուսով եմ` հաջորդ տարին ուրախ կդիմավորենք, եւ այն ավելի հաջող կլինի:
-Այս տարի ստեղծագործական կյանքում Ձեր գրանցած հաջողությունը ո՞րն եք համարում:
-Ունեցել եմ շատ մենահամերգներ` ակումբային տարբերակներով. այդ իմաստով դրական տարի էր: Ամեն համերգից հետո ինքդ քեզ ապացուցում ես, որ կարող ես գեղեցիկ մատուցել քո երաժշտությունը: Դա շատ պետք է քեզ եւ քո հանդիսատեսին: Այդ մենահամերգները շատ ուժ տվեցին ինձ: Ասում են` լավ կրկնությունն էլ լավ բան է. սա այդ դեպքն է: Ստեղծագործական ձեռքբերումներ եղան նաեւ տարեվերջում: Ինձ համար մի հիթային երգ է գրվել, որն արդեն պատրաստ է, 2018-ին նոր դրա հիման վրա տեսահոլովակ կներկայացնենք:
-Իսկ ո՞րն եք համարում այս տարվա ամենամեծ նյութական ձեռքբերումը:
-Այդպիսի զգալի ձեռքբերումներ չեմ ունեցել. նոր դղյակ կամ վերջին մոդելի «Պորշ» չունեմ: Բայց ես աշխատող մարդ եմ ու միշտ էլ աշխատելու եմ, տարին կապ չունի:
-Իսկ ինչպիսի՞ն էր տարին նոր ընկերներ ձեռք բերելու առումով:
-Ես իմ հին ընկերներով էլ եմ յոլլա գնում: Ձեր ասած նոր ընկերները հաճախ հետաքրքիր անակնկալներ են մատուցում, այնպես որ, հիմա խուսափում եմ նոր ծանոթություններից: Մենք ունենք ընտանիքին մոտ շատ լավ ընկերներ, եւ, կարելի է ասել, դրանով էլ հարուստ ենք:
-Արսեն, ո՞րն եք համարում 2017-ի ամենամեծ կորուստը:
-Առողջությունս էի մի քիչ կորցրել, բայց վերականգնվեց: Գլոբալ կորուստ չի եղել, այսպես ասեմ` ամեն ինչ հետ ենք բերել, փառք Աստծո:
-Ո՞րն է 2017-ին Ձեր կատարած ամենահետաքրքիր ճամփորդությունը:
-Ընտանիքիս հետ եղել ենք Հունաստանում: Ինձ համար հետաքրքիրն այն էր, որ այս անգամ երեխաներիս հետ էի ճամփորդում, մի տեսակ ավելի մտերմացա նրանց հետ, վերարժեւորեցի ունեցածս: Այլապես շատ էի անիմաստ ժամանակ կորցրել այլ բաների համար:
-Հետաքրքիր է` գալիք 2018 թվականի հետ ի՞նչ հույսեր եք կապում:
-Ես այդ առումով չեմ առանձնանում մյուսներից եւ, ինչպես բոլորը, ցանկանում եմ, որ 2018-ին իմ ընտանիքի անդամները, մտերիմները առողջ լինեն: Ինչ վերաբերում է գործնականին, ասեմ, որ փնտրում եմ մի ակումբ, որտեղ կկարողանամ կատարել իմ երգերը, որը կլինի ինձ հոգեհարազատ վայր: Կան մարդիկ, որոնք ուզում են ինձ պարբերաբար լսել: Պարտադիր չէ, որ ես համալիրում համերգ ունենամ: Մարդիկ ուզում են հանդիպել ինձ հետ, գալ, լսել իմ երգերը, հիշել դրանք, ծանոթանալ նոր գործերի եւ այլն: Վստահ եմ, որ երբ գտնեմ այդ միջավայրը, կարճ ժամանակում քաղաքիս համար կվերածեմ այն ջերմ անկյունի: Դեռ փնտրտուքների մեջ եմ: Շատ կուզենամ, որ այդ ակումբում հնչեն նաեւ իմ ընկերների երգերը, ելույթ ունենան իմ կոլեգաները: Հաստատ իրականացնելու եմ այդ նպատակս, մինչեւ հիմա չի եղել այնպիսի բան, որ ուզենամ ու չլինի:
-Իսկ հաջորդ տարի Ձեզնից դուետ սպասե՞նք:
-Դուետ առայժմ չկա, ես էլ հենց այնպես ոչինչ չեմ անի: Եթե լինի հարմար առաջարկ, կընդունեմ, եթե ոչ, նոր երգեր ու տեսահոլովակներ հաստատ սպասվում են: Հիմա կենտրոնացել եմ իմ ստեղծագործական կյանքի վրա:
Զրուցեց ԱՆՆԱ ԲԱԲԱՋԱՆՅԱՆԸ
«ՃԻՇՏ ՄԱՐԴՈՒ ՉԷԻ ՍԻՐԱՀԱՐՎԵԼ»
«Ժողովուրդ»-ը շարունակում է ներկայացնել «Աստղերի առաջին սերերը» շարքը, որի շրջանակում անդրադառնում ենք հայ հայտնիների կյանքի՝ քչերին հայտնի դրվագների, վերջիններս կատարում են անկեղծ խոստովանություններ, նշում՝ ափսոսում են, որ իրենց առաջին սիրո հետ հարաբերությունները չեն շարունակվել, թե ոչ: Այսպիսով՝ մեր զրուցակիցը «Եղբայրներ», «Մամա», «Խաչվող հետքեր», «Ֆուլ հաուս» հեռուստանախագծերից եւ «Poker.am», «Հյուսիս-հարավ», «Carte Blanche» ֆիլմերից հայտնի դերասանուհի Էվա Խաչատրյանն է:
Նա այն կարծիքին է, որ եթե առաջին սերը մարդուն այցելում է շատ վաղ հասակում, այն, սովորաբար, ուժեղ էմոցիաներ չի թողնում. խոսքն այս դեպքում կոնկրետ այդ պահի տպավորության մասին է, իսկ եթե ավելի հասուն տարիքում է այցելում, սովորաբար չի մոռացվում, մնում եւ գունավորում է հետագա կյանքը. «Ես առաջին անգամ լրջորեն սիրահարվել եմ 17-18 տարեկանում, այդ ժամանակ առաջին կուրսում էի սովորում: Իհարկե, մինչ այդ բակում, դպրոցում բազմիցս ունեցել եմ հրապուրանքներ: Բայց ուսանողական տարիքում ամեն բան այլ էր, ես տաք էի, պատրաստ ամեն ինչի, ինչպես այդ տարիքում լինում է: Բայց բանն այն է, որ այդքան էլ ճիշտ մարդու չէի սիրահարվել, նա ոչ մի կապ չուներ ինձ հետ ոչ իր դաստիարակությամբ, ոչ ապրելակերպով: Այդ տղան հաշտ չէր նաեւ իմ ընտրած մասնագիտության հետ: Լավ էր, որ բաժանվեցինք, այլապես անհամատեղելի զույգ կլինեինք»:
Էվան նաեւ տեղեկացրեց, որ հետագայում հանդիպել է իր առաջին սիրուն, բայց նրա հետ կապը չի պահում: Վերջինս հասցրել է ընտանիք կազմել, ունի երկու երեխա:
Դերասանուհին խոստովանեց, որ իր առաջին սերը հետագա ընտրությունների վրա ոչ մի նշանակալի ազդեցություն չի ունեցել. «Ես սխալվել եմ, դրանից հետո էլ եմ բազմիցս սխալվել. այդ ամենը մարդու համար է: Մեծ հաշվով դա սխալվել էլ չէ: Ի վերջո, ընտրություն կատարելը շատ բարդ է: Կարող ես հազար անգամ փորձել, ոչինչ չստացվի եւ մեկ անգամ փորձել, ու դա ճիշտ ընտրություն լինի: Ամեն բան հարաբերական է եւ ինդիվիդուալ: Ես ուրախ եմ, որ դեռ չեմ գտել իմ կեսին, քանի որ զարգացումն ինձ մոտ լուսային արագությամբ է տեղի ունենում, եւ ով էլ կողքիս լիներ, չէր հասցնելու հետեւիցս հասնել ու տուժելու էր, ինչը ես բազմիցս զգացել եմ: Լավ կլինի, որ կողքիդ տղամարդ հայտնվի այն ժամանակ, երբ երկուսդ էլ բավականաչափ հասուն եք»:
Ա. ԲԱԲԱՋԱՆՅԱՆ
.gif)
