«Սլավմեդ» բժշկական կենտրոնը կարևորելով պարտադիր ժամկետային զինծառայողների և նրանց ընտանիքների անդամների սոցիալական պաշտպանվածությունն ու երաշխիքները, սահմանել է հատուկ զեղչային համակարգ ՀՀ զինված ուժերում պարտադիր ժամկետային զինծառայություն իրականացնող, զոհված կամ վիրավոր զինծառայողների ընտանիքների համար: Այս մասին այսօր լրագրողների հետ զրույցում հայտնեց «Սլավմեդ» ԲԿ-ի զարգացման բաժնի տնօրեն Արման Խարազյանը:
Նրա խոսքով՝ յուրաքանչյուր մարդու համար թանկ է իր առողջությունը, ինչն անհերքելի է, սակայն եթե գոյությունդ վտանգված է երկրիդ խաղաղությանը սպառնացող հնարավոր մարտահրավերների պատճառով, առաջնային է դառնում անվտանգության հարցը։
«ՀՀ զինված ուժերում այսօր մեր հայրենիքի սահմանները պաշտպանում են տասնյակ հազարավոր ժամկետային զինծառայողներ, որոնցից շատերը փառավոր սխրանքներ են գործել իրենց ծառայությունն իրականացնելիս։ Ցավոք շատերը հայրենիքի սահմանները պաշտպանելիս զոհաբերել են իրենց կյանքը, քիչ չեն նաև առողջությունը կորցրած զինվորները: Տևական ժամանակ ուսումնասիրելով ժամկետային
զինծառայողների ընտանիքների սոցիալական խնդիրները և իրականացնելով դրանց նախնական գնահատում՝ արձանագրեցինք, որ, բացի սոցիալական կարիքները, քիչ չեն նաև ընտանիքի անդամների առողջական խնդիրները։
Սովարաբար զինծառայողի ընտանիքի համար ամեն անցնող օրը մոտեցնում է զավակի տունդարձի ճանապարհը, ու նրանք տարբեր պատճառներով հաճախ անտեսում են սեփական առողջությունը։
Գնահատելով և կարևորելով զինվոր դաստիարակած ծնողների նվիրումը մեր երկրին՝ որոշում կայացվեց օգնել ՀՀ զինված ուժերում ժամկետային զինծառայություն իրականացնող, զոհված կամ վիրավոր զինծառայողների ընտանիքներին՝ սահմանելով նրանց համար հատուկ զեղչեր կենտրոնում գործող դժվարամատչելի գործիքային և լաբորատոր հետազոտություներից օգտվելու համար»-տեղեկացրեց Ա․ Խարազյանը:
Նրա հավաստմամբ՝ ՀՀ զինված ուժերի ժամկետային զինծառայողների ընտանիքի անդամները, անկախ իրենց բնակության վայրից, «Սլավմեդ» բժշկական կենտրոնում կարող են ստանալ որակյալ բուժօգնություն անհամեմատ մատչելի գներով:
«Այս քայլով, կարծում եմ, գոնե մի փոքր կմեղմենք, ինչպես ժամկետային զինծառայողների, այնպես էլ զոհված կամ վիրավոր զինծառայողների ընտանիքների սոցիալական և առողջական խնդիրները»,- իր խոսքը եզրափակեց Արման Խարազյանը:
Հիշեցնենք, որ սահմանված զեղչերից օգտվելու համար ժամկետային զինծառայողի ընտանիքի անդամը պարզապես պետք է ներկայացնի համապատասխան փաստաթուղթ, որը վկայում է ընտանիքի անդամի՝ ՀՀ զինված ուժերում զառայության մեջ գտնվելու, վիրավորած կամ զոհված լինելու մասին:
.gif)
