ՏԱՔՍԻՆԵՐԻ ՈԼՈՐՏՈՒՄ ԱՌԿԱ ԲԱՐԴԱԿԸ ՇԱՐՈՒՆԱԿՎՈՒՄ Է

«Անթրաշ, չստիկով, սիգարետը բերանին, Երեւանյան լիճը Սեւանա լճի տեղ Մալաթիա-Սեբաստիայով բերել, տարիֆների տարբեր կիրառում եւ այլն». «Զվարթնոց» օդանավակայանի տարածքում տաքսի ծառայություն մատուցող վարորդների վիճակը անցած տարվա հունիսին ահա այսպես նկարագրեց վարչապետ Կարեն Կարապետյանը: Ի՞նչ փոխվեց ոլորտում: Նրա այս հայտարարությունից անցել է մոտ 8 ամիս, սակայն «անթրաշ», «սիգարետը բերանին» վարորդները շարունակում են տաքսի վարել:

Հիշեցնենք, որ նախորդ տարվա հունիսին` կառավարության նիստերից մեկի ընթացքում, ՀՀ վարչապետ Կարեն Կարապետյանը, անդրադառնալով «Զվարթնոց» օդանավակայանում տաքսի ծառայություն իրականացնող անձանց` ՀՀ տրանսպորտի եւ կապի նախարարությանը, ՀՀ ոստիկանապետին հանձնարարել էր հատուկ վերահսկողություն սահմանել, ստուգումներ անցկացնել եւ անհատ տաքսու վարորդներին լիցենզիա տրամադրելիս հատկապես ուշադիր լինել: Վարչապետի այս հայտարարությունից անցել է մոտ 8 ամիս, սակայն ոլորտում դեռեւս էական փոփոխություններ չեն նկատվում:
«Ժողովուրդ» օրաթերթը ՀՀ տրանսպորտի, կապի եւ տեղեկատվական տեխնոլոգիաների նախարարությունից հետաքրքրվեց, թե նախարարությունը կոնկրետ ի՞նչ քայլեր է արել եւ ի՞նչ արդյունքներ է արձանագրել այս ուղղությամբ: Պարզվեց` ոչինչ: Միայն. «Մենք սկսել ենք շահագործել Երեւան-«Զվարթնոց» օդանավակայան կանոնավոր ավտոբուսային երթուղին: Դա խթան է հանդիսանում, որ մեր ուղեւորները հնարավորինս օգտվեն հենց այդ տրանսպորտային տեսակից, որը մաքուր է, լրիվ նոր է, ժամանակակից կահավորանք ունի»: Ապա անդրադառնալով տաքսիների ոլորտին` պաշտոնյան հայտարարեց, որ տրանսպորտային պետական տեսչության աշխատակիցների կողմից ամենօրյա վերահսկողական գործառույթներ են իրականացվում: Այսինքն` նախարարության աշխատակիցները ամեն օր շրջում են եւ վերահսկողական միջոցառումներ իրականացնում: «Ուսումնասիրությունների արդյունքում նրանք, ովքեր չեն համապատասխանում ընդհանրապես օրենքով սահմանված պահանջներին ու պայմաններին, նրանց նկատմամբ կիրառվում է վարչական պատասխանատվություն»,- ընդգծեց տեսչության պետի տեղակալ Դ. Մելքոնյանը:
Ի դեպ, տեղեկացնենք, որ տաքսի վարելու համար նախ անհրաժեշտ է նախարարությունից ստանալ լիցենզավորման կարգ: Իսկ այն ստանալու համար վարորդը պետք է ներկայացնի կարգով պահանջվող փաստաթղթերը եւ համապատասխան վճարում կատարելուց հետո նա արդեն կարող է հանգիստ տաքսի վարել: Ըստ Մելքոնյանի` պահանջներ կան, որոնք վարորդը պարտավոր է ապահովել:
Նախարարության ներկայացուցչի հետ զրույցում պարզվեց, որ լիցենզիա տրամադրելու ժամանակ չի ասվում, թե վարորդի տեսքն ինչպիսին պետք է լինի, եւ ինչպես պետք է իրեն պահի: Անգամ նախարարության աշխատակիցը չի ստուգում` արդյո՞ք վարորդի մեքենան բավարարում է լիցենզավորման կարգի տրամադրման համար նախատեսված հուշաթերթիկի պահանջները:
Իսկ տվյալ հուշաթերթիկն ունի հետեւյալ պահանջները.
1. Ուղեսրահում` ուղեւորին տեսանելի մասում տեղադրված տաքսամետր` սակաչափիչ, որը պետք է ստուգաչափվի կոնկրետ ավտոմոբիլի համար եւ ամրացվի այդ ավտոմոբիլին:
2. Տանիքին` «Տաքսի» գրառմամբ կամ շախմատաձեւ դեղին եւ սեւ գույնի տարբերանշան:
3. Ուղեսրահում` տաքսի-ծառայություն մատուցող կազմակերպության եւ տվյալ ավտոմոբիլի վարորդի կամ Ա/Ձ չհանդիսացող ֆիզիկական անձի մասին տեղեկատվություն` կազմակերպության անվանումը, հեռախոսահամարը, վարորդի անունը, ազգանունը:
4. Թափքի կոդային մասում եւ ուղեսրահում գնացուցակ, որը առնվազն պետք է ներառի ուղեւորափոխադրման նվազագույն արժեքը, ուղեւորափոխադրման սակագինը, նստելավարձի եւ սպասելավարձի մասին տեղեկություն:
5. Դիմապակու ներքեւի աջ անկյունում փակցված լիցենզիայի ներդիր:
Հայաստանում այսօր գործում են մի քանի հազարների հասնող տաքսիներ: Արդյո՞ք բոլոր տաքսի ավտոմեքենաներն են համապատասխանում հուշաթերթիկում ներկայացված պահանջներին: Իհարկե ոչ: Չեն կարող բավարարել հուշաթերթիկի պահանջները, որովհետեւ նախարարության աշխատակիցը կարգը տրամադրում է առանց ստուգելու ավտոմեքենան:
«Նախարարության աշխատողը ֆիզիկապես չի ստուգում մեքենան: Մարդկային գործոնը մենք բացառել ենք: Չենք ուզում, որ մեր աշխատակիցը իջնի, փաստացի մեքենան նայի եւ դուրը չգալու կամ գալու դեպքում համապատասխան փաստաթուղթը տա: Եթե մեքենան տեխնիկապես խնդիր ունի, ապա այդ խնդրի պատասխանատուն տեխնիկական զննության կայանն է: Մեր նախարարության լիցենզավորման գործակալության աշխատակիցը չի կարող տրանսպորտային միջոցի վերաբերյալ եզրակացություն տալ»,- արդարացավ տեսչության պետի տեղակալը: Նա զրույցի ընթացքում նկատեց նաեւ, որ տաքսիների մասով օրենսդրական փոփոխություններ են իրականացվում` անվտանգությունը, սպասարկման որակը բարձրացնելու ուղղությամբ: Հարցին` երբ են, ի վերջո, իրականանալու այդ փոփոխությունները, վարչության պետի տեղակալը արձագանքեց. «Մենք արդեն նախագիծ ունենք, որը քննարկում ենք եւ հույս ունենք, որ հնարավորինս արագ կլինի»:
Հուսանք` մի օր էլ վարչապետը կմտահոգվի այս հարցի շուրջ եւ հանձնարարականը տալուց հետո հետեւողական կլինի դրա կատարմանը: Եւ մենք` ՀՀ քաղաքացիներս, տաքսի կանգնեցնելուց վայրկյաններ անց չենք ափսոսի դրա համար: Կամ աշխատանքից հոգնած ստիպված չենք լինի փնթի, «ռաբիս քոքած քյառթու», մուննաթով, անընդհատ խոսող ու դժգոհող վարորդին մի քանի րոպեով վստահել մեր կյանքը:

ՍՅՈՒՆԷ ՀԱՄԲԱՐՁՈՒՄՅԱՆ

ԴԵՌ ՀԱՆՁՆՈՒՄ ԸՆԴՈՒՆՈՒՄ ԵՆ
2017թ. նոյեմբերի 5-ին Իջեւանի տարածաշրջանի սահմանամերձ Աչաջուր գյուղում կայացան համայնքի ղեկավարի ընտրություններ: Աչաջուրը Տավուշի մարզի ամենամեծ գյուղերից է, 2017թ. հունվարի 1-ի դրությամբ գյուղն ունեցել է 4463 բնակիչ: Համայնքապետի թեկնածուները 4-ն էին, այդ թվում համայնքի գործող ղեկավար, Աչաջուրը 2013 թվականից ղեկավարած Կամո Ղալթախչյանը եւ Աչաջրի նախկին համայնքապետ, 1990-ական թվականների երկրորդ կեսին Աչաջուրը ղեկավարած Տաթեւ Գասպարյանը: Ընտրություններում հաղթեց գործարար, ՀՀԿ անդամ Կարեն Ղալթախչյանը: Նախորդ տարվա դեկտեմբերի 17-ին լրացավ Աչաջուր համայնքի նախկին ղեկավար Կամո Ղալթախչյանի լիազորությունների ժամկետը, եւ Կարեն Ղալթախչյանը սկսեց որպես համայնքի ղեկավար պաշտոնավարել: Եւ համայնքապետարանում սկսվել է գործերի եւ փաստաթղթերի հանձնման-ընդունման գործընթացը: Թվում էր, թե երկար չի տեւի գործընթացը, սակայն այն շարունակվում է մինչ օրս: Նորընտիր համայնքի ղեկավար Կարեն Ղալթախչյանը «Ժողովուրդ» օրաթերթի հետ զրույցում հաստատեց, որ հանձնման-ընդունման գործում խնդիրներ կան, եւ անընդհատ երկարաձգվում է պրոցեսը:

ՀՈԳԵԲՈՒՅԺԻՆ ԴԱՏՈՒՄ ԵՆ
2017թ. դեկտեմբերի 21-ին Տավուշի մարզի առաջին ատյանի դատարանի Բերդի նստավայրում մեկնարկել է Իջեւանի բժշկական կենտրոնի բժիշկ Համլետ Հարությունյանի դատավարությունը: Վերջինիս մեղադրանք է առաջադրվել այն բանի համար, որ նա, աշխատելով «Իջեւան բժշկական կենտրոն» ՓԲԸ-ում` որպես հոգեբույժ-նարկոլոգ, այդ ԲԿ-ում իրեն հատկացված մասնաբաժնի իր աշխատասենյակի դարակում պաhել է զգալի չափերով հոգեմետ նյութեր, որոնք 2017թ. հուլիսի 3-ին հայտնաբերվել են ոստիկանության Իջեւանի բաժնի աշխատակիցների կողմից: Հ. Հարությունյանին մեղադրանք է առաջադրվել ՀՀ քրեական օրենսգրքի 266 հոդվածի 1-ին մասով («Իրացնելու նպատակով թմրամիջոցներ, հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը, առաքելը կամ դրանք ապօրինի իրացնելը») եւ 266 հոդվածի 2-րդ մասի 2-րդ կետով («Իրացնելու նպատակով թմրամիջոցներ, հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը, առաքելը կամ դրանք ապօրինի իրացնելը, որոնք կատարվել են խոշոր չափերով»): Առաջին հոդվածը որպես պատիժ նախատեսում է 3-7 տարի ազատազրկում, 2-րդը` 5-10 տարի ազատազրկում` գույքի բռնագրավմամբ կամ առանց դրա: Հ. Հարությունյանի նկատմամբ խափանման միջոց է ընտրվել երկրից չհեռանալու մասին ստորագրությունը: Նշված քրեական գործով, որպես իրեղեն ապացույց, դատարան է ներկայացվել հոգեմետ դեղերի 2 փաթեթ: Հ. Հարությունյանի դատավարության հերթական նիստը նշանակված է հունվարի 18-ին:

ՈՍԿԱՆ ՍԱՐԳՍՅԱՆ
Տավուշ